ສຳນັກຂ່າວຕ່າງປະເທດລາຍງານວ່າ ທາງການຈີນໄດ້ປະກາດວ່າ ຈະຊ້ອມຮົບໃນທະເລຈີນໃຕ້ໃນລະຫວ່າງວັນທີ 27-30 ມັງກອນຈະເຖິງນີ້ ຈຶ່ງເຕືອນເຮືອ ໃຫ້ຫຼີກລຽງເຂົ້າໄປໃນພື້ນທີ່ອ່າວຕັງເກ໋ຍ ເຊິ່ງຕັ້ງຢູ່ທາງທິດຕາເວັນຕົກຂອງມະຫາສະໝຸດເຫຼີຍໂຈວ ທາງທິດຕາເວັນຕົກສຽງໃຕ້ຂອງຈີນ.
ທັງນີ້ ເມື່ອວັນຈັນຜ່ານມາ ຈີນໄດ້ຍື່ນໜັງສືຄັດຄ້ານສະຫະລັດອາເມຣິກາທີ່ມັກສົ່ງເຮືອບັນທຸກ ແລະ ເຮືອບິນເຂົ້າມາເຂດທະເລຈີນໃຕ້ ເຊິ່ງເປັນໜຶ່ງໃນເສັ້ນທາງສັນຈອນທາງທະເລທີ່ມີການຂົນສົ່ງສິນຄ້າທີ່ມີມູນຄ່າຫຼາຍລ້ານລ້ານໂດລາສະຫະລັດຕໍ່ປີ ໂດຍຈີນລະບຸວ່າ ການກະທຳຂອງອາເມຣິກາ ເປັນການສະແດງອຳນາດ ເຊິ່ງຈະບໍ່ໄດ້ຊ່ວຍໃຫ້ເກີດສັນຕິພາບ ແລະ ຄວາມໝັ້ນຄົງໃນຂົງເຂດ.
ກ່ອນໜ້ານີ້ ຂະບວນເຮືອບັນທຸກເຮືອບິນຂອງອາເມຣິກາ ນຳໂດຍກຳປັ່ນຢູເອສເອສທີໂອດໍຣ໌ ຣູສເວລຕ໌ ໄດ້ແລ່ນເຂົ້າໄປຍັງນ່ານນ້ຳທະເລຈີນໃຕ້ ໂດຍອ້າງວ່າ ເພື່ອສົ່ງເສີມເສລີພາບໃນການເດີນເຮືອ, ທັງນີ້ ເຂດທະເລຈີນໃຕ້ໄດ້ເປັນພື້ນທີ່ປະເຊີນໜ້າກັນລະຫວ່າງສະຫະລັດອາເມຣິກາ ກັບ ສປ ຈີນ ໂດຍອາເມຣິກາໄດ້ເພີ່ມການປະຕິບັດການທາງທະຫານເພີ່ມຂຶ້ນໃນໄລຍະຜ່ານມາ.
