ລັດຖະມົນຕີການຄ້າ ລົງຊຸກຍູ້ການ ຜະລິດເປັນສິນຄ້າ - Laoedaily

ລັດຖະມົນຕີການຄ້າ ລົງຊຸກຍູ້ການ ຜະລິດເປັນສິນຄ້າ

ທ່ານນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ ພ້ອມຄະນະ ໄດ້ລົງຕິດຕາມຫົວຫນ່ວຍທຸລະກິດ ທີ່ໄດ້ຮັບທຶນສົມທົບເພື່ອສົ່ງເສີມທຸລະກິດ ຫລື BAF ເພື່ອຮັບຊາບຂໍ້ສະດວກ ຫຍຸ້ງຍາກໃນການເຂົ້າເຖິງແຫລ່ງທຶນ.

ການລົງຕິດຕາມຄັ້ງນີ້ມີຂຶ້ນວັນທີ 30ທັນວາ 2020 ເຊິ່ງໄດ້ຢ້ຽມຢາມແລະ ຊຸກຍູ້ການຜະລິດ ຢູ່ວິສາຫະກິດ ປາຫວານຟາມ ສ່ວນບຸກຄົນ ເມືອງໄຊທານີ ໂດຍການຕ້ອນຮັບຂອງທ່ານ ນາງ ວຽງສະຫວັນ ຄໍາມະນີວົງ ອໍານວຍການ ປາຫວານຟາມ.

ທ່ານ ວຽງສະຫວັນ ໄດ້ລາຍງານສະພາບການດໍາເນີນກິດຈະການ ຜົນຜະລິດດ້ານກະສິກໍາ, ການເຂົ້າເຖິງຕະຫລາດ ລວມເຖິງສິ່ງທ້າທາຍ. ສໍາລັບທຶນສົມທົບ ທີ່ໄດ້ຮັບເງິນສົມທົບເພື່ອຂະຫຍາຍທຸລະກິດ ມູນຄ່າ 3.750 ໂດລາ ເພື່ອຊ່ວຍອອກແບບແຜນຝັງຂອງຟາມ ແລະ ການຝືກອົບຮົມຫລັກສູດ keiei-Juku ສໍາລັບຜູ້ບໍລິຫານ.

Image may contain: 3 people, people standing, plant and outdoor

ຈາກນັ້ນທ່ານລັດຖະມົນຕີ ແລະ ຄະນະ ໄດ້ສືບຕໍ່ລົງຕິດຕາມຄວາມຄືບຫນ້າການສ້າງຕັ້ງໂຮງສີເຂົ້າ ຂອງບໍລິສັດ ຈໍາປາຫອມການຄ້າຂາອອກ-ຂາເຂົ້າ ຈໍາກັດຜູ້ດຽວ ເມືອງ ປາກງື່ມ ນະອນຫລວງວຽງຈັນ ເຊິ່ງໄດ້ຮັບການລາຍງານ ສະພາບລວມຈາກທ່ານ ນາງ ບຸນຮຽງ ພົມມີໄຊ ອໍານວຍການບໍລິສັດດັ່ງກ່າວ ໂດຍສະເພາະ ການອໍານວຍຄວາມສະດວກໃນການເຂົ້າເຖິງແຫຼ່ງທຶນ ແລະ ຂອດອໍານວຍຄວາມສະດວກ ຂອງພະນັກງານ.

ສໍາລັບທຶນສົມທົບໃນຄັ້ງນີ້ ແບ່ງເປັນ ສອງໄລຍະ ໄລຍະທີ 1ມີມູນຄ່າ 21.500ໂດລາ ສ່ວນໄລຍະທີ 2ມີມູນຄ່າ 2.840 ໂດລາ ເຊິ່ງບໍລິສັດຈະນໍາໃຊ້ເຂົ້າໃນການອອກແບບສາງເຂົ້າ ແລະ ຫ້ອງບໍລິຫານ ແລະ ການອອກແບບຫຸ້ມຫໍ່ຜະລິດຕະພັນເຂົ້າ ລວມທັງການໃຫ້ລາຍລະອຽດ ຂໍ້ມູນທາງສານອາຫານ ໃຫ້ລູກຄ້າ.

ໂອກາດດັ່ງກ່າວ ທ່ານ ນາງ ເຂັມມະນີ ພົນເສນາ ໄດ້ສະແດງຄວາມຊົມເຊີຍ ທັງສອງຫົວຫນ່ວຍທຸລະກິດ ທີ່ໄດ້ຕັດສິນໃຈສູງໃນການຕໍ່ຍອດທຸລະກິດຂອງຕົນທີ່ມີຢູແລ້ວໃຫ້ເຕີບໃຫຍ່ຂຶ້ນ. ພ້ອມດຽວກັນທ່ານລັດຖະມົນຕີກໍເນັ້ນໃຫ້ເຈົ້າຫນ້າກ່ຽວຂ້ອງ ໄດ້ເອົາໃຈໃສ່ ປະສານສົມທົບກັບພາກທຸລະກິດສ້າງແຜນທຸລະກິດ ເປັນອັນລະອຽດແກ້ຈຸດອ່ອນຂະຫຍາຍຈຸດແຂງ ເພື່ອຊ່ວຍອໍານວຍ ຄວາມສະດວກ ແລະ ເຮັດໃຫ້ການດໍາເນີນທຸລະກິດ ມີການເຕີບໃຫຍ່ເຂັ້ມແຂງ ສາມາດແຂ່ງຂັນໄດ້

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ