ມອບ-ຮັບໜ້າທີ່ ເລຂາພັກເມືອງ-ເຈົ້າເມືອງພູຄູນ - Lanxang Media SOLE CO.,LTD

ມອບ-ຮັບໜ້າທີ່ ເລຂາພັກເມືອງ-ເຈົ້າເມືອງພູຄູນ

ພິທີ ມອບຮັບໜ້າທີ ເລຂາພັກເມືອງ-ເຈົ້າເມືອງພູຄູນ ແຂວງຫຼວງພະບາງ ໄດ້ຈັດຂື້ນໃນວັນທີ 30 ທັນວາ 2020 ນີ້, ຢູ່ສະໂມສອນໃຫຍ່ຂອງເມືອງ, ມີ ທ່ານ ຄໍາຂັນ ຈັນທະວີສຸກ ກຳມະການສູກາງພັກ ເລຂາພັກແຂວງ ເຈົ້າແຂວງຫຼວງພະບາງ, ພ້ອມດ້ວຍພາກສ່ວນທີ່ກ່ຽວຂ້ອງຂອງແຂວງ, ຕະຫຼອດຮອດພະນັກງານບຳນານ ແລະພະນັກງານລັດຖະກອນ ພາຍໃນເມືອງພູຄູນ ເຂົ້າຮ່ວມ.

ໃນພິທີ ທ່ານ ວຽງທອງ ຫັດສະຈັນ ກຳມະການປະຈຳພັກແຂວງ ເລຂາພັກເມືອງ ເຈົ້າເມືອງພູຄູນ ໄດ້ຂື້ນຜ່ານບົດສະຫຼຸບການຊີ້ນນໍາ-ນໍາພາວຽກງານຮອບດ້ານ ໃນໄລຍະໄດ້ຮັບໜ້າທີ່ ເປັນເລຂາພັກເມືອງ-ເຈົ້າເມືອງພູຄູນ. ຈາກນັ້ນ, ທ່ານ ຄຳຄ່ອງ ພົມມະປັນຍາ ກຳມະການປະຈຳພັກແຂວງ ຫົວໜ້າຄະນະຈັດຕັ້ງແຂວງ ໄດ້ຜ່ານມະຕິຕົກລົງ ຂອງຄະນະປະຈໍາພັກແຂວງ ວ່າດ້ວຍການຕົກລົງໂຍກຍ້າຍ ທ່ານ ວຽງທອງ ຫັດສະຈັນ ໄປປະຈຳການຢູ່ນະຄອນ ຫຼວງພະບາງ ແລະແຕ່ງຕັ້ງ ທ່ານ ທອງຈັນ ແພງຈັນທີ ຮອງເລຂາພັກເມືອງ ປະທານກວດກາຄະນະບລິຫານງານພັກເມືອງ ຂືນຮັກສາການເລຂາພັກເມືອງ ທັງເປັນເຈົ້າເມືອງພູຄູນ. ຈາກນັ້ນ ໄດ້ມີການລົງນາມບົດບັນທຶກ ມອບ-ຮັບໜ້າທີ່ ໂດຍມີຜູ້ເຂົ້າຮ່ວມເປັນສັກຂີພິຍານ.

ໂອກາດນີ້ ທ່ານເຈົ້າແຂວງຫຼວງພະບາງ ໄດ້ເນັ້ນໃຫ້ຜູ້ທີໄດ້ຮັບການແຕ່ງຕັ້ງໃໝ່ ຈົ່ງເຊີດຊູບົດບາດການນໍາພາຂອງຄະນະພັກໃຫ້ສູງ ແລະສືບຕໍ່ເພີ່ມທະວີຄວາມຮັບຜິດຊອບຕໍ່ໜ້າທີການເມືອງຂອງຕົນ, ທັງເປັນແບບຢ່າງນໍາໜ້າ ໃນການຝຶກຝົນຫຼໍ່ຫຼອມຕົນເອງ ທາງດ້ານຄຸນທາດການເມືອງ-ຄຸນສົມບັດສິນທຳປະຕິວັດ ໃຫ້ມີຄວາມໜັກແໜ້ນເຂັ້ມແຂງ, ເອົາໃຈໃສ່ ປັບປຸງແບບແຜນນຳພາ ແບບແຜນວິທີເຮັດວຽກໃຫ້ສອດຄ່ອງ ແລະແທດເໜາະກັບສະພາບຕົວຈິງ ຮ່ວມກັບໝູ່ຄະນະ ເພື່ອພັດທະນາເມືອງພູຄູນໃຫ້ນັບມື້ດີຂຶ້ນ.


ໃນພິທີຄັ້ງນີ້ ທ່ານ ຄຳຂັນ ຈັນທະວີສຸກ ໄດ້ຕາງໜ້າການນຳຂັ້ນສູນກາງ ຂຶ້ນປະດັບຫຼຽນໄຊພິລະອາດຫານຊັ້ນສອງ ຂອງກະຊວງປ້ອງກັນປະເທດ ໃຫ້ກັບ ທ່ານ ວຽງທອງ ຫັດສະຈັນ ທີ່ມີຜົນງານດີເດັ່ນ ໃນການຊີ້ນຳການເຄື່ອນໄຫວວຽກງານແກ້ໄຂ ກຸ່ມຄົນທີ່ກໍຄວາມບໍ່ສະຫງົບໃນໄລຍະປີ 2007-2016 ຕື່ມອີກ.
ຂ່າວ: ອາພຸດເດດ ບຸບຜາ