ເປີດໂຕນໍ້າຫອມດອກຈໍາປາ ແລະ ໂຊກດີ ຜະລິດຕະພັນຂອງລາວ - Lanxang Media SOLE CO.,LTD

ເປີດໂຕນໍ້າຫອມດອກຈໍາປາ ແລະ ໂຊກດີ ຜະລິດຕະພັນຂອງລາວ

ກຸ່ມບໍລິສັດ HSMM Fragrnce ໄດ້ຈັດພິທີເປີດໂຕນໍ້າຫອມດອກຈໍາປາ ແລະ ໂຊກດີ ທີ່ເປັນຜະລິດຕະພັນລາວຂຶ້ນຢ່າງເປັນທາງການ ທີ່ສູນການຄ້າພາກຊັນ ນະຄອນຫຼວງວຽງຈັນ ເພື່ອໃຫ້ເປັນທາງເລືອກຂອງປະຊາຊົນໃນການຊົມໃຊ້ຜະລິດຕະພັນຂອງລາວ.

ພິທີເປີດໂຕຈັດຂຶ້ນວັນທີ 16 ມັງກອນ 2021 ທີ່ສູນການຄ້າພາກຊັນ ເຂົ້າຮ່ວມຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີ ກະຊວງຖະແຫຼງຂ່າວ ວັດທະນະທໍາ ແລະ ທ່ອງທ່ຽວ, ມີບັນດາທ່ານຮອງລັດຖະມົນຕີ, ຫົວໜ້າກົມ, ພາກທຸລະກິດ ແລະ ສື່ມວນຊົນເຂົ້າຮ່ວມ.

ທ່ານ ສຸກທະວີ ໂຈວດຸຣີ ຮອງປະທານ ກຸ່ມບໍລິສັດ HSMM ກຣຸບ ກ່າວວ່າ: ນໍ້າຫອມ ດອກຈໍາປາ ແລະ ໂຊກດີ ເປັນນໍ້າຫອມທີ່ຜະລິດຈາກໄມ້ເກດສະໜາ ຊື່ດອກຈໍາປາ ແລະ ໂຊກດີ ເຊິ່ງກຸ່ມບໍລິສັດ HSMM ໄດ້ບຸກເບີກດໍາເນີນທຸລະກິດປູກໄມ້ເກດສະໜາໃນອາຊີຕາເວັນອອກສ່ຽງໃຕ້ ເປັນເວລາກວ່າສອງທົດສະວັດ ໂດຍມີສວນປູກ ແລະ ໂຮງງານຂຸດຄົ້ນນໍ້າມັນຈາກໄມ້ເກດສະໜາເປັນຂອງຕົນເອງ ເຊິ່ງ HSMM Fragrnce ໄດ້ສ້າງຕັ້ງຂຶ້ນໃນປີ 2014 ເຊິ່ງເປັນແຫ່ງທໍາອິດທີ່ຜະລິດນໍ້າຫອມໃນປະເທດລາວ ແລະ ໃນປີ 2021 ກໍໄດ້ເປີດໂຕນໍ້າຫອມດອກຈໍາປາ ແລະ ໂຊກດີ ລວມທັງເປີດຫ້ອງຈໍາໜ່າຍໃນສູນການຄ້າພາກຊັນ.

ທ່ານ ສຸກທະວີ ໂຈວດຸຣີ ກ່າວອີກວ່າ: ຈຸດປະສົງໃນການດໍາເນີນທຸລະກິດດ້ານນີ້ຢູ່ປະເທດລາວ ຍ້ອນວ່າຕົນເອງເປັນຄົນສັນຊາດລາວ ເຊື້ອຊາດອິນເດຍ ເຊິ່ງໄດ້ຍ້າຍມາຢູ່ ສປປລາວ ພ້ອມຄອບຄົວ ນັບແຕ່ປີ 2000 ປີນີ້ຄົບ 21ປີ ຍ້ອນມັກຮັກວິຖີການດໍາລົງຊີວິດແບບຄົນລາວ ທີ່ມີຄວາມໂອບເອື້ອອາລີ ເຮັດໃຫ້ຮູ້ສຶກປອດໄພ ແລະ ໄດ້ຮັບການຊ່ວຍເຫຼືອ ອໍານວຍຄວາມສະດວກໃນການດໍາເນີນທຸລະກິດຈາກລັດຖະບານ.