ຫ້ອງຕໍາຫຼວດກອງບັນຊາການ ປ້ອງກັນຄວາມສະຫງົບ ແຂວງອັດຕະປື ໄດ້ຈັດກອງປະຊຸມສະຫຼຸບວຽກງານປະຈຳປີ 2020 ແລະ ວາງທິດທາງແຜນການປະຈຳປີ 2021 ຂື້ນທີ່ສະໂມສອນກອງບັນຊາການດັ່ງກ່າວໃນທ້າຍເດືອນກຸມພາ 2021 ຜ່ານມາ,ໂດຍການເປັນປະທານຂອງທ່ານ ພັທ ວົງລະຄອນ ປະທຸມມະແສງ ຮອງຫ້ອງຕຳຫຼວດ ປກສ ແຂວງ,ໃຫ້ກຽດເຂົ້າຮ່ວມມີທ່ານ ພັທ ປອ ບຸນຊູ ສຸລິນັນທອງ ຮອງເລຂາຄະນະພັກ ຮອງກອງບັນຊາການ ປກສ ແຂວງ,ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ກອງປະຊຸມໄດ້ຜ່ານບົດສະຫຼຸບການເຄື່ອນໄຫວວຽກງານປ້ອງກັນຄວາມສະຫງົບ ປະຈຳປີ 2020 ເຊິ່ງໃນໄລຍະ 1 ປີຜ່ານມາຄະນະນໍາຫ້ອງຕໍາຫຼວດຍາດໄດ້ຜົນງານເດັ່ນຫຼາຍດ້ານ ໃນການທັບມ້າງຄະດີ ເປັນຕົ້ນ: ໄດ້ມີຄະດີອາຍາເກີດຂື້ນທັງໝົດ 69 ລາຍ, ເດັ່ນກວ່າໝູ່ແມ່ນຄະດີລັກຊັບ 59 ລາຍ, ທໍາຮ້າຍຮ່າງກາຍ 7 ລາຍ ແລະ ຄະດີອື່ນໆ, ໄດ້ດໍາເນີນການແກ້ໄຂສະພາບການທີ່ເກີດຂື້ນ 42 ລາຍ, ກັກຕົວຜູ້ຖືກຫາໄດ້ 94 ຄົນ, ຍິງ 4 ຄົນ, ໄດ້ແກ້ໄຂຄະດີຍັກຍອກຊັບຂອງລັດ ຫຼື ລວມໝູ່ 1 ລາຍ, ກັກຕົວຜູ້ຕ້ອງຫາໄດ້ 1 ຄົນ,ຍິງ 1 ຄົນ, ລົງສະກັດກັ້ນການບຸກລຸກປ່າສະຫງວນ ຢູ່ເມືອງສະໜາມໄຊ 1 ຄັ້ງ, ລົງສະກັດກັ້ນການລັກລອບຕັດໄມ້-ເຄື່ອນຍ້າຍໄມ້ທີ່ບໍ່ຖືກຕ້ອງຕາມລະບຽບກົດໝາຍ 5 ຄັ້ງ.
ລົງສະກັດກັ້ນການລັກລອບຊື້-ຂາຍ ໄມ້ຜິດກົດໝາຍ 45 ຄັ້ງ, ກັກລົດໄດ້ 18 ຄັນ, ຜູ້ກະທຳຜິດ 18 ຄົນ, ລົງກວດຕາຊິງຕາມທ້ອງຕະຫຼາດ ຢູ່ເມືອງສາມັກຄີໄຊ ສາມາດກັກຢຶດຕາຊິງບໍ່ໄດ້ມາດຖານ 9 ເຄື່ອງ, ຜູ້ກະທຳຜິດ 9 ຄົນ, ສຶກສາອົບຮົມກ່າວເຕືອນພວກຫຼີ້ນການພະນັນເຖື່ອນ ຈໍານວນ 44 ຄົນ, ຍິງ 20 ຄົນ, ໄດ້ລົງເຄື່ອນໄຫວສະກັດກັ້ນເປົ້າໝາຍລັກລອບຂຸດຄົ້ນຊັບພະຍາກອນທໍາມະຊາດ, ສັດນ້ຳ-ສັດປ່າ ສາມາດແກ້ໄຂຄະດີໄດ້ 16 ລາຍ,ກັກຜູ້ຖືກຫາໄດ້ 46 ຄົນ, ລົງເຄື່ອນໄຫວວຽກງານສະກັດກັ້ນ ແລະ ຕ້ານການຄ້າມະນຸດ ສາມາດແກ້ໄຂຄະດີໄດ້ 5 ລາຍ, ໃນນັ້ນ,ມີຄະດີທໍາມິດສະຈານ 4 ລາຍ, ຜູ້ຕ້ອງຫາ 8 ຄົນ, ຍິງ 4 ຄົນ ແລະ ຄະດີຄ້າມະນຸດ 1 ລາຍ. ຜູ້ຕ້ອງຫາ 1 ຄົນ,ຍິງ 1 ຄົນ.
ລົງທັບມ້າງຄະດີຢາເສບຕິດໄດ້ທັງໝົດ 116 ລາຍ, ກັກຕົວຜູ້ຖືກຫາໄດ້ 171 ຄົນ, ຍິງ 34 ຄົນ, ຢຶດຂອງກາງປະເພດຢາບ້າໄດ້ 88.531 ເມັດ, ຢາໄອ໋ສ໌ 25 ຫໍ່ ແລະ 37 ຖົງ, ເທົ່າກັບ 80 ກິໂລກຼາມ, ຢາໄອ໋ສ໌ປອມ 156 ຖົງ ເທົ່າກັບ 156 ກິໂລກຼາມ, ຜົງຂາວ 1 ກິໂລກຼາມ,ກັນຊາແຫ້ງ 2 ແພັກ,ເງິນກີບ 36 ລ້ານກວ່າກີບ,ເງິນໂດລາ 7.000 ໂດລາ, ເງິນບາດ 7.620 ບາດ, ໂທລະສັບ 106 ເຄື່ອງ, ລົດຈັກ 17 ຄັນ,ລົດໃຫຍ່ 6 ຄັນ, ປືນສັ້ນ 2 ກະບອກ, ປືນດັດແປງ 3 ກະບອກ ແລະ ປືນ ເຊກາເຊ 1 ກະບອກ, ມີຄະດີກ່ຽວກັບອຸບັດຕິເຫດເກີດຂື້ນທັງໝົດ 206 ລາຍ, ແກ້ໄຂແລ້ວ 201 ລາຍ, ສືບຕໍ່ດໍາເນີນຄະດີ 5 ລາຍ.
ໃນກອງປະຊຸມໄດ້ປະກອບຄຳຄິດຄຳເຫັນ ເພື່ອເຮັດໃຫ້ການຈັດຕັ້ງປະຕະບັດໜ້າທີ່ວິຊາສະເພາະຂອງຫ້ອງຕໍາຫຼວດກອງບັນຊາການປ້ອງກັນຄວາມສະຫງົບແຂວງອັດຕະປື ໄດ້ຮັບຜົນສໍາເລັດຕາມຄາດໝາຍທີ່ໄດ້ວາງໄວ້. ຂ່າວ: ປກສ ແຂວງອັດຕະປື.ເສົາດາລົງ ເພັດສົງຄາມ
