ເຈົ້າຂອງຕະຫຼາດໄຮ່ຄໍາ ນັກທຸລະກິດຍິງໃຈສູ້ ລົງມືເຮັດດ້ວຍຄວາມດຸໝັ່ນ ແລະ ອົດທົນ - Lanxang Media SOLE CO.,LTD

ເຈົ້າຂອງຕະຫຼາດໄຮ່ຄໍາ ນັກທຸລະກິດຍິງໃຈສູ້ ລົງມືເຮັດດ້ວຍຄວາມດຸໝັ່ນ ແລະ ອົດທົນ

ປະສົບການໃນການດໍາເນີນທຸລະກິດຂອງທ່ານ ນາງ ສຸດທິດາ ປຣີຊາຍານ ເຈົ້າຂອງຕະຫຼາດໄຮ່ຄໍາ ແມ່ນບໍ່ມີຫຼັກສູດຕາຍໂຕ ພຽງແຕ່ຕັ້ງໃຈລົງມືເຮັດດ້ວຍຄວາມດຸໝັ່ນ, ອົດທົນ ແລະ ຊອກໂອກາດໃນການຂະຫຍາຍທຸລະກິດ ຕອບໂຈດຄວາມຕ້ອງການຂອງສັງຄົມ ຈົນກ້າວມາເປັນນັກທຸລະກິດຍິງໜຸ່ມນ້ອຍ ທີ່ປະສົບຜົນສໍາເລັດ.

ທ່ານ ນາງ ສຸດທິດາ ປຣີຊາຍານ ເຈົ້າຂອງຕະຫຼາດໄຮຄໍາ ບ້ານໄຮຄໍາ ເມືອງໄຊເສດຖາ ນະຄອນຫຼວງວຽງຈັນ ກ່າວວ່າ: ຕົນເອງແມ່ນມັກໃນການຄ້າຂາຍມາກ່ອນ ເນື່ອງຈາກໄດ້ຮຽນຮູ້ນໍາພໍ່ – ແມ່ ທີ່ດໍາເນີນທຸລະກິດແສງສະຫວ່າງພັນປາ. ພາຍຫຼັງທີ່ຕົນເອງຈົບມໍ 6 ກໍຕັດສິນໃຈສືບຕໍ່ດໍາເນີນທຸລະກິດທີ່ພໍ່ແມ່ສ້າງໄວ້ໃຫ້ ໂດຍໄດ້ເປີດຮ້ານ ສະຫວ່າງການກະເສດ ຂາຂາ 2(ຕະຫຼາດທາດຫຼວງ)ເປັນຂອງຕົນເອງ ເຊິ່ງທຸລະກິດກໍໄດ້ຮັບຜົນຕອບຮັບຈາກສັງຄົມ ແລະ ມີຄວາມໝັ້ນຄົງ.

ຫຼັງຈາກດໍາເນີນທຸລະກິດມາໄດ້ໄລຍະໜຶ່ງກໍເຫັນໂອກາດໃນທຸລະກິດດ້ານອະສັງຫາລິມະຊັບ ຕົນເອງກໍຕັດສິນໃຈ ຊື້ດິນເພື່ອຂາຍຕໍ່ ເຊິ່ງຖືວ່າໄດ້ຮັບຄວາມສົນໃຈຈາກສັງຄົມເປັນຢ່າງດີ. ຫຼັງຈາກນັ້ນ ຕົນເອງສັງເກດເຫັນປະຊາຊົນນໍາເອົາຜົນຜະລິດທາງດ້ານກະສິກໍາ ມາວາງຂາຍໃນເນື້ອທີ່ດິນຂອງຕົນເອງ ກໍ່ມີຄວາມສົນໃຈໃນການສ້າງຕະຫຼາດທີ່ໄດ້ມາດຕະຖານ ເພື່ອໃຫ້ປະຊາຊົນ, ຊາວຄ້າຂາຍໄດ້ໃຊ້ເປັນບ່ອນຊື້ຂາຍ ເຊິ່ງຮອດປີ 2014 ກໍໄດ້ລົງທຶນສ້າງ ແລະ ເປີດບໍລິການຕະຫຼາດໄຮຄໍາມາຮອດທຸກວັນນີ້.

ທ່ານກ່າວວ່າ: ໂດຍເຫັນໄດ້ຄວາມສໍາຄັນ ແລະ ເນື້ອທີ່ຕະຫຼາດທີ່ເໝາະສົມມີຫຼາຍກວ່າ 6 ເຮັກຕາ; ສະນັ້ນ ກໍໄດ້ຍົກລະດັບຕະຫຼາດໄຮຄໍາເປັນຕະຫຼາດຂາຍຍົກ – ຂາຍຍ່ອຍແຫ່ງທີ 2 ຂອງນະຄອນຫຼວງວຽງຈັນ ນັບແຕ່ປີ 2017 ເປັນຕົ້ນມາເຊິ່ງໄດ້ມີການພັດທະນາຫຼາຍໆດ້ານບໍ່ວ່າຈະເປັນການຂະຫຍາຍຕຶກອາຄານ ແລະ ປູຄອນກີດພາຍໃນຕະຫຼາດ, ເສັ້ນທາງເຂົ້າຕະຫຼາດກໍມີຄວາມກວ້າງຂວາງສະດວກສະບາຍ ເພື່ອເປັນສະຖານທີ່ສໍາລັບແລກປ່ຽນຊື້ຂາຍສິນຄ້າ ໃນຂອບເຂດທົ່ວປະເທດບໍ່ວ່າຈະເປັນສິນຄ້າທີ່ມາຈາກບັນດາແຂວງພາກເໜືອ ແລະ ບັນດາແຂວງພາກໃຕ້ ກໍໄດ້ນໍາມາລົງ ແລະ ຊື້ຂາຍໃນຕະຫຼາດຂອງພວກເຮົາ.

ສໍາລັບທ່າແຮງຂອງຕະຫຼາດໄຮຄໍາພາຍຫຼັງເປີດນໍາໃຊ້ເສັ້ນທາງລົດໄຟລາວຈີນໃນທ້າຍປີນີ້ ຈະເປັນໂອກາດອັນດີ ໃນການຄ້າຂາຍພາຍໃນຕະຫຼາດຂອງພວກເຮົາ ເພາະສະຖານທີ່ແມ່ນຢູ່ໃກ້ກັບສະຖານີລົດໄຟທ່ານາແລ້ງ, ເປັນຈຸດໃຈກາງລະຫວ່າງສິນຄ້າທີ່ມາຈາກແຂວງພາກເນືອ ແລະ ແຂວງພາກໃຕ້ ເຊິ່ງພວກເຮົາມີສະຖານທີ່ກວ້າງຂວາງໃຫ້ພໍ່ຄ້າຄົນກາງໃຊ້ເປັນພື້ນທີ່ໃນການ ເກັບຊື້ສິນຄ້າເພື່ອສົ່ງໄປຂາຍຕ່າງປະເທດໂດຍຜ່ານເສັ້ນທາງລົດໄຟລາວ – ຈີນ.

ເນື່ອງໃນໂອກາດ ສະເຫຼີມສະຫຼອງວັນແມ່ຍິງສາກົນຄົບຮອບ 111 ປີຕົນເອງກໍຂໍອວຍພອນມາຍັງເອື້ອຍນ້ອງແມ່ຍິງທຸກຄົນຈົ່ງມີຄວາມຮັ່ງມີຜາສຸກ ປະສົບຜົນສໍາເລັດໃນໜ້າທີ່ວຽກງານ ສາມາດຜ່ານຜ່າວິກິດການລະບາດຂອງໂຄວິດ-19. ສໍາລັບ ເອື້ອຍນ້ອງຍິງ ຫຼື ຜູ້ທີ່ສົນໃຈຢາກເຂົ້າມາຄ້າຂາຍ ທາງຕະຫຼາດພວກເຮົາກໍພ້ອມທີ່ຈະສົ່ງເສີມ.

ຕະຫຼາດໄຮຄຳເປີດໃຫ້ບໍລິກາຕະຫຼອດ 24 ຊົ່ວໂມງ ນອກນັ້ນໃນປັດຈຸບັນກໍມີນະໂຍບາຍຫຼາຍຢ່າງເຊັ່ນ: ການຊື້ໂຕະເສຍຄ່າປີ້ລາຍວັນ, ຫ້ອງນໍ້າບໍ່ເກັບຄ່າບໍລິການ, ອາກາດປອດໂປ່ງ ແລະ ທາງເຂົ້າອອກກໍ່ມີຄວາມສະດວກສະບາຍ.