“ ຟາມພູຕາເວັນ ” ສວນດອກໄມ້ທີ່ໃຜໆກໍຢາກໄປສໍາຜັດ - Laoedaily

“ ຟາມພູຕາເວັນ ” ສວນດອກໄມ້ທີ່ໃຜໆກໍຢາກໄປສໍາຜັດ

ລະດູໜາວແຕ່ລະປີດອກຕາເວັນຈະບານງາມເປັນພິເສດ ໂດຍສະເພາະໃນຍາມເຊົ້າຕາເວັນກໍາລັງໂພ່ຂຶ້ນ ແລະ ຍາມແລງແສງຕາເວັນໃກ້ລັບຂອບຟ້າ ນັບວ່າເປັນບັນຍາກາດອັນເໝາະສົມທີ່ສຸດກັບການເກັບບັນທຶກພາບເປັນທີ່ລະນຶກໃຫ້ກັບຕົນເອງ ເພື່ອໄວ້ເບິ່ງໃນວັນຂ້າງໜ້າ.

ສະຖານທີ່ທີ່ວ່ານີ້ຢູ່ບໍ່ໄກຈາກຕົວເມືອງນະຄອນຫຼວງ ວຽງຈັນ ແລະ ເທສະບານ ແຂວງບໍລິຄໍາໄຊ ສາມາດໄປນອນຄ້າງຄືນໄດ້ ເຊິ່ງຈະໄປແບບຄູ່ຮັກ ຫຼື ພາຄອບຄົວໄປກໍດີ ຫາກບໍ່ສະດວກນອນຄ້າງຄືນກໍໄປທ່ຽວໄດ້ພາຍໃນ 1 ມື້, ມີສະຖານທີ່ພັກຜ່ອນ, ມີການບໍລິການອາຫານແຊບໆ ແລະ ເຄື່ອງດື່ມເຢັນໆຫຼາຍລາຍການໃຫ້ເລືອກຕາມໃຈມັກ ເຊິ່ງສະຖານທີ່ແຫ່ງນີ້ມີການປະດິດຕົກແຕ່ງດ້ວຍດອກໄມ້ນາໆຊະນິດທີ່ສວຍງາມ ພ້ອມດ້ວຍພືດພັນທັນຍາຫານຫຼາຍຢ່າງທີ່ປູກໄວ້ ຈຸດເດັ່ນຂອງສະຖານທີ່ທ່ອງທ່ຽວແຫ່ງນີ້ ກໍຄືດອກຕາເວັນທີ່ເຫຼືອງອ່າມງາມຕາໃຫ້ທ່ານໄດ້ຊື່ນຊົມສົມກັບຊື່ທີ່ວ່າ: “ ຟາມພູຕາເວັນ ”.

อาจเป็นรูปภาพของ ดอกไม้ และธรรมชาติ

“ ຟາມພູຕາເວັນ ” ເປັນແຫຼ່ງທີ່ຮວບຮວມດອກໄມ້ນາໆຊະນິດທີ່ສວຍງາມໃຫ້ຜູ້ທີ່ເຂົ້າໄປທ່ຽວໄດ້ຊົມ ແລະ ຖ່າຍຮູບຄວາມງາມຂອງສະຖານທີ່ແຫ່ງນີ້ ສ່ວນເສັ້ນທາງທີ່ຈະເດີນທາງໄປສະຖານທີ່ທ່ອງທ່ຽວແຫ່ງນີ້ ທ່ານສາມາດເດີນທາງໄປຕາມເສັ້ນທາງເລກທີ 13 ໃຕ້ ຮອດບໍລິເວນແດນຕໍ່ລະຫວ່າງນະຄອນຫຼວງວຽງຈັນ ( ເມືອງປາກງື່ມ ) ກັບ ແຂວງບໍລິຄໍາໄຊ ຈະມີປ້າຍຊີ້ບອກເບື້ອງຂວາມື ( ໄປຈາກນະຄອນຫຼວງວຽງຈັນ ) ໂດຍໃຊ້ເວລາໃນການເດີນທາງຈາກນະຄອນຫຼວງວຽງຈັນ ( ຂັບຂີ່ລົດສ່ວນຕົວ ) ພຽງແຕ່ຊົ່ວໂມງປາຍກໍເຖິງຟາມພູຕາເວັນ.

อาจเป็นรูปภาพของ ดอกไม้ และกลางแจ้ง

ໃຜທີ່ບໍ່ທັນເຄີຍໄປ ຟາມພູຕາເວັນ ກໍຈະຕື່ນຕາຕື່ນໃຈກັບຄວາມງົດງາມ ແລະ ຊີວະນາໆພັນໃນພື້ນທີ່ທ່ອງທ່ຽວແຫ່ງນີ້ ໂດຍສະເພາະດອກຕາເວັນ ແລະ ກໍຍັງມີກິດຈະກໍາຕ່າງໆໃນແຕ່ລະໄລຍະທີ່ເພິ່ນຈັດຂຶ້ນ, ດ້ວຍຄວາມແຕກຕ່າງຂອງທີ່ນີ້ຜ່ານມາໃຜທີ່ໄປຮອດແລ້ວກໍຈະບໍ່ພາດທີ່ຈະບັນທຶກພາບຂອງຕົນເອງ ແລະ ສະຖານທີ່ເພື່ອເປັນທີ່ລະນຶກ ແລະ ສົ່ງໃຫ້ໝູ່ໄດ້ຄິດອິດສາ.

ດ້ວຍສະຖານທີ່ຕັ້ງຢູ່ໃນພື້ນທີ່ຫຸ້ມລ້ອມດ້ວຍປ່າໄມ້ ເຮັດໃຫ້ພູມອາກາດໃນຍາມເຊົ້າ ແລະ ຍາມແລງຂອງທີ່ນີ້ຂ້ອນຂ້າງເຢັນແຕກຕ່າງຈາກບ່ອນອື່ນ ຈຶ່ງຂໍແນະນໍາໃຫ້ເອົາເສື້ອຄຸມຕິດລົດໄປພ້ອມ ເພື່ອຮັບມືກັບສະພາບອາກາດດັ່ງກ່າວ.

อาจเป็นรูปภาพของ ดอกไม้ และธรรมชาติ

ຮູ້ແນວນີ້ແລ້ວຫຼາຍຄົນອາດສົນໃຈວ່າຈະໄປໄລຍະໃດຈຶ່ງງາມເປັນພິເສດ?

ບອກໄດ້ເລີຍວ່າ: ໄປແຕ່ເຊົ້າໆໃນວັນເສົາ ຫຼື ອາທິດ ເພື່ອມີເວລາດື່ມດໍ່າກັບທໍາມະຊາດໄດ້ເຕັມມື້ໄປເລີຍ ແລະ ຈະເປັນການດີທີ່ສຸດ ຫາກທ່ານໄປໄລຍະເດືອນກຸມພາ ເພາະໄລຍະນີ້ດອກໄມ້ກຳລັງເບັ່ງບານສວຍງາມໃຫ້ທ່ານໄດ້ເຫັນ ແລະ ສຳຜັດຄວາມງາມແບບທຳມະຊາດກັນຢ່າງແນ່ນອນ.

อาจเป็นรูปภาพของ กลางแจ้ง

ຄວາມຈິງແລ້ວໄລຍະທີ່ດອກໄມ້ເບັ່ງບານສວຍງາມແມ່ນເລີ່ມມີແຕ່ເດືອນພະຈິກ – ມີນາ ສ່ວນດອກຕາເວັນທີ່ບານຫຼາຍແມ່ນຈະຢູ່ໄລຍະເດືອນກຸມພາ ແລະ ດອກຕາເວັນຈະມີເວລາເບັ່ງບານພຽງແຕ່ 2 – 3 ອາທິດເທົ່ານັ້ນ.

ເມື່ອໄປຮອດສະຖານທີ່ແລ້ວກໍສາມາດຈອດລົດຕາມແຄມທາງໃກ້ທາງເຂົ້າ ຫຼື ໄປຈອດຢູ່ສະຖານທີ່ທີ່ເພິ່ນຈັດສັນໄວ້, ຈາກນັ້ນກໍຍ່າງເຂົ້າໄປດ້ານໃນເສຍຄ່າຜ່ານປະຕູເພື່ອເປັນເງິນບໍລິຫານໃຫ້ພະນັກງານເບິ່ງແຍງສະຖານທີ່; ຫາກບໍ່ເຄີຍໄປກໍສາມາດຖາມພະນັກງານ ເພື່ອຈະໄດ້ຮູ້ວ່າຄວນຈະໄປຈຸດໃດແດ່ພາຍໃນສວນ ເຊິ່ງໃນທີ່ນີ້ເພິ່ນກໍມີລົດບໍລິການໃຫ້ເຊົ່ານັບຈາກລົດຖີບຮອດລົດໃຫຍ່ ເພາະພື້ນທີ່ພາຍໃນແມ່ນກວ້າງຂວາງ ແລະ ແຕ່ລະຈຸດກໍມີຄວາມແຕກຕ່າງກັນ.

ວັນພັກຜ່ອນທ້າຍສັບປະດານີ້ ຫາກຍັງຄິດບໍ່ອອກວ່າຈະໄປໃສດີ ກໍເໝາະສົມທີ່ສຸດຫາກທ່ານພາຄົນຮັກ ຫຼື ຄົນໃນຄອບຄົວໄປພັກຜ່ອນຟາມພູຕາເວັນແຫ່ງນີ້ເສັ້ນທາງກໍສະດວກດີແຖມຍັງໄດ້ເພີ່ມພູນຄວາມສຸກໃຫ້ຫົວໃຈເປັນກໍາໄລໃຫ້ຊີວິດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ