ພາສີແຂວງເຊກອງ ເກັບລາຍຮັບໄດ້ລື່ນແຜນ - Laoedaily

ພາສີແຂວງເຊກອງ ເກັບລາຍຮັບໄດ້ລື່ນແຜນ

ໃນປີ 2020 ຜ່ານມາ ກອງກວດກາພາສີປະຈໍາແຂວງເຊກອງ ເຂັ້ມງວດຕໍ່ການຈັດຕັ້ງປະຕິບັດວຽກງານວິຊາສະເພາະຂອງຕົນ ເປັນຕົ້ນແມ່ນການຕ້ານ ແລະ ສະກັດກັ້ນການລັກລອບສິນຄ້າໜີພາສີ, ຕິດຕາມກວດກາການນໍາເຂົ້າ – ສົ່ງອອກສິນຄ້າ, ເຄື່ອງຂອງພາຍໃນດ່ານ – ນອກດ່ານ ແລະ ການແກ້ໄຂບັນຫາລົດນໍາເຂົ້າບໍ່ຖືກຕ້ອງ ( ລົດເຖື່ອນ ), ສ່ວນການເກັບລາຍຮັບເຂົ້າງົບປະມານແມ່ນປະຕິບັດໄດ້ລື່ນແຜນ.

ທ່ານ ແກ້ວອໍາພອນ ແສງນວນຈັນ ຮັກສາການຫົວໜ້າກອງກວດກາພາສີປະຈໍາແຂວງເຊກອງ ໃຫ້ສໍາພາດຕໍ່ນັກຂ່າວເມື່ອບໍ່ດົນນີ້ວ່າ: ກອງກວດກາພາສີປະຈໍາແຂວງເຊກອງ ແມ່ນກົງຈັກການຈັດຕັ້ງໜຶ່ງທີ່ຂຶ້ນກັບກອງຄຸ້ມຄອງພາສີ VII ກົມພາສີກະຊວງການເງິນ, ປະກອບມີ 1 ໜ່ວຍງານ, 1 ດ່ານທ້ອງຖິ່ນ ແລະ 3 ດ່ານປະເພນີ, ມີພະນັກງານສົມບູນ ທັງໝົດ 14 ສະຫາຍ ແລະ ພະນັກງານຊ່ວຍວຽກຈໍານວນໜຶ່ງ.
ຕົວເລກຈັດເກັບລາຍຮັບທີ່ກົມມອບໃຫ້ກອງກວດກາພາສີປະຈໍາແຂວງເຊກອງໃນຕົ້ນປີ 2020 ແມ່ນ 8 ຕື້ກີບ ແລະ ຕົວເລກດັດແກ້ໃໝ່ 1,2 ຕື້ກວ່າກີບ ເຊິ່ງເປັນຕົວເລກທີ່ສູງພໍສົມຄວນ ຖ້າທຽບໃສ່ທ່າແຮງບົ່ມຊ້ອນຂອງແຂວງທີ່ບໍ່ທັນມີດ່ານສາກົນ ເພື່ອສົ່ງອອກ – ນໍາເຂົ້າສິນຄ້າ, ກໍາລັງການຊື້ຊົມໃຊ້ສິນຄ້າມີທ່າອ່ຽງຫຼຸດລົງ. ແຕ່ເຖິງຢ່າງໃດກໍຕາມ ຍ້ອນການນໍາພາ – ຊີ້ນໍາຈາກຄະນະພັກ – ຄະນະນໍາກອງຄຸ້ມຄອງພາສີ VII, ກົມພາສີກະຊວງການເງິນ, ອໍານາດການປົກຄອງທ້ອງຖິ່ນບວກກັບຄວາມເອົາໃຈໃສ່ຂອງຄະນະນໍາ ແລະ ພະນັກງານ – ສະມາຊິກພັກພາຍໃນກອງ ອັນໄດ້ເຮັດໃຫ້ການຈັດຕັ້ງປະຕິບັດວຽກງານປະສົບຜົນສໍາເລັດຫຼາຍດ້ານ.
ໃນປີ 2020 ກອງກວດກາພາສີປະຈໍາແຂວງເຊກອງ ໄດ້ຮັບຕົວເລກແຜນການເກັບລາຍຮັບ ( ຕາມແຜນດັດແກ້ ) ທັງໝົດ 1.223 ລ້ານກີບ, ແຕ່ສາມາດຈັດເກັບໄດ້ 1.557 ລ້ານກີບ ເທົ່າກັບ 127,36% ຂອງແຜນການ. ໃນນັ້ນ, ກອງກວດກາພາສີປະຈໍາແຂວງ ປະຕິບັດໄດ້ 1,3 ຕື້ກວ່າກີບ ເທົ່າກັບ 163,31% ແລະ ດ່ານພາສີທ້ອງຖິ່ນດາກຕະອອກ 185 ລ້ານກວ່າກີບ ເທົ່າກັບ 48,50% ຂອງແຜນການ; ລາຍຮັບສ່ວນໃຫຍ່ແມ່ນໄດ້ມາຈາກການແກ້ໄຂພາຫະນະນໍາເຂົ້າບໍ່ຖືກຕ້ອງ.
ທ່ານ ແກ້ວອໍາພອນ ແສງນວນຈັນ ໃຫ້ຮູ້ຕື່ມວ່າ: ການແກ້ໄຂພາຫະນະນໍາເຂົ້າບໍ່ຖືກຕ້ອງ ໃນປີ 2020 ໄດ້ທັງໝົດ 52 ຄະດີຕໍ່ຄັນ. ໃນນັ້ນ, ລົດໃຫຍ່ 42 ຄັນ ແລະ ລົດຈັກ 10 ຄັນ ແມ່ນໄດ້ແກ້ໄຂຕາມກົດໝາຍວ່າດ້ວຍພາສີ, ແຈ້ງການຂອງລັດຖະມົນຕີກະຊວງການເງິນ ແລະ ຂໍ້ຕົກລົງຂອງເຈົ້າແຂວງເຊກອງ ເຊິ່ງການຈັດຕັ້ງປະຕິບັດຕົວຈິງແມ່ນໄດ້ເປັນເອກະພາບກັບຂະແໜງການໂຍທາທິການ ແລະ ຂົນສົ່ງ ເພື່ອອອກໃບຢັ້ງຢືນ ຄວາມຖືກຕ້ອງທາງດ້ານເຕັກນິກ ແລະ ຕໍາຫຼວດ ເພື່ອເອົາຄໍາໃຫ້ການຈາກເຈົ້າຂອງພາຫະນະແລ້ວ ຈຶ່ງໄດ້ຈັດຕັ້ງປະຕິບັດຕາມຂັ້ນຕອນກົດໝາຍ ແລະ ລະບຽບການທາງດ້ານພາສີ.
ສ່ວນແຜນການໃນປີ 2021 ທ່ານ ແກ້ວອໍາພອນ ແສງນວນຈັນ ກ່າວວ່າ: ເພື່ອໃຫ້ການຈັດເກັບລາຍຮັບເປັນໄປຕາມຄາດໝາຍທີ່ກໍານົດໄວ້ ໄດ້ວາງຫຼາຍມາດຕະການເປັນຕົ້ນ ເອົາໃຈໃສ່ສຶກສາອົບຮົມການເມືອງ – ແນວຄິດໃຫ້ພະນັກງານ – ລັດຖະກອນ, ເຈົ້າໜ້າທີ່ພາສີເປັນປົກກະຕິຕໍ່ເນື່ອງ, ປະສານສົມທົບກັບອົງການປົກຄອງທ້ອງຖິ່ນ ແລະ ຂະແໜງການກ່ຽວຂ້ອງ ເພື່ອໃຫ້ການຮ່ວມມື ແລະ ອໍານວຍຄວາມສະດວກໃນການຈັດຕັ້ງປະຕິບັດວຽກງານວິຊາສະເພາະ, ເຂັ້ມງວດໃນການຕິດຕາມ, ກວດກາການນໍາເຂົ້າ – ສົ່ງອອກສິນຄ້າ, ເຄື່ອງຂອງໃນດ່ານ, ນອກດ່ານ, ການເຄື່ອນຍ້າຍສິນຄ້າ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ