ຂ່າວດີ! 26 ມັງກອນ ບໍ່ພົບຜູ້ຕິກເຊື້ອໂຄວິດ-19 ແຕ່ຮຽກຮ້ອງທຸກຄົນປະຕິບັດມາດຕະການໃຫ້ເຂັ້ມງວດ - Lanxang Media SOLE CO.,LTD

ຂ່າວດີ! 26 ມັງກອນ ບໍ່ພົບຜູ້ຕິກເຊື້ອໂຄວິດ-19 ແຕ່ຮຽກຮ້ອງທຸກຄົນປະຕິບັດມາດຕະການໃຫ້ເຂັ້ມງວດ

ວັນທີ 26 ມັງກອນ 2021 ສປປ ລາວ ບໍ່ມີຜູ້ຕິດເຊື້ອໂຄວິດ-19 ເພີ່ມ, ແຕ່ທຸກຄົນຕ້ອງສືບຕໍ່ປະຕິບັດມາດຕະການທີ່ຄະນະສະເພາະກິດວາງອອກໃຫ້ເຂັ້ມງວດ; ສ່ວນຜູ້ຕິດເຊື້ອກໍລະນີ 42,43 ແລະ 44 ແມ່ຍັງສືບຕໍ່ປິ່ນປົວຕິດຕາມອາການຢູ່ໂຮງໝໍ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ປະຈໍາວັນທີ 27 ມັງກອນ 2021 ວ່າ: ມາຮອດ 5 ໂມງແລງ ຂອງວັນທີ 26 ມັງກອນ 2021 ທົ່ວປະເທດມີຜູ້ເດີນທາງເຂົ້າມາ ມີທັງໝົດ 2.968 ຄົນ; ເຊິ່ງທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ ແລ້ວຈຶ່ງນຳສົ່ງໄປຫາສະຖານທີ່ ຈຳກັດບໍລິເວນທີ່ກຳນົດໄວ້ ຈົນກວ່າຈະຄົບກຳນົດ 14 ວັນ.

ດ້ານການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 26 ມັງກອນ 2021, ໄດ້ເກັບຕົວຢ່າງມາກວດວິເຄາະທັງໝົດ 315 ຄົນ, ໃນນັ້ນ ມີ 6 ຕົວຢ່າງ ຈາກບຸກຄົນທົ່ວໄປທີ່ມີອາການ, 87 ຕົວຢ່າງຈາກບຸກຄົນທົ່ວໄປບໍ່ມີອາການ; ແຮງງານລາວກັບມາແຕ່ໄທ 118 ຕົວຢ່າງ; 81 ຕົວຢ່າງຈາກແຮງງານໄທ, 6 ຕົວຢ່າງຈາກແຮງງານຫວຽດນາມ ແລະ 17 ຕົວຢ່າງຈາກແຮງງານຈີນ; ຜົນກວດວິເຄາະທັງໝົດ ແມ່ນບໍ່ພົບເຊື້ອ, ໝາຍຄວາມວ່າ ວັນທີ 26 ມັງກອນ 2021 ບໍ່ພົບຜູ້ຕິດເຊື້ອໃໝາສັງລວມການກວດວິເຄາະ ນັບແຕ່ ເດືອນມັງກອນ 2020 ຮອດ ວັນທີ 26 ມັງກອນ 2021 ໄດ້ເກັບຕົວຢ່າງມາກວດທັງໝົດ 102.332 ຕົວຢ່າງ, ກວດພົບເຊື້ອສະສົມ 44 ຄົນ. ສ່ວນການຕິດຕາມປີ່ນປົວຄົນເຈັບຢູ່ໂຮງໝໍ, ມາຮອດປະຈຸບັນ ຄົນເຈັບຕິດເຊື້ອພະຍາດ ໂຄວິດ-19 ຈຳນວນ 3 ຄົນ ແມ່ນສືບຕໍ່ນອນປິ່ນປົວຢູ່ໂຮງໝໍທີ່ຖືກກຳນົດໄວ້.

ທ່ານ ຮອງຫົວໜ້າກົມຄວບຄຸມພະຍາດຕິດຕໍ່ ກ່າວຕື່ມວ່າ: ສະພາບການລະບາດຂອງພະຍາດ ໂຄວິດ-19 ຍັງຄົງໜ້າເປັນຫ່ວງຫຼາຍ ບັນຫາສຳຄັນປະເທດເພື່ອນບ້ານຂອງພວກເຮົາ ມີລາຍງານຜູ້ຕິດເຊື້ອໃໝ່ ຫຼາຍຮ້ອຍຄົນພາຍໃນມື້ດຽວ ເຊິ່ງມີຄວາມສ່ຽງສູງ ທີ່ຜູ້ຕິດເຊື້ອ ຈະນຳເຊື້ອເຂົ້າມາແຜ່ລະບາດ ໃນບ້ານເຮົາ; ຕໍ່ກັບສະພາບການດັ່ງກ່າວ ຂໍຮຽກຮ້ອງໃຫ້ຜູ້ທີ່ເດີນທາງເຂົ້າມາ ສປປ ລາວ ໃຫ້ການຮ່ວມມື ໃນການຈຳກັດບໍລິເວນຕົນເອງ ຈົນຄົບກຳນົດ 14 ວັນ ພ້ອມທັງ ປະຕິບັດຕາມຄຳແນະນຳຂອງຄະນະສະເພາະກິດວາງອອກຢ່າງເຄັ່ງຄັດ.

ແນວໃດກໍ່ຕາມ ຂໍຮຽກຮ້ອງໃຫ້ທຸກພາກສ່ວນໃນສັງຄົມ ຍົກສູງຄວາມຮັບຜິດຊອບ ສືບຕໍ່ຮ່ວມໃຈ
ກັນປະຕິບັດ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ແລະ ຄຳແນະນຳຂອງຂະແໜງການກ່ຽວຂ້ອງ ຢ່າງເຂັ້ມງວດ.