ຫວຽດນາມ ເລີ່ມກໍ່ສ້າງ ສະໜາມບິນສາກົນລອງແທັງ ໄລຍະທຳອິດ - Lanxang Media SOLE CO.,LTD

ຫວຽດນາມ ເລີ່ມກໍ່ສ້າງ ສະໜາມບິນສາກົນລອງແທັງ ໄລຍະທຳອິດ

ຂ່າວສານຫວຽດນາມ ລາຍງານວ່າ: ເມື່ອວັນທີ 5 ມັງກອນ 2021 ທີ່ແຂວງດົ່ງນາຍ, ທ່ານ ຫງວຽນ ຊວັນຟຸກ ນາຍົກລັດຖະມົນຕີຫວຽດນາມ ໄດ້ເຂົ້າຮ່ວມເປີດໂຄງການກໍ່ສ້າງສະໜາມບິນສາກົນ ລອງແທັງ ໄລຍະທີ 1 ໃນການລົງທຶນກໍ່ສ້າງທາງແລ່ນຂຶ້ນ – ລົງຂອງຍົນ ( ຣັນເວ ) ແລະ ອາຄານຜູ້ໂດຍສານ 1 ແຫ່ງ ເຊິ່ງສາມາດຕ້ອນຮັບຜູ້ໂດຍສານ 25 ລ້ານເທື່ອຄົນຕໍ່ປີ ແລະ ສິນຄ້າ 1,2 ລ້ານໂຕນຕໍ່ປີ ລວມມູນຄ່າການກໍ່ສ້າງໄລຍະທີ 1 ປະມານ 4.600 ລ້ານໂດລາສະຫະລັດ.

ສະໜາມບິນສາກົນ ລອງແທັງ ຈະນຳໃຊ້ເຕັກໂນໂລຊີທີ່ທັນສະໄໝ ໄດ້ມາດຕະຖານສາກົນ ແລະ ເທົ່າທຽມກັບສະໜາມບິນສາກົນທັນສະໄໝທີ່ສຸດໃນໂລກ. ນອກນີ້, ຍັງຈະຊ່ວຍສະໜັບສະໜູນໃຫ້ແກ່ການເຕີບໂຕຂອງລວມຍອດຜະລິດຕະພັນພາຍໃນປະເທດ ( ຈີດີພີ ) ເພີ່ມຂຶ້ນຕັ້ງແຕ່ 3 – 5% ໃນຊຸມປີຕໍ່ໜ້າ.