ນັກເຕະທີ່ຍິງປະຕູໄດ້ຫຼາຍທີ່ສຸດຂອງລີກ ໃນບັນດາປະເທດອາຊຽນທີ່ເປັນຄົນອາຊຽນ ເປັນນັກເຕະຈາກລີກສູງສຸດຂອງປະເທດກໍາປູເຈຍ ທີ່ຍິງໄປເຖິງ 15 ປະຕູ ໃນລະດູການ 2020 ຕາມການຈັດອັນດັບຂອງ ASEAN FOOTBALL ເພຈ໌ເຟສບຸກຊັ້ນນໍາຂອງວົງການບານເຕະອາຊຽນ ເມື່ອວັນທີ 16 ກຸມພາ 2021, ສ່ວນອັນດັບ 2 ເປັນຂອງນັກເຕະຈາກລີກສູງສຸດຂອງ ສປປ ລາວ ຍິງໄປເຖິງ 12 ປະຕູ.
ເພຈ໌ເຟສບຸ໊ກດັ່ງກ່າວໄດ້ເປີດເຜີຍ 10 ລາຍຊື່ ທີ່ເປັນນັກເຕະທີ່ຍິງປະຕູໄດ້ຫຼາຍທີ່ສຸດຂອງລີກ ໃນບັນດາປະເທດອາຊຽນ ແລະ ຍັງເປັນນັກເຕະສັນຊາດປະເທດຂອງລີກດັ່ງກ່າວອີກ ມີດັ່ງນີ້:
- MAT NORON ຈາກບຶກ ເກັດ ອັງກໍ ໃນລີກສູງສຸດຂອງກໍາປູເຈຍ ຍິງໄດ້ທັງໝົດ 15 ປະຕູ
-
ແກ້ວວຽງເພັດ ລິດທິເດດ ຈາກມາສເຕີ 7 ເອັຟຊີ ໃນລີກສູງສຸດຂອງ ສປປ ລາວ ຍິງໄດ້ 12 ປະຕູ
-
SHAHREL FIKRI ຈາກ FERAK ທີມໃນລີກສູງສຸດຂອງ ມາເລເຊຍ ຍິງໄດ້ 10 ປະຕູ
-
WIN NAING SOE ຈາກຢາດານ້າໂບນ ທີມລີກສູງສຸດຂອງ ມຽນມາ ຍິງໄດ້ 10 ປະຕູ
-
SIENG CHANTHEA ຈາກ ບຶກ ເກັດ ອັງກໍ ທີມລີກສູງສຸດຂອງ ກໍາປູເຈຍ ຍິງໄດ້ 9 ປະຕູ
-
REUNG BUNHEING ຈາກວິຊາກະ ທີມລີກສູງສຸດຂອງ ກໍາປູເຈຍ ຍິງໄດ້ 9 ປະຕູ
-
KEO SOKPHENG ຈາກວິຊາກະ ທີມລີກສູງສຸດຂອງ ກໍາປູເຈຍ ຍິງໄດ້ 9 ປະຕູ
-
PYEA MOE ຈາກ MAGWE ຈາກລີກສູງສຸດຂອງປະເທດມຽນມາ ຍິງໄດ້ 9 ປະຕູ
-
ອາລິສັກ ໄກສອນ ຈາກ ໄທພອສ ເອັຟຊີ ໃນລີກສູງສຸດຂອງປະເທດໄທ ຍິງໄດ້ 9 ປະຕູ
-
NARONG KAKADA ຈາກ TIFFY ARMY ໃນລີກສູງສຸດຂອງກໍາປູເຈຍ ຍິງໄດ້ 8 ປະຕູ
ໃນນັ້ນ, ຈະເຫັນໄດ້ ແກ້ວວຽງເພັດ ລິດທິເດດ ກາງກອງຊາວລາວປະສົບການສູງຂອງ ມາສເຕີ 7 ເອັຟຊີ ເປັນນັກດາວຍິງສູງສຸດອັນດັບ 2 ໃນລີກທົ່ວອາຊຽນ ເຊິ່ງ ແກ້ວວຽງເພັດ ລົງສະໜາມໄປ 12 ນັດ ຍິງໄດ້ 12 ປະຕູ ຊ່ວຍໃຫ້ ມາສເຕີ 7 ເອັຟຊີ ລົງສະໜາມ 12 ນັດຊະນະ 7, ສະເໝີ 4 ແລະ ເສຍ 1 ນັດ ມີ 25 ຄະແນນ ຄວ້າຮອງແຊັມລາວລີກ 1 ລະດູການ 2020 ຕາມຫຼັງແຊັມຢ່າງ ລາວໂຕໂຢຕ້າ ເອັຟຊີ 7 ຄະແນນ ແລະ ໜີຫ່າງອັນດັບ 3 ຊ້າງນ້ອຍ ເອັຟຊີ 8 ຄະແນນ; ແກ້ວວຽງເພັດ ຍັງຄວ້າດາວຍິງສູງສຸດຂອງ ສປປ ລາວ ເປັນ 2 ປີລຽນຕິດ ກໍຄື 2019 ແລະ 2020.
ແກ້ວວຽງເພັດ ເກີດໃນວັນທີ 30 ພະຈິກ 1992 ທີ່ບ້ານແກ້ວສໍາພັນ ເມືອງປາກເຊ ແຂວງຈໍາປາສັກ ຮຽນຈົບ ມ 6 ທີ່ ມ.ສ ສາທິດ ເມື່ອປີ 2009 ເລີ່ມຕົ້ນເປັນນັກເຕະເຍົາວະຊົນຂອງ ເອັສຣາ ເອັຟຊີ ກ່ອນກ້າວຂຶ້ນໄປຫຼິ້ນໃນຊຸດໃຫຍ່, 2015 ຫຼິ້ນໃຫ້ ເຮັສເອັສບີ ວຽງຈັນ ເອັຟຊີ, 2016 ຫຼິ້ນໃຫ້ ລ້ານຊ້າງ ຢູໄນເຕັດ ແລະ 2017 ຫຼິ້ນໃຫ້ ວຽງຈັນ ຢູໄນຕັດ ແລະ 2018 ຫຼິ້ນໃຫ້ກັບ ລາວໂຕໂຢຕ້າ ເອັຟຊີ ກັບ ມາສເຕີ 7 ເອັຟຊີ ຈົນເຖິງປີ 2020, ສ່ວນຜົນງານໃນທີມຊາດຕິດ ຢູ 14, 17, 19, 23 ແລະ ຊຸດໃຫຍ່ ໂດຍສະເພາະປີ 2010 ຕິດທີມຊາດລາວຊຸດໃຫຍ່ ແລະ ໄປແຂ່ງຂັນລາຍການ AFF SUZUKI 2012 ຄວ້າລາງວັນນັກເຕະດາວເດັ່ນຂອງອາຊຽນ.