ນາຍົກ ທອງລຸນ ສີສຸລິດ ເຂົ້າຮ່ວມເປີດງານວາງສະແດງຜະລິດຕະພັນລາວ 2020 ກະຕຸ້ນການຊົມໃຊ້ສິນຄ້າພາຍໃນ - Laoedaily

ນາຍົກ ທອງລຸນ ສີສຸລິດ ເຂົ້າຮ່ວມເປີດງານວາງສະແດງຜະລິດຕະພັນລາວ 2020 ກະຕຸ້ນການຊົມໃຊ້ສິນຄ້າພາຍໃນ

ສະພາການຄ້າ ແລະ ອຸດສາຫະກຳແຫ່ງຊາດລາວ(ສຄອຊ) ໄດ້ຈັດງານວາງສະແດງຜະລິດຕະພັນລາວ  2020 ຂຶ້ນໃນລະຫວ່າງວັນທີ 25 ທັນວາ 2020 ຫາວັນທີ 3 ມັງກອນ 2021 ທີ່ສູນການຄ້າລາວໄອເຕັກ ນະຄອນຫຼວງວຽງຈັນ ໂດຍມີສິນຄ້າ 121 ບໍລິສັດເຂົ້າຮ່ວມລວມມູນຄ່າສິນຄ້າຫຼາຍກວ່າ 13 ຕື້ກີບ.


ພິທີເປີດງານວາງສະແດງຢ່າງເປັນທາງການຈັດຂຶ້ນວັນທີ 30 ທັນວາ 2020  ໂດຍໃຫ້ກຽດເຂົ້າຮ່ວມຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກຳ ແລະ ການຄ້າ, ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ.

ທ່ານນາງ ຈັນທະຈອນ ວົງໄຊ ຮອງປະທານ ສຄອຊ ກ່າວວ່າ:  ງານຜະລິດຕະພັນລາວ 2020 ຫຼືວ່າ Made In Laos 2020 ໃນປີນີ້ ແມ່ນເປັນປີລິເລີ່ມທີ່ໄດ້ມີເຈົ້າພາບຮ່ວມກໍຄື ສະພາການຄ້າ ແລະ ອຸດສາຫະກຳນະຄອນຫຼວງວຽງຈັນ ໄດ້ມີການຕົບແຕ່ງພິເສດທີ່ເປັນເອກະລັກເພື່ອສະແດງຜົນງານການຂະຫຍາຍຕົວທາງດ້ານເສດຖະກິດ-ສັງຄົມຂອງນະຄອນຫຼວງວຽງຈັນ ເພື່ອເປັນການໂຄສະນາສົ່ງເສີມຜະລິດຕະພັນລາວ ແລະ ກະຕຸ້ນຊຸກຍູ້ຜູ້ປະກອບການ ແລະ ພ້ອມດຽວກັນນັ້ນກໍເພື່ອໂຄສະນາ ສົ່ງເສີມ ລາວທ່ຽວລາວ ເພື່ອຊ່ວຍຟື້ນຟູເສດຖະກິດທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ-19.


ງານວາງສະແດງຄັ້ງນີ້ ມີ 121 ບໍລິສັດ 220 ຫ້ອງວາງສະແດງ ລວມມູນຄ່າຜະລິດຕະພັນທັງໝົດທີ່ເຂົ້າຮ່ວມມາວາງສະແດງຫລາຍກ່ວາ 13ຕືື້ກີບ.

ຄຽງຄູ່ກັບການຈັດງານວາງສະແດງໃນຄັ້ງນີ້, ຍັງມີການສະແດງສິລະປະ, ກິດຈະກຳ ແຈກແຖມຂອງຂວັນຕ່າງໆ ແລະ ຍັງມິກິດຈະກຳສຳມະນາໃນຫົວຂໍ້ຕ່າງໆເພື່ອມາໃຫ້ຄວາມຮູ້ ແລະແລກປ່ຽນຄໍາຄິດຄໍາເຫັນຮ່ວມກັນ ເຊັ່ນ: ການນໍາສະເໜີແຜນຍຸດທະສາດ ຂອງ ສຄອຊ ການເຂົ້າຫາແຫຼ່ງທຶນ,ຕະຫຼາດ ແລະ E-Commerce, ການສຳມະນາ ສຳລັບຄົນລຸ້ນໃໝ່ທີ່ສົນໃຈເຮັດທຸລະກິດ, ການສຳມະນາກ່ຽວກັບທັກສະອາຊີບທີ່ຕ້ອງການຈາກຜູ້ໃຊ້ແຮງງານ, ກອງປະຊຸມສຳມະນາ ການປັບຕົວຈາກຜົນກະທົບໂຄວິດ-19ຂະແໜງກະສິກຳ, ເວທີສົນທະນາຄວາມຕ້ອງການຂອງຜູ້ຊົມໃຊ້ຕໍ່ຜະລິດຕະພັນລາວ, ການສົ່ງເສີມລາວ ທ່ຽວ ລາວ ແລະອື່ນໆ.

.

ຂ່າວ: ກໍລະກົດ ວັນນາລີ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ