ເຈົ້າຖິ່ນ ຄອງແຊັມເຕະບານ 4 ສາມັກຄີ ຊີງຂັນເຈົ້າເມືອງໄຊທານີ ຕ້ອນຮັບ - ຊົມເຊີຍບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9 - Laoedaily

ເຈົ້າຖິ່ນ ຄອງແຊັມເຕະບານ 4 ສາມັກຄີ ຊີງຂັນເຈົ້າເມືອງໄຊທານີ ຕ້ອນຮັບ – ຊົມເຊີຍບັ້ນເລືອກຕັ້ງສະມາຊິກສະພາແຫ່ງຊາດ ຊຸດທີ 9

ທີມອົງຄະນະພັກເມືອງໄຊທານີ ເອົາຊະນະ ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ ໄປແບບສຸດມ່ວນ 3 – 1 ປະຕູ ໃນນັດຊີງຊະນະເລີດການແຂ່ງຂັນເຕະບານ 4 ສາມັກຄີ ຊີງຂັນເຈົ້າເມືອງໄຊທານີ ເມື່ອທ້າຍອາທິດຜ່ານມາ.

ການແຂ່ງຂັນເຕະບານ 4 ສາມັກຄີຮັກແພງ ລະຫວ່າງ ທີມອົງຄະນະພັກເມືອງໄຊທານີ, ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ, ທີມກຸ່ມສື່ມວນຊົນສາຍກີລາລາວ ຫຼື ລາວສະປອດມີເດຍ ແລະ ສະມາຄົມນັກທຸລະກິດຮ້ານອາຫານລາວ ມີຂຶ້ນເມື່ອວັນທີ 19 ກຸມພາຜ່ານມາ ທີ່ສະໜາມກີລາເຕະບານຫຍ້າທຽມ ດອນໜູນ ເມືອງໄຊທານີ ນະຄອນຫຼວງວຽງຈັນ ໃຫ້ກຽດເຂົ້າຮ່ວມມີ ທ່ານ ຄຳປະດິດ ເຂັມມານິດ ເຈົ້າເມືອງໄຊທານີ, ທ່ານ ເຮັນຣິກ ໂຈແອນເດີຊັນ ( Henrik Juel Andersen ) ຜູ້ອຳນວຍການ ບໍລິສັດ ເບຍລາວ ຈຳກັດ ແລະ ທ່ານ ຄຳແພງ ເພົ້າບົວວົງ ປະທານສະມາຄົມນັກທຸລະກິດຮ້ານອາຫານລາວ ທັງເປັນເຈົ້າຂອງຮ້ານອາຫານຊີ້ນດາດລັດສະໝີ ຈານໃຫຍ່ ພ້ອມດ້ວຍຄະນະ ແລະ ບັນດາຄະນະນຳແຕ່ລະພາກສ່ວນ ຕະຫຼອດຮອດບັນດາສື່ມວນຊົນສາຍກີລາທຸກຂະແໜງການເຂົ້າຮ່ວມຢ່າງເປັນຂະບວນການຟົດຟື້ນ.

ທ່ານ ເຮັນຣິກ ກ່າວວ່າ: ຂ້າພະເຈົ້າມີຄວາມພາກພູມໃຈຢ່າງຍິ່ງທີ່ເຮັດໃຫ້ການແຂ່ງຂັນບານເຕະມິດຕະພາບ 4 ສາມັກຄີ ຊີງຂັນເຈົ້າເມືອງໄຊທານີ ເກີດຂຶ້ນມາໄດ້ ເຊິ່ງຈະສ້າງ ຄວາມສາມັກຄີໃຫ້ກັບທັງ 4 ພາກສ່ວນ ລວມທັງຍັງເປັນການສົ່ງເສີມຂະບວນການເຄື່ອນໄຫວກິດຈະກໍາຢ່າງຕໍ່ເນື່ອງ ແລະ ແນ່ນອນໃນອະນາຄົດຈະມີລາຍການແບບນີ້ຢ່າງຕໍ່ເນື່ອງ.

อาจเป็นรูปภาพของ 3 คน, ผู้คนกำลังยืน และพื้นหญ้า

ຂະນະທີ່ ທ່ານ ຄຳແພງ ເພົ້າບົວວົງ ກ່າວວ່າ: ສຳລັບກິດຈະກຳໃນຄັ້ງນີ້ແມ່ນນອນໃນແຜນການເຄື່ອນໄຫວປີ 2021 ຂອງສະມາຄົມນັກທຸລະກິດຮ້ານອາຫານລາວ ຫຼື ຊື່ເດີມແມ່ນກຸ່ມຮ້ານອາຫານ – ເບຍລາວ ເພື່ອແນໃສ່ເປັນການເປີດສາຍພົວພັນມິດຕະພາບທີ່ດີງາມ ລະ ຫວ່າງ 4 ພາກສ່ວນໃຫ້ມີຄວາມແໜ້ນແຟ້ນ ແລະ ຄວາມສາມັກຄີຮັກແພງໃຫ້ນັບມື້ເຕີບໃຫຍ່ຂະຫຍາຍຕົວຂຶ້ນເລື້ອຍໆ, ຕະຫຼອດໄລຍະທີ່ຜ່ານມາພວກເຮົາຄະນະບໍລິຫານງານສະມາຄົມນັກທຸລະກິດຮ້ານອາຫານລາວ ແມ່ນມີຄວາມພາກພູມໃຈທີ່ສຸດ ນອກຈາກໄດ້ມີໂອກາດເຕົ້າໂຮມຄວາມສາມັກຄີ ແລະ ແລກປ່ຽນບົດຮຽນໃນການເຮັດທຸລະກິດຮ້ານດ້ວຍກັນ ກໍຍັງມີສ່ວນຮ່ວມຄຽງບ່າຄຽງໄຫຼ່ໃນການປະກອບສ່ວນຊ່ວຍເຫຼືອສັງຄົມລາວຕະຫຼອດມາ ໂດຍສະເພາະຫຼ້າສຸດກໍໄດ້ຊ່ວຍເຫຼືອພໍ່ແມ່ປະຊາຊົນເຂດເມືອງສອງຄອນ ແຂວງສະຫວັນນະເຂດ ທີ່ໄດ້ປະສົບໄພນໍ້າຖ້ວມ ເມື່ອປີ 2020 ຜ່ານມາ ແລະ ປີນີ້ກໍຍັງມີແຜນຈະສືບຕໍ່ລະດົມທຶນ ແລະ ວັດຖຸປັດໄຈ ຕະຫຼອດຮອດເຄື່ອງຕ່າງໆໄປຊ່ວຍເຫຼືອພໍ່ແມ່ປະຊາຊົນເຂດພາກເໜືອອີກ ແລະ ຄາດວ່າໃນທ້າຍເດືອນມີນານີ້ ຈະຂຶ້ນໄປແຂວງອຸດົມໄຊ.

ການແຂ່ງຂັນເຕະບານ 4 ສາມັກຄີ ແມ່ນຈັບສະຫຼາກປະກົບຄູ່ແຂ່ງຂັນ ຄັດເລືອກເອົາທີມທີ່ຊະນະຜ່ານເຂົ້າໄປຫຼິ້ນໃນຮອບຊີງຊະນະເລີດ. ໃນຮອບທຳອິດ ທີມອົງຄະນະພັກເມືອງໄຊທານີ ເອົາຊະນະທີມສະມາຄົມນັກທຸລະກິດອາຫານລາວ ເຂົ້າໄປຊີງຊະນະເລີດ ພົບກັບ ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ທີ່ເອົາຊະນະທີມກຸ່ມສື່ມວນຊົນສາຍກີລາລາວ.

ໃນຮອບຊີງຊະນະເລີດ ທີມອົງຄະນະພັກເມືອງໄຊທານີ ເອົາຊະນະ ທີມຝ່າຍການຂາຍ ແລະ ການຕະຫຼາດ ບໍລິສັດ ເບຍລາວ ຈຳກັດ ໄປແບບສຸດມ່ວນ 3 – 1 ປະຕູ ຄວ້າແຊັມໄປຄອງ. ສ່ວນອັນດັບທີ 3 ຮ່ວມແມ່ນ ແລະ ສະມາຄົມນັກທຸລະກິດຮ້ານອາຫານລາວ ແລະ ທີມກຸ່ມສື່ມວນຊົນສາຍກີລາລາວ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ