ອຸດົມໄຊເຂັ້ມງວດ ຈັດການສວນຝິ່ນ ຕົ້ນເດືອນນີ້ທໍາລາຍຖິ້ມແລ້ວ 31ກວ່າເຮັກຕາ - Laoedaily

ອຸດົມໄຊເຂັ້ມງວດ ຈັດການສວນຝິ່ນ ຕົ້ນເດືອນນີ້ທໍາລາຍຖິ້ມແລ້ວ 31ກວ່າເຮັກຕາ

ໃນຕົ້ນເດືອນກຸມພາ ທີ່ຜ່ານມາ, ເຈົ້າໜ້າທີ່ຕຳຫຼວດ ແຂວງອຸດົມໄຊ ສົມທົບກັບຂະແໜງການທີ່ກ່ຽວຂ້ອງ ໄດ້ລົງສຳຫຼວດພື້ນທີ່ລັກລອບປູກຝິ່ນທີ່ເມືອງໄຊ ແຂວງອຸດົມໄຊ ພົບເນື້ອທີ່ລວມ 31 ກວ່າເຮັກຕາ ແລະ ໄດ້ທໍາລາຍຖິ້ມເປັນທີ່ຮຽບຮ້ອຍ.

ເຈົ້າໜ້າທີ່ ປກສ ແຂວງອຸດົມໄຊ ເປີດເຜີຍວ່າ: ໃນການສະກັດກັ້ນການລັກລອບປູກຝິ່ນ, ເຈົ້າໜ້າທີ່ພາກສ່ວນທີ່ກ່ຽວຂ້ອງໄດ້ສຸມໃສ່ໂຄສະນາໃຫ້ພໍ່-ແມ່ປະຊາຊົນເຂົ້າໃຈກ່ຽວກັນການລັກລອບປູກຝິ່ນ ເນື່ອງຈາກວ່າເປັນການກະທຳຜິດຕໍ່ລະບຽບກົດໝາຍ. ພ້ອມທັງສຸມໃສ່ກວດກາພື້ນທີ່ຕ່າງໆ.

ໃນນີ້, ຢູ່ເຂດເມືອງໄຊ ແຂວງອຸດົມໄຊ ພົບເຫັນການລັກລອບປູກຝິ່ນຂອງພໍ່-ແມ່ປະຊາຊົນຢູ່ 4 ເຂດ ຄື: ເຂດຫົວນໍ້າບາກ ມີບ້ານແສນສຸວັນ, ບ້ານຫົວນໍ້າບາກ ແລະ ບ້ານແສນລາດ ມີ 9 ຄອບຄົວ, ເຂດຫົວນໍ້າງາ ມີບ້ານຢ້າວໃຫຍ່ ແລະ ບ້ານລາວວ້າ ມີ 27 ຄອບຄົວ; ເຂດນາຮ້ວງມີບ້ານຫ້ວຍໝອກ ແລະ ບ້ານວັງຍານ ມີ 4 ຄອບຄົວ ແລະ ເຂດບ້ານນາງາມ ມີ 2 ຄອບຄົວ ລວມເນື້ອທີ່ລັກລອບປູກຝິ່ນທັງໝົດ 43 ຕອນ ຈໍານວນ 31,68 ເຮັກຕາ.

ການລົງທໍາລາຍເນື້ອທີ່ສວນຝິ່ນໃນຄັ້ງນີ້ ແມ່ນທໍາລາຍດ້ວຍການຖາງ, ຫຼົກຕົ້ນອ່ອນຖິ້ມ, ໃຊ້ໄມ້ຟາດຕົ້ນຝິ່ນທີ່ພວມອອກດອກ ແລະ ເປັນໝາກ ບໍ່ໃຫ້ເຈົ້າຂອງສວນສາມາດເກັບກູ້ນໍ້າຢາງຝິ່ນ ແລະ ນໍາເອົາແນວພັນຝິ່ນໄປປູກໄດ້. ພ້ອມທັງສ້າງບົດບັນທຶກກັບອໍານາດການປົກຄອງ ແລະ ພໍ່ແມ່ປະຊາຊົນທີ່ມີການລັກລອບປູກຝິ່ນຢູ່ໃນຈຳນວນບ້ານດັ່ງກ່າວເພື່ອບໍ່ໃຫ້ມີການເຄື່ອນໄຫວລັກລອບປູກຝິ່ນຄືນໃໝ່.

ທັ້ງນີ້, ຈຸດປະສົງໃນການທໍາລາຍສວນຝິ່ນນັ້ນ ກໍ່ເພື່ອເຮັດໃຫ້ສັງຄົມມີຄວາມສະຫງົບ-ປອດໄພໂດຍພື້ນຖານ, ໃຫ້ປະຊາຊົນບັນດາເຜົ່າເຂົ້າໃຈຕໍ່ແນວທາງປ່ຽນແປງໃໝ່ຂອງພັກ, ລະບຽບກົດໝາຍຂອງລັດ, ຢຸດຕິການປູກຝິ່ນຫັນມາປູກຝັງລ້ຽງສັດໃຫ້ກາຍເປັນສິນຄ້າ, ຮັບປະກັນໃຫ້ຄອບຄົວຫຼຸດພົ້ນອອກຈາກຄວາມທຸກຍາກເທື່ອລະກ້າວ.

ຂໍ້ມູນຈາກ: ປກສ ແຂວງອຸດົມໄຊ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ