ອຸຕຸເຕືອນໄພອາກາດໜາວ ໄລຍະ 31 ທັນວາ ຫາ 4 ມັງກອນ ອຸ່ນຫະພູມບາງເຂດຈະຕິດລົບ - Laoedaily

ອຸຕຸເຕືອນໄພອາກາດໜາວ ໄລຍະ 31 ທັນວາ ຫາ 4 ມັງກອນ ອຸ່ນຫະພູມບາງເຂດຈະຕິດລົບ

ກົມອຸຕຸນິຍົມ ແລະ ອຸທົກກະສາດ ໄດ້ແຈ້ງເຕືອນໄພອາກາດໜາວ ໄລຍະວັນທີ 31 ທັນວາ ຫາ 4 ມັງກອນ ໂດຍສະເພາະພາກເໜືອດ້ານຕາເວັນອອກ ອຸນຫະພູມຕ່ຳສຸດຂີດ -1,2 ຫາ 0,5 ອົງສາ.ສຳລັບຜູ້ທີ່ເດີນທາງໃນເຂດພາກເໜືອ ຂໍໃຫ້ມີສະຕິລະມັດລະວັງຕໍ່ສະພາບໝອກໜາ ທີ່ເຮັດໃຫ້ການເບິ່ງເຫັນບໍ່ຈະແຈ້ງ.

ກົມອຸຕຸນິຍົມ ແລະ ອຸທົກກະສາດ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ  ໄດ້ອອກແຈ້ງເຕືອນໄພ ອາກາດໜາວ ແຕ່ໄລຍະວັນທີ 31 ທັນວາ 2020 ຫາ ວັນທີ 4 ມັງກອນ 2021 ສະບັບທີ 1 ວ່າ: ເນື່ອງຈາກບໍລິເວນຄວາມກົດດັນສູງຂອງອາກາດໜາວເຢັນທີ່ມີກຳລັງແຮງຈະແຜ່ລົງມາປົກຄຸມຢູ່ທົ່ວທຸກພາກຂອງປະເທດລາວ ແລະ ສົມທົບກັບກະແສລົມມໍລະສຸມຕາເວັນອອກສ່ຽງເໜືອພັດປົກຄຸມ ຊຶ່ງຈະເຮັດໃຫ້ອາກາດໜາວເຢັນ ແລະ ລົມພັດແຮງໃນແຕ່ລະພາກ ແລະ ໜາວເຢັນຫຼາຍຢູ່ແຂວງພາກເໜືອ, ແຂວງໄຊສົມບູນ, ຫຼັກຊາວ ແລະ ເຂດພູພຽງບໍລະເວນ ໃນໄລຍະວັນທີ 31 ທັນວາ 2020 ຫາ ວັນທີ 4 ມັງກອນ 2021 ນີ້.

ຄາດຄະເນອຸນຫະພູມຕ່ຳສູດຂີດໃນແຕ່ລະພາກດັ່ງນີ້:ພາກເໜືອດ້ານຕາເວັນອອກ ອຸນຫະພູມຕ່ຳສຸດຂີດ -1,2 ຫາ 0,5 ອົງສາ; ພາກເໜືອດ້ານຕາເວັນຕົກ ອຸນຫະພູມຕ່ຳສຸດຂີດ 3,0 ຫາ 5,0 ອົງສາ; ພາກກາງ ອຸນຫະພູມຕ່ຳສຸດ 6,0 ຫາ 8,0 ອົງສາ; ພາກໃຕ້12,0 ຫາ 14,0 ອົງສາ ແລະ ນະຄອນຫຼວງວຽງຈັນ ອຸນຫະພູມຕໍ່າສຸດ 8,0 ຫາ 10,0 ອົງສາ.


ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນ ແລະ ອົງການປົກຄອງທ້ອງຖິ່ນ ທຸກພາກສ່ວນທີ່ອາໄສຢູ່ແຂວງພາກເໜືອ, ພາກກາງ ແລະ ເຂດພູພຽງບໍລະເວນ ຈົ່ງມີສະຕິລະມັດລະວັງຕໍ່ສະພາບອາກາດໜາວຫຼາຍ ທີ່ຈະເຮັດໃຫ້ເປັນໄຂ້, ເຈັບປ່ວຍ ແລະ ມີຜົນກະທົບຕໍ່ສຸຂະພາບ ໂດຍສະເພາະແມ່ນເດັກນ້ອຍ ແລະ ຜູ້ເຖົ້າ, ຂໍໃຫ້ນຸ່ງຮົ່ມເຮັດໃຫ້ຮ່າງກາຍອົບອຸ່ນຢູ່ສະເໝີ.

ສຳລັບຜູ້ທີ່ເດີນທາງໃນເຂດພາກເໜືອ ຂໍໃຫ້ມີສະຕິລະມັດລະວັງຕໍ່ສະພາບໝອກໜາ ທີ່ເຮັດໃຫ້ການເບິ່ງເຫັນບໍ່ຈະແຈ້ງ ແລະ ອາດເຮັດໃຫ້ມີອຸປະຕິເຫດເກີດຂຶ້ນໄດ້. ພ້ອມນີ້ ຂໍໃຫ້ຕິດຕາມການແຈ້ງເຕືອນໄພຈາກກົມອຸຕຸນິຍົມ ແລະ ອຸທົກກະສາດ ຢ່າງຕໍ່ເນື່ອງ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ