ຂ່າວດີມື້ນີ້ ຜູ້ຕິດເຊື້ອໂຄວິດ-19 ນໍ້າເບີ ​43 ຈະໄດ້ອອກໂຮງໝໍແລ້ວ - Laoedaily

ຂ່າວດີມື້ນີ້ ຜູ້ຕິດເຊື້ອໂຄວິດ-19 ນໍ້າເບີ ​43 ຈະໄດ້ອອກໂຮງໝໍແລ້ວ

ຄະນະສະເພາະກິດຖະແຫຼງ ວັນທີ 21 ກຸມພາ 2021 ໄດ້ເກັບຕົວຢ່າງມາກວດວິເຄາະຫາເຊື້ອໂຄວິດ-19 ທັງໝົດ 350ຄົນ,​ ເຊິ່ງຜົນກວດແມ່ນບໍ່ພົບເຊື້ອ, ຂະນະທີ່ 22 ກຸມພານີ້ ມີຂ່າວດີ ຜູ້ຕິດເຊື້ອໂຄວິດ-19 ນໍ້າເບີ 43 ທີ່ປິ່ນປົວຢູ່ຫຼວງນໍ້າທາຈະໄດ້ອອກໂຮງໝໍແລ້ວ, ສະນັ້ນ ຍັງມີຜູ້ຕິດເຊື້ອພະຍາດໂຄວິດ-19 ປິ່ນປົວຢູ່ໂຮງໝໍ 3ຄົນ.

ວັນທີ 22 ກຸມພາ 2021 ທີ່ກະຊວງສາທາລະນະສຸກ ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໃຫ້ຮູ້ວ່າ: ປະຈຸບັນ ທົ່ວໂລກມີການລາຍງານການລະບາດຂອງພະຍາດ ໂຄວິດ-19 ທັງໝົດ 219 (ປະເທດ/ເຂດ), ຜູ້ຕິດເຊື້ອສະສົມ 111.937.037 ຄົນ, ເສຍຊິວິດສະສົມ 2.477.409 ຄົນ ແລະ ປີ່ນປົວຫາຍດີ 87.305.098 ຄົນ. ສຳລັບບັນດາກຸ່ມປະເທດອາຊຽນ, ປະເທດ ອິນໂດເນເຊຍ ແມ່ນມີຜູ້ຕິດເຊື້ອສະສົມ ສູງກວ່າໝູ່ , ຖັດລົງມາແມ່ນປະເທດ ຟີລິບປິນ, ມາເລເຊຍ, ມຽນມ້າ ຕາມລຳດັບ.

ສໍາລັບ ສປປ ລາວ ໃນວັນທີ 21 ກຸມພາ 2021 ໄດ້ເກັບຕົວຢ່າງມາກວດວິເຄາະທັງໝົດ 350 ຄົນ; ຜົນກວດວິເຄາະທັງໝົດ ແມ່ນບໍ່ພົບເຊື້ອ ໝາຍຄວາມວ່າ ວັນທີ 21 ກຸມພາ 2021 ບໍ່ພົບຜູ້ຕິດເຊື້ອໃໝ່; ສັງລວມການກວດວິເຄາະ ນັບແຕ່ ເດືອນມັງກອນ 2020 ຮອດ ປະຈຸບັນ ໄດ້ເກັບຕົວຢ່າງມາກວດທັງໝົດ 111.365 ຕົວຢ່າງ, ກວດພົບເຊື້ອສະສົມ 45 ຄົນ.

ທັ້ງນີ້, ດ້ານການຕິດຕາມປີ່ນປົວຄົນເຈັບຢູ່ໂຮງໝໍ ຄົນເຈັບນໍ້າເບີ 43 ທີ່ນອນປິ່ນປົວຢູ່ແຂວງຫຼວງນ້ຳທາ ຈະໄດ້ອອກໂຮງໝໍໃນມື້ນີ້ ແລະ ໄປສືບຕໍ່ຕິດຕາມອາການຕົນເອງຢູ່ເຮືອນຈົນຄົບ 14 ວັນ. ມາຮອດປະຈຸບັນ ຄົນເຈັບຕິດເຊື້ອພະຍາດ ໂຄວິດ-19 ຈຳນວນ 3 ຄົນ ແມ່ນສືບຕໍ່ ນອນຕິດ
ຕາມອາການ ແລະ ປິ່ນປົວຢູ່ໂຮງໝໍທີ່ຖືກກຳນົດໄວ້.

ທ່ານ ດຣ. ສີສະຫວາດ ສຸດທານີລະໄຊ ກ່າວຕື່ມວ່າ: ສະພາບການລະບາດຂອງພະຍາດ ໂຄວິດ-19 ໃນທົ່ວໂລກ ຄາດວ່າຈະມີໂອກາດລະບາດຊ້ຳ ເປັນໄລຍະໆ ເພາະປະຈຸບັນຫຼາຍປະເທດຍັງບໍ່ທັນສາມາດຕັດວົງຈອນ ການລະບາດຂອງພະຍາດໄດ້ເທື່ອ; ດັ່ງນັ້ນ ການລະບາດຂອງພະຍາດ ສ່ວນໜຶ່ງ ກໍ່ແມ່ນຂຶ້ນກັບພຶດຕິກຳ ການດຳລົງຊີວິດ ແລະ ການເອົາໃຈໃສ່ປ້ອງກັນຕົນເອງຂອງປະຊາຊົນ ໃນແຕ່ລະພື້ນທີ່ ກໍ່ຄື ການປະຕິບັດມາດຕະການປ້ອງ
ກັນການຕິດເຊື້ອ ເຊັ່ນ: ການໃສ່ຜ້າອັດປາກ-ດັງ, ໝັ່ນລ້າງມືເລື້ອຍໆດ້ວຍນ້ຳສະອາດໃສ່ສະບູ, ຮັກສາມາລະຍາດໃນການໄອ-ຈາມ, ຮັກສາໄລຍະຫ່າງທາງສັງຄົມ 1-2 ແມັດຂຶ້ນໄປ, ບໍ່ໃຊ້ສິ່ງຂອງຮ່ວມກັນ, ຫຼີກລ້ຽງການເດີນທາງໄປຍັງສະຖານທີ່ແອອັດ ຫຼື ສະຖານທີ່ ທີ່ມີຄວາມສ່ຽງ.

ພ້ອມດຽວກັນນັ້ນ ກໍ່ຄວນໝັ່ນສັງເກດອາການຕົນເອງ ຫາກທ່ານຮູ້ສຶກບໍ່ສະບາຍ ຄ້າຍຄືໄຂ້ຫວັດ ຕ້ອງໄດ້ຢຸດຮຽນ ຫຼື ຢຸດໄປເຮັດວຽກ ເພາະເຊື້ອພະຍາດສາມາດແຜ່ໄປຍັງເພື່ອນຮ່ວມງານ ແລະ ຄົນໃນຄອບຄົວຂອງທ່ານໄດ້, ບໍ່ຄວນຊື້ຢາມາກິນເອງ ແຕ່ຄວນຮີບຮ້ອນໄປພົບແພດທັນທີ ເພື່ອ
ຮັບການປິ່ນປົວຢ່າງທັນການ; ເພື່ອສະກັດກັ້ນບໍ່ໃຫ້ເກີດການລະບາດ ແລະ ຂະຫຍາຍເປັນວົງກວ້າງ ໃນປະເທດຂອງພວກເຮົາ, ຈຶ່ງຂໍຮຽກຮ້ອງມາຍັງທຸກພາກສ່ວນໃນສັງຄົມ ເປັນເຈົ້າການ ໃນການຈັດຕັ້ງປະຕິບັດຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 111/ຫສນຍ, ລົງວັນທີ 01 ກຸມພາ 2021 ແລະ ຄຳແນະນຳຂອງຂະແໜງການກ່ຽວຂ້ອງ ຢ່າງເຄັ່ງຄັດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ