ນະຄອນຫຼວງ ອາຄາເດມີ ສະໂມສອນເຍົາວະຊົນຂອງ ນະຄອນຫຼວງວຽງຈັນ ຈັດກິດຈະກໍາພາຍໃນສະໂມສອນ ປະຈໍາປີ 2021 ເມື່ອວັນທີ 27 ມີນາ 2021 ໂດຍມີຄະນະຄູຝຶກ, ນັກກີລາ ຂອງສະໂມສອນ ນະຄອນຫຼວງ ອາຄາເດມີ ພ້ອມດ້ວຍພໍ່ແມ່ຜູ້ປົກຄອງເຂົ້າຮ່ວມຢ່າງຫຼວງຫຼາຍ.
ໂອກາດດັ່ງກ່າວ ທ່ານ ພອນໄຊ ວົງທອງຄໍາ ຄູຝຶກຂອງສະໂມສອນ ນະຄອນຫຼວງ ອາຄາເດມີ ກ່າວວ່າ: ສະໂມສອນ ນະຄອນຫຼວງ ອາຄາເດມີ ເປີດສອນນັກກີລາຢ່າງເປັນທາງການເມື່ອວັນທີ 15 ຕຸລາ 2019 ເຊິ່ງສ້າງຂຶ້ນມາກໍເພືື່ອການພັດທະນາການຝຶກແອບຂອງນ້ອງໆ ແລະ ພັດທະນາທັກສະບານເຕະໃຫ້ດີຂຶ້ນ ໂດຍສະເພາະແມ່ນເປັນການດືງດູດໃຫ້ນັກກີລາມີຄວາມຮັກມັກໃນກີລາບານເຕະ ແລະ ສ້າງສະມັດຕະພາບທາງການຮ່າງກາຍ ແລະ ສະໝອງໃຫ້ກັບນ້ອງ.
“ ດັ່ງນັ້ນມື້ນີ້ຈິ່ງຈັດກິດຈະກໍາພາຍໃນສະໂມສອນ ເພື່ອໃຫ້ນ້ອງໆໄດ້ທົດສອບຄວາມສາມາດຫຼັງຈາກທີ່ໄດ້ຮຽນມາ ແລະ ໄດ້ຮ່ວມກັນເບີກບານມ່ວນຊື່ນຮ່ວມກັນ ລວມເຖິງພໍ່ແມ່ຜູ້ປົກຄອງໄດ້ມາຊົມການແຂ່ງຂັນຂອງລູກໆດ້ວຍຮອຍຍິ້ມອັນເບີກບານມ່ວນຊື່ ຫວັງຢ່າງຍິ່ງວ່າ ງານນີ້ຈະເປັນງານທີ່ສ້າງຄວາມປະທັບໃຈໃຫ້ກັບນ້ອງໆນັກກີລາ ແລະ ພໍ່ແມ່ນຜູ້ປົກຄອງ ແນ່ນອນງານນີ້ໄດ້ຮັບການສະໜັບສະໜູນຈາກສະຫະພັນບານເຕະນະຄອນຫຼວງວຽງຈັນ ແລະ ບໍລິສັດຮ້າງຮ້ານທີ່ໃຫ້ການສະໜັບສະໜູນ ລວມເຖິງສະໂມສອນສີລະປະດົນຕີ ດ່ານຊ້າງ ໃຫ້ການສະໜັບສະໜູນໃນການປະກອບສຽງພຽງພາຍໃນງານໃຫ້ມີຄວາມສົມບູນ ” ທ່ານ ພອນໄຊ ວົງທອງຄໍາ.
ກິດຈະກໍາດັ່ງກ່າວ ເລີ່ມຂຶ້ນໃນເວລາ 6:30 ໂມງຈົນເຖິງ 12:30 ໂມງຂອງວັນດັ່ງກ່າວ ໂດຍມີນັກກີລາພາຍໃນສະໂມສອນ ແລະ ພໍ່ແມ່ນຜູ້ປົກຄອງເຂົ້າຮ່ວມຫຼາຍກວ່າ 100 ຄົນ, ສ່ວນກິດຈະກໍາເລີ່ມຈາກນັກກີລາແລ່ນອອກສູ່ສະໜາມກ່ອນລຽນແຖວເປັນຮູບຕົວ VFA ເຊິ່ງໝາຍເຖິງ ນະຄອນຫຼວງ ອາຄາເດມີ ( Vientiane Football Academy ) ຕໍ່ດ້ວຍການອົບອຸ່ນຮ່າງກາຍ ກ່ອນທີ່ຈະມີການໂຮມໂຕ ທ່າມກາງການສະແດງສີລະປະລາຍການຕ່າງໆຈາກ ສະໂມສອນສີລະປະດົນຕີ ດ່ານຊ້າງ.
ຫຼັງສໍາເລັດພິທີເປີດທາງການໄດ້ມີການແບ່ງທີມພາຍໃນແຕ່ລະຮຸ່ນຄື: ຢູ 10, 12, 14, 16 ແລະ 18 ປີ ຮຸ່ນລະ 3 ທີມແຂ່ງຂັນພົບກັນໝົດ ແລະ ຄັດເອົາທີມທີ່ດີທີ່ສຸດເປັນຜູ້ຊະນະ ໄດ້ຮັບຫຼຽນຄໍາ, ອັນດັບ 2 ໄດ້ຮັບຫຼຽນເງິນ ແລະ ອັນດັບ 3 ໄດ້ຫຼຽນທອງ ທາມກາງຄວາມເບີກບານມ່ວນຊື່ຂອງນັກກີລາ ແລະ ຜູ້ແມ່ຜູ້ປົກຄອງ.
ສໍາລັບ ນະຄອນຫຼວງ ອາຄາເດມີ ສ້າງຕັ້ງຂຶ້ນວັນທີ 15 ຕຸລາ 2019 ເຊິ່ງປັດຈຸບັນມີການສອນນັກກີລາ 5 ຮຸ່ນຄື: ຢູ 10, 12, 14, 16 ແລະ 18 ປີ ໂດຍມີຄະນະຄູຝຶືກ 5 ທ່ານຄື: ທ່ານ ໂພທອງ ວົງກົດ ຫົວໜ້າຄູຝຶືກ ແລະ ຄູ່ຝຶືກອີກ 4 ທ່ານໄດ້ແກ່ ທ່ານ ພອນໄຊ ວົງທອງຄໍາ, ທ່ານ ສຸກສາຄອນ ອົດແກ້ວວໍລະເດດ, ທ່ານ ສົມພອນ ໄຊອາສາ ແລະ ທ່ານ ສົມປະສົງ ນາມວົງສັກ.
ຂ່າວ-ຮູບ: ຫຼ້າ
