ຮອງນາຍົກ ຮຽກຮ້ອງໃຫ້ ຍົກສູງຄວາມຮັບຜິດຊອບ ວຽກງານດ້ານໂພຊະນາການ - Lanxang Media SOLE CO.,LTD

ຮອງນາຍົກ ຮຽກຮ້ອງໃຫ້ ຍົກສູງຄວາມຮັບຜິດຊອບ ວຽກງານດ້ານໂພຊະນາການ

ຮອງນາຍົກ ຮຽກຮ້ອງໃຫ້ສືບຕໍ່ຍົກສູງຄວາມຮັບຜິດຊອບ ແລະ ເອົາໃຈໃສ່ 8 ໜ້າວຽກສຳຄັນ ໃນວຽກງານໂພຊະນາການ, ແຕ່ລະຂະແໜງການ ແລະ ແຕ່ລະແຂວງຕ້ອງເອົາໃຈໃສ່ຢ່າງຈິງຈັງໃນການແກ້ໄຂບັນຫາໂພຊະນາການໂດຍກຳນົດຄອບຄົວ, ບ້ານ, ເມືອງ ທີ່ເປັນບຸລິມະສິດໃນການແກ້ໄຂຢ່າງມີຈຸດສຸມຮ່ວມກັນກັບຫຼາຍພາກສ່ວນ.

ກອງປະຊຸມແຫ່ງຊາດດ້ານໂພຊະນາການ ຄັ້ງທີ 6 ແລະ ກອງປະຊຸມຄະນະກຳມະການແຫ່ງຊາດ ດ້ານໂພຊະນາການປະຈຳປີ 2020 ( ໂພຊະນາການທີ່ດີເພື່ອທຸກຄົນ ) ໄດ້ປິດລົງດ້ວຍຜົນສຳເລັດ ໃນວັນທີ 12 ກຸມພາຜ່ານມາ ໂດຍການເຂົ້າຮ່ວມຂອງ ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ປະທານຄະນະກຳມະການແຫ່ງຊາດດ້ານໂພຊະນາການ, ລັດຖະມົນຕີ ກະຊວງແຜນການ ແລະ ການລົງທຶນ; ທ່ານ ຮສ. ດຣ. ບຸນກອງ ສີຫາວົງ ລັດຖະມົນຕີ ກະຊວງສາທາລະນະສຸກ, ຮອງປະທານຄະນະກໍາມະການແຫ່ງຊາດດ້ານໂພຊະນາການ; ທ່ານ H.E. ອີນາ ມາຊິນູຣິເຕ ເອກອັກຄະລັດຖະທູດ ຜູ້ມີອຳນາດເຕັມຂອງສະຫະພາບເອີຣົບ ປະຈຳ ສປປ ລາວ; ທ່ານ ປີເຕີ ເຮມ໋ອນ ເອກອັກຄະລັດຖະທູດສະຫະລັດອະເມຣິກາ ປະຈຳ ສປປ ລາວ ; ທ່ານ ດຣ ເປຍ ເລເບວໂລ ຜູ້ຕາງໜ້າອົງການ ອຸຍນີເຊັບ, ບັນດາທ່ານຫົວໜ້າທະນາຄານໂລກ, ຜູ້ຕາງໜ້າອົງການຈັດຕັ້ງສາກົນ ຄູ່ຮ່ວມພັດທະນາອົງການຈັດຕັ້ງສັງຄົມພາກທຸລະກິດເອກະຊົນ ແລະ ພາກສ່ວນກ່ຽວຂ້ອງເຂົ້າຮ່ວມ.

อาจเป็นรูปภาพของ 5 คน, ผู้คนกำลังยืน และชุดสูท

ທ່ານ ຮສ. ດຣ. ບຸນກອງ ສີຫາວົງ ກ່າວວ່າ: ຜ່ານການປະຕິບັດວຽກງານດ້ານໂພຊະນາກອນ ໃນປີ 2020 ຜ່ານມາ ເຖິງວ່າຈະມີຜົນສໍາເລັດຫຼາຍດ້ານ ແຕ່ກໍຍັງພົບບາງຂໍ້ຄົງຄ້າງ ແລະ ສິ່ງທ້າທາຍ ເຊັ່ນ: ໂຄວິດ – 19 ໄດ້ກະທົບ ເຮັດໃຫ້ບາງຕົວຊີ້ວັດບໍ່ບັນລຸ, ການເຊື່ອມສານ ແລະ ປະສານງານດ້ານໂພຊະນາການຂະແໜງສຶກສາ, ກະສິກຳ ແລະ ສາທາລະນະສຸກຢູ່ຂັ້ນສູນກາງ, ແຂວງ, ເມືອງ ແລະ ບ້ານຍັງເຮັດບໍ່ໄດ້ດີເທົ່າທີ່ຄວນ, ບໍ່ສາມາດສັງລວມຕີລາຄາການຂາດອາຫານແຕ່ລະປະເພດໃນເດັກຕໍ່າກວ່າ 5 ປີໄດ້, ບາງໂຮງຮຽນບໍ່ມີນໍ້າໃຊ້ພຽງພໍໃນການປຸງແຕ່ງອາຫານ, ການປະຕິບັດວຽກງານສຸຂະນາໄມ, ການນໍາໃຊ້ຫ້ອງນໍ້າ, ການສະໜອງນໍ້າ ແລະ ວິດຖ່າຍຢູ່ບັນດາໂຮງຮຽນສ່ວນຫຼາຍຍັງບໍ່ພຽງພໍ, ການແຈກຢາຍຢາທາດເຫຼັກ ແລະ ຢາຂ້າແມ່ທ້ອງລະຫວ່າງຂະແໜງສຶກສາ ແລະ ສາທາລະນະສຸກ ຍັງບໍ່ທັນສອດຄ່ອງເທົ່າທີ່ຄວນ, ງົບປະມານຈັດກິດຈະກຳຕ່າງໆແມ່ນຍັງບໍ່ພຽງພໍ ແລະ ບັນຫາອື່ນໆອີກ.

อาจเป็นรูปภาพของ 4 คน, ผู้คนกำลังยืน และสถานที่ในร่ม

ທ່ານ ສອນໄຊ ສີພັນດອນ ໄດ້ກ່າວບາງຕອນໃນກອງປະຊຸມວ່າ: “ ການລົງທຶນໃສ່ດ້ານໂພຊະນາການມີຈຸດປະສົງ ເພື່ອພັດທະນາຊັບພະຍາກອນມະນຸດໃຫ້ມີຄຸນນະພາບ ”. ໃນ ສປປ ລາວ ເຖິງຈະແກ້ໄຂບັນຫາດ້ານໂພຊະນາການໄດ້ໃນລະດັບໃດໜຶ່ງ ແຕ່ໃນປັດຈຸບັນກໍຍັງມີຍັງມີເດັກນ້ອຍ 1 ໃນ 3 ຄົນ ຫຼື ຈໍານວນເກືອບ 3 ແສນຄົນ ທີ່ຈະເປັນອະນາຄົດຂອງຊາດ ຍັງສ່ຽງຕໍ່ການຂາດສານອາຫານ ເຊິ່ງຈະມີຜົນກະທົບຕໍ່ການພັດທະນາການດ້ານຮ່າງກາຍ ແລະ ມັນສະໝອງ ພ້ອມພົບວ່າເກີດບັນຫາໂພຊະນາການເກີນ ແລະ ຕຸ້ຍ ທັງໃນເດັກ ແລະ ຜູ້ໃຫຍ່ເພີ່ມຂຶ້ນ ເຊິ່ງພົວພັນມາຈາກພຶດຕິກຳໃນການບໍລິໂພກອາຫານທີ່ບໍ່ຖືກຫຼັກໂພຊະນາການ ເປັນເຫດໃຫ້ມີຜົນກະທົບຕໍ່ສຸຂະພາບ, ເສດຖະກິດ ແລະ ສັງຄົມ.

ທ່ານກ່າວຕື່ມວ່າ: ເພື່ອຜັນຂະຫຍາຍເນື້ອໃນຈິດໃຈຂອງກອງປະຊຸມຄັ້ງນີ້ໃຫ້ປາກົດເປັນຈິງ, ໃນນາມປະທານກອງປະຊຸມ ແລະ ປະທານຄະນະກຳມະການແຫ່ງຊາດດ້ານໂພຊະນາການ, ຂ້າພະເຈົ້າຂໍຮຽກຮ້ອງມາຍັງບັນດາທ່ານຄະນະກຳມະການແຫ່ງຊາດດ້ານໂພຊະນາການບັນດາກະຊວງ – ອົງການ ແລະ ກອງເລຂາຄະນະກຳມະການໂພຊະນາການ ຈົ່ງໄດ້ສືບຕໍ່ຍົກສູງຄວາມຮັບຜິດຊອບ ແລະ ເອົາໃຈໃສ່ໃນການຊີ້ນຳ – ນຳພາການຈັດຕັ້ງປະຕິບັດບາງວຽກງານທີ່ສຳຄັນ ດັ່ງນີ້:

  1. ໃຫ້ກອງເລຂາຂັ້ນສູນກາງຜັນຂະຫຍາຍຜົນກອງປະຊຸມໃນຄັ້ງນີ້ເຂົ້າໃນການສ້າງແຜນປະຕິບັດງານໂພຊະນາການ 2021 – 2025 ໃຫ້ສຳເລັດ ແລະ ໃຫ້ບັນດາຂະແໜງການ, ແຂວງ ເຊື່ອມສານເຂົ້າໃນແຜນພັດທະນາ 5 ປີ ຄັ້ງທີ IX ແລະ ແຜນປະຈຳປີ ພ້ອມທັງກຳນົດບຸລິມະສິດສຳຄັນຂອງໂຄງການກິດຈະກຳໃຫ້ສອດຄ່ອງກັບສະພາບຄວາມເປັນຈິງ.

  2. ຄະນະກຳມະການໂພຊະນາການຂັ້ນສູນກາງ ແລະ ທ້ອງຖິ່ນໃນຂອບເຂດທົ່ວປະເທດ ແລະ ທຸກຂະແໜງການເອົາໃຈໃສ່ຢ່າງຕັ້ງໜ້າໃນການສືບຕໍ່ຊີ້ນຳ – ນຳພາວຽກງານຂອງຕົນໃຫ້ມີການປະສານງານກັນຢ່າງກົມກຽວ ພາຍໃນຂະແໜງການລະຫວ່າງຂະແໜງການນັບແຕ່ຂັ້ນສູນກາງລົງຮອດທ້ອງຖິ່ນ ພ້ອມທັງປະສານງານກັບຄູ່ຮ່ວມພັດທະນາຢ່າງມີປະສິດທິພາບ.

  3. ໃຫ້ແຕ່ລະຂະແໜງການ ແລະ ແຕ່ລະແຂວງ ເອົາໃຈໃສ່ຢ່າງຈິງຈັງໃນການແກ້ໄຂບັນຫາໂພຊະນາການໂດຍກຳນົດຄອບຄົວ, ບ້ານ, ເມືອງ ທີ່ເປັນບຸລິມະສິດໃນການແກ້ໄຂຢ່າງມີຈຸດສຸມຮ່ວມກັນກັບຫຼາຍພາກສ່ວນ.

  4. ແຕ່ລະພາກສ່ວນຈັດສັນງົບປະມານທຶນໄປຕາມບຸລິມະສິດ ລວມທັງງົບປະມານຂອງລັດຖະບານ ແລະ ຄຸ້ມຄອງການນຳໃຊ້ງົບປະມານຊ່ວຍເຫຼືອລ້າ ແລະ ທຶນກູ້ຢືມຈາກສາກົນ ໃຫ້ມີປະສິດທິພາບໃຫ້ເກີດປະໂຫຍດສູງສຸດບັນລຸຄາດໝາຍໂພຊະນາການໃນປີ 2021 ແລະ ປີຕໍ່ໄປ.

  5. ແຕ່ລະຂະແໜງການທັງສູນກາງ ແລະ ທ້ອງຖິ່ນຜັນຂະຫຍາຍການຈັດຕັ້ງປະຕິບັດດຳລັດຄວບຄຸມຜະລິດຕະພັນອາຫານເດັກອ່ອນ ແລະ ເດັກນ້ອຍໃຫ້ທົ່ວເຖິງ ພ້ອມທັງມີລະບົບຕິດຕາມປະເມີນຜົນລາຍງານເປັນແຕ່ລະໄລຍະ.

  6. ໃຫ້ພາກສ່ວນກ່ຽວຂ້ອງທັງສູນກາງ ແລະ ທ້ອງຖິ່ນຈັດຕັ້ງປະຕິບັດມາດຕະການທີ່ຮັບປະກັນໃຫ້ຄົວເຮືອນມີການຜະລິດສະບຽງອາຫານທີ່ໝັ້ນຄົງ ຄ້ຳປະກັນໃຫ້ຄອບຄົວແມ່ຍິງ ແລະ ເດັກນ້ອຍໃນກຸ່ມເປົ້າໝາຍໄດ້ມີອາຫານບໍລິໂພກທີ່ຫຼາກຫຼາຍ ແລະ ພຽງພໍດີຂຶ້ນກວ່າເກົ່າ.

อาจเป็นรูปภาพของ 38 คน, ผู้คนกำลังนั่ง, ชุดสูท และข้อความ

  1. ມອບໃຫ້ຄະນະກຳມະການໂພຊະນາການບັນດາຂະແໜງການ ແລະ ອົງການຈັດຕັ້ງມະຫາຊົນ ຈົ່ງໄດ້ສືບຕໍ່ນຳພາ, ຊຸກຍູ້, ສົ່ງເສີມ, ໂຄສະນາ ແລະ ໃຫ້ຄວາມຮູ້ແກ່ປະຊາຊົນໃຫ້ທົ່ວເຖິງໃນການບໍລິໂພກອາຫານຖືກຫຼັກໂພຊະນາການທີ່ຫຼາກຫຼາຍ, ສົມສ່ວນ, ເໝາະສົມ ແລະ ພຽງພໍ ພ້ອມທັງປຸກລະດົມຂົນຂວາຍຊຸມຊົນເປັນເຈົ້າການໃນການແກ້ໄຂບັນຫາໂພຊະນາການ ແລະ ຄ້ຳປະກັນສະບຽງອາຫານ ເພື່ອໃຫ້ເກີດຄວາມຍືນຍົງ.

  2. ມອບໃຫ້ກອງເລຂາແຕ່ລະຂັ້ນຕິດຕາມ, ປະເມີນຜົນ, ເກັບກຳຂໍ້ມູນສັງລວມລາຍງານການຈັດຕັ້ງປະຕິບັດໃຫ້ຄະນະກຳມະການໂພຊະນາການແຕ່ລະຂັ້ນຢ່າງເປັນລະບົບຕໍ່ເນື່ອງ.

ໃນໂອກາດດຽວກັນ, ທ່ານ ສອນໄຊ ພ້ອມດ້ວຍຄະນະ ທີ່ເຂົ້າຮ່ວມກອງປະຊຸມ ກໍໄດ້ຍ່າງຊົມຮ້ານວາງສະແດງສິນຄ້າກະສິກຳ ແລະ ຂໍ້ມູນ – ຂ່າວສານຈາກອົງການຈັດຕັ້ງຕ່າງໆ.