ຈະລົງມືປັບປຸງ ແລະ ສ້ອມແປງທາງ 13 ໃຕ້ ແຕ່ກິໂລແມັດ 71 ຫາ 111 - Lanxang Media SOLE CO.,LTD

ຈະລົງມືປັບປຸງ ແລະ ສ້ອມແປງທາງ 13 ໃຕ້ ແຕ່ກິໂລແມັດ 71 ຫາ 111

ເມື່ອບໍ່ດົນມານີ້ໄດ້ມີພິທີເຊັນສັນຍາຮັບເໝົາໂຄງການປັບປຸງ ແລະ ສ້ອມແປງທາງ 13 ໃຕ້ ໄລຍະສັນຍາ 1 ນັບແຕ່ກິໂລແມັດ 71 ຫາ ກິໂລແມັດ 111 ລວມຄວາມຍາວ 40 ກິໂລແມັດ ນອນໃນແຂວງບໍລິຄຳໄຊ ລະຫວ່າງ ກົມຂົວທາງກະຊວງໂຍທາທິການ ແລະ ຂົນສົ່ງ (ຍທຂ) ກັບ ບໍລິສັດ Joint Venture of Thang Long Joint Stock Corporation ແລະ ບໍລິສັດ ສຸພາພອນ ກໍ່ສ້າງ ສໍາຫຼວດ – ອອກແບບ ແລະ ຂົວທາງຈໍາກັດຜູ້ດຽວ ເຊິ່ງເປັນຜູ້ຮັບເໝົາ.

ພິທີດັ່ງກ່າວຈັດຂຶ້ນທີ່ຫ້ອງປະຊຸມກົມຂົວທາງ ກະຊວງ ຍທຂ ໃຫ້ກຽດເຂົ້າຮ່ວມພິທີ່ດັ່ງກ່າວມີ ທ່ານ ລິຕາ ຂັດທິຍະ ຫົວໜ້າກົມຂົວທາງ, ທ່ານ ບຸນຈັນ ສິນຣາຊະວົງ ຫົວໜ້າຫ້ອງການ, ບັນດາທ່ານຫົວໜ້າກົມ, ຮອງກົມ, ຕາງໜ້າຈາກ ບໍລິສັດ ທີ່ຮັບເໝົາການກໍ່ສ້າງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

ໂຄງການປັບປຸງ ແລະ ສ້ອມແປງທາງ 13 ໃຕ້ ( ໄລຍະສັນຍາ 1 ) ມີຄວາມຍາວ 40 ກິໂລແມັດ ແມ່ນນອນຢູ່ໃນໂຄງການປັບປຸງ ແລະ ສ້ອມແປງທາງ 13 ໃຕ້ ແຕ່ກິໂລແມັດ 71 ( ແຂວງບໍລິຄຳໄຊ ) ຫາ ກິໂລແມັດ 346 ( ແຂວງຄໍາມ່ວນ ) ມີຄວາມຍາວທັງໝົດ 275 ກິໂລແມັດ ເຊິ່ງໄດ້ແບ່ງອອກເປັນ 4 ໄລຍະສັນຍາ ໄດ້ຮັບການສະໜັບສະໜູນເງິນກູ້ດອກເບ້ຍຕໍ່າຈາກສາມສະຖາບັນ ຄື: ທະນາຄານໂລກ ( WB ), ທະນາຄານລົງທຶນເອີຣົບ ( EIB ), ທະນາຄານການລົງທຶນໂຄງລ່າງພື້ນຖານອາຊີ ( AIIB ) ແລະ ງົບປະມານຈາກກອງທຶນທາງ ລວມທັງໝົດ 157,5 ລ້ານໂດລາສະຫະລັດ.

ໃນນີ້, ຄ່າກໍ່ສ້າງ ແລະ ປັບປຸງເສັ້ນທາງ 275 ກິໂລແມັດ ຈຳນວນ 125 ລ້ານໂດລາສະຫະລັດ, ຄ່າຊົດເຊີຍສິ່ງກີດ ຂວາງ ແລະ ເວນຄືນທີ່ດິນ 1,7 ລ້ານໂດລາສະຫະລັດ, ຄ່າວ່າຈ້າງທີ່ປຶກສາ 5 ລ້ານໂດລາສະຫະລັດ ແລະ ຄ່າບູລະນະຮັກສາ 25,8 ລ້ານໂດລາ, ໄລຍະປະຕິບັດໂຄງການແມ່ນ 10 ປີ ແຕ່ປີ 2021 – 2031, ໃນນີ້ໄລຍະກໍ່ສ້າງ 2 – 3 ປີ ແລະ ບູລະນະຮັກສາ 7 – 8 ປີ.

ໂຄງການນີ້ມີຈຸດປະສົງ ເພື່ອປັບປຸງ ແລະ ຍົກລະດັບຕອນທາງດັ່ງກ່າວໃຫ້ສາມາດຮັບນໍ້າໜັກບັນທຸກໄດ້ 11 ໂຕນ/ເພົາ, ໂດຍຍົກລະດັບໂຄງສ້າງຂອງທາງໄລຍະທີ່ຕໍ່າທີ່ມີນໍ້າຖ້ວມໃນໄລຍະຜ່ານມາ, ຂະຫຍາຍໜ້າທາງເກົ່າໃຫ້ກວ້າງອອກຕື່ມ, ເສີມຄວາມແຂງແກ່ນໂດຍການເສີມຊັ້ນພື້ນທາງອີກ 10 – 20 ຊັງຕີແມັດ ແລະ ປູທັບໜ້າທາງດ້ວຍຢາງຂົ້ວ.

ສໍາລັບໄລຍະສັນຍາ 1 ແມ່ນເລີ່ມແຕ່ກິໂລແມັດ 71 ຫາ ກິໂລແມັດ 111 ລວງຍາວ 40 ກິໂລແມັດ ແມ່ນນຳໃຊ້ທຶນກູ້ຢືມຈາກທະນາຄານໂລກ ເພື່ອປັບປຸງຍົກລະດັບຈຸດນໍ້າຖ້ວມ ແລະ ຂະຫຍາຍໜ້າທາງເກົ່າ ຈາກ 9 ແມັດ ເປັນ 12 ແມັດ, ມີ 2 ຊ່ອງທາງຈະລາຈອນ ( 2 x 3,5 ແມັດ ) ແລະ ບ່າທາງເບື້ອງລະ 2,5 ແມັດ ພ້ອມທັງກໍ່ສ້າງຂົວໃໝ່ 2 ແຫ່ງ ແທນໃສ່ຈຸດເກົ່າ ລວງຍາວແຫ່ງລະປະມານ 25 ແມັດ, ກວ້າງ 12 ແມັດ, ໂຄງສ້າງທາງແມ່ນໄດ້ອອກແບບເປັນໜ້າທາງແບບປູຢາງຂົ້ວ ( ເບຕົງອັດສະຟານ ).

ໃນການຈັດຕັ້ງປະຕິບັດໂຄງການດັ່ງກ່າວນີ້ ໄດ້ຄັດເລືອກເອົາບໍລິສັດຮັບເໝົາໂດຍການປະມູນສາກົນໃນຮູບແບບສັນຍາແບບມອບເໝົາ ( Output and Performances Base Road Contract-OPBRC ) ຄືຜູ້ຮັບເໝົາເປັນຜູ້ດຳເນີນການກໍ່ສ້າງສຳເລັດພາຍໃນ 2 ປີ ແລະ ສືບຕໍ່ບູລະນະຮັກສາໄປຕື່ມອີກ 8 ປີ ຈຶ່ງມອບໃຫ້ເຈົ້າຂອງໂຄງການ.

ມູນຄ່າຂອງສັນຍາຜ່ານການປະມູນ ສໍາລັບສັນຍານີ້ແມ່ນ 17,5 ລ້ານໂດລາສະຫະລັດ ສ່ວນຮູບການຊໍາລະໃຫ້ແກ່ໂຄງການແບ່ງອອກເປັນ 2 ໄລຍະ ຄື: ໄລຍະທີ 1 ແມ່ນໄລຍະດຳເນີນການກໍ່ສ້າງ 2 ປີ ມີມູນຄ່າປະມານ 14 ລ້ານໂດລາສະຫະລັດ ໂດຍແມ່ນທະນາຄານໂລກເປັນຜູ້ຊຳລະ ແລະ ໄລຍະທີ 2 ແມ່ນໄລຍະການນຳໃຊ້ ແລະ ບູລະນະຮັກສາເສັ້ນທາງ 8 ປີ, ແບ່ງຈ່າຍເປັນງວດໆໂດຍນຳໃຊ້ເງິນຈາກກອງທຶນທາງ ( ຂອງລັດຖະບານ ) ຈຳນວນ 3,5 ລ້ານໂດລາສະຫະລັດ.