ສຳນັກຂ່າວຕ່າງປະເທດລາຍງານວ່າ ທາງການອິນໂດເນເຊຍພົບຈຸດພິກັດກັບດຳເຮືອບິນໂບອິງ 737 ຂອງສາຍການບິນສຣີວິຈາຢາ ແອ ເຊິ່ງປະສົບອຸບັດເຫດຕົກລົງທະເລເມື່ອວັນເສົາຜ່ານມາ, ນອກຈາກນີ້ ຍັງພົບຊິ້ນສ່ວນຂອງເຮືອບິນ ແລະ ຊິ້ນສ່ວນຂອງມະນຸດອີກ. ທາງການອິນໂດເນເຊຍຄາດວ່າຈະສາມາດກອບກູ້ກັບດຳທັງ 2 ກ່ອງໃນໄວໆນີ້.
ເຮືອບິນໂບອິງ 737 ຂອງສາຍການບິນສຣີວິຈາຢາ ແອ ພ້ອມຜູ້ໂດຍສານ ແລະ ຈຸບິນຈຳນວນ 62 ຄົນ ໄດ້ເດີນທາງອອກຈາກນະຄອນຫຼວງຈາກາຕາໃນເວລາ 14:36 ໂມງຂອງວັນທີ 9 ມັງກອນ 2021 ຕາມເວລາທ້ອງຖິ່ນ ມຸ່ງໜ້າໄປຍັງເມືອງປອນເຕີຍນັກ ແຂວງ ກາລິມັນຕັນ ແຕ່ຫຼັງຈາກທີ່ບິນຂຶ້ນໄດ້ພຽງ 4 ນາທີກໍຂາດການຕິດຕໍ່ກັບຫໍບັງຂັບການບິນ ແລະ ເວລາຕໍ່ມາກໍພົບວ່າເຮືອບິນລຳດັ່ງກ່າວໄດ້ຕົກລົງສູ່ທະເລ.
ຜູ້ອຳນວຍການຄະນະກຳມະການຄວາມປອດໄພດ້ານການຂົນສົ່ງແຫ່ງຊາດອິນໂດເນເຊຍເປີດເຜີຍວ່າ: ຂະນະນີ້ ສາມາດລະບຸຈຸດພິກັດຂອງກັບດຳຂອງເຮືອບິນໂບອິງ 737 ຂອງສາຍການບິນສຣີວິຈາຢາ ຖ້ຽວບິນທີ SJ 182 ແລ້ວ ແລະ ຄາດວ່າຈະສາມາດມາດກອບກູ້ເອົາກັບດຳ 2 ກ່ອງຂຶ້ນຈາກທະເລໃນໄວໆນີ້.