ຫັດຖະກໍາແກະສະຫຼັກໄມ້ກະທົບຈາກການລະບາດໂຄວິດ-19 ຕັ້ງເປົ້າປີໜ້າຜະລິດເພີ່ມ - Laoedaily

ຫັດຖະກໍາແກະສະຫຼັກໄມ້ກະທົບຈາກການລະບາດໂຄວິດ-19 ຕັ້ງເປົ້າປີໜ້າຜະລິດເພີ່ມ

ການແຜ່ລະບາດຂອງພະຍາດໂຄວິດ-19 ໄດ້ກະທົບຕໍ່ທຸລະກິດຫັດຖະກໍາແກະສະຫຼັກໄມ້ ເນື່ອງຈາກນັກທ່ອງທ່ຽວບໍ່ສາມາດເຂົ້າມາປະເທດໄດ້. ຂະນະທີ່ຜູ້ປະກອບການຕັ້ງຄວາມຫວັງໃນປີ 2021 ຖ້າສາມາດຄວບຄຸມການລະບາດໂຄວິດ-19 ໄດ້ ລວມທັງເປີດນໍາໃຊ້ເສັ້ນທາງລົດໄຟ – ລາວຈີນ ອາດເຮັດໃຫ້ຕົ້ນທຶນການຂົນສົ່ງຫຼຸດລົງ ຄວາມສາມາດສົ່ງອອກໄປຕະຫຼາດຈີນສູງຂຶ້ນ ຈະເຮັດໃຫ້ຂະແໜງການດັ່ງກ່າວກັບມາຂະຫຍາຍຕົວ ແລະ ສ້າງເມັດເງິນເຂົ້າປະເທດໄດ້.

ທ່ານ ວໍລະຈິດ ແກ້ວໄຊຍະວົງ ເຈົ້າຂອງວິສະຫະກິດສ່ວນບຸກຄົນ ວໍລະຈິດ ແກະສະຫຼັກໄມ້ກ່າວວ່າ: ວິສະຫະກິດສ່ວນບຸກຄົນ ວໍລະຈິດ ແກະສະຫຼັກ ສ້າງຕັ້ງຂຶ້ນໃນປີ 2012 ໂດຍເລີ່ມຈາກທຸລະກິດຄອບຄົວ ພັດທະນາທັກສະ ແລະ ສີມືຂຶ້ນມາເລື້ອຍໆ ຈົນຮອດປີ 2014 ລັດຖະບານ ກໍ່ຄື ຂະແໜງອຸດສາຫະກຳ ແລະ ການຄ້ານະຄອນຫຼວງວຽງຈັນເຫັນຄວາມສໍາຄັນໃຫ້ໂອກາດໄດ້ຍົກລະດັບທັກສະດ້ານຕ່າງໆ, ອໍານວຍຄວາມສະດວກເຂົ້າຫາແຫຼ່ງທຶນ ຈົນສາມາດຍົກລະດັບການຜະລິດຂຶ້ນ ແລະ ໄດ້ຮັບກາໝາຍສິນຄ້າໂອດ໊ອບ ແຫ່ງຊາດ ຍິ່ງເຮັດໃຫ້ທຸລະກິດ ການຜະລິດສິນຄ້າໄດ້ຮັບ ຄວາມນິຍົມຊົມຊອບຈາກສັງຄົມກໍຄື ນັກທ່ອງທ່ຽວທັງພາຍໃນ ແລະ ຕ່າງປະເທດເພີ່ມຂຶ້ນ.

Image may contain: 1 person, standing and indoor

ການບໍລິການຜ່ານມາລູກຄ້າພາຍໃນກວມເອົາ 15% ແລະ ພາຍນອກແມ່ນກວມເອົາ 85% ໃນນັ້ນຕະລາດຈີນກວມເອົາ 70% ລວມທັງນັກທ່ອງທ່ຽວ, ນັກລົງທຶນ ແລະ ພໍ່ຄ້າຄົນກາງ, ຫວຽດນາມ 10% ແລະ ໄທ 5%. ແຕ່ການລະບາດຂອງພະຍາດ ໂຄວິດ-19 ໄດ້ເຮັດໃຫ້ມີການກະທົບຫຼາຍນັບແຕ່ເດືອນ ກຸມພາ ຫາປັດຈຸບັນ ບໍ່ສາມາດສ້າງຍອດຂາຍໄດ້ຄືກັບປີຜ່ານມາ ເຊິ່ງຕ້ອງແບກພາລະໃນການຈ່າຍເງິນເດືອນໃຫ້ພະນັກງານ.

ທ່ານຍັງໄດ້ກ່າວຕື່ມອີກວ່າ: ຢາກໃຫ້ພາກລັດລົງມາຊ່ວຍເລື່ອງເງິນກູ້ສຳລັບ SME ເພື່ອລົງທຶນປັບປຸງການຜະລິດຮອງຮັບການຜະລິດໃນປີ 2021 ໂດຍນໍາໃຊ້ເງື່ອນໄຂທີ່ພາກລັດອໍານວຍຄວາມສະດວກເປີດນໍາໃຊ້ທາງດ່ວນວຽງຈັນ – ວັງວຽງ ແລະ ແຜນເປີດນໍາໃຊ້ເສັ້ນທາງລົດໄຟລາວ – ຈີນ ຖ້າຫາກ ສາມາດຄວບຄຸມການລະບາດຂອງ ໂຄວິດ-19 ພວກເຮົາຕັ້ງເປົ້າເພີ່ມການຜະລິດຂຶ້ນ 50% ໂດຍນໍາໃຊ້ວັດຖຸດິບພາຍໃນທີ່ຍັງມີມາຜະລິດສິນຄ້າເພື່ອສົ່ງອອກ ເນັ້ນຜະລິດສິນຄ້າທີ່ມີຄຸນນະພາບ ຮູບແບບໃໝ່ໆທັນສະໄໝ, ຖືກຕ້ອງຕາມນະໂຍບາຍສົ່ງເສີມຜະລິດສິນຄ້າຂອງລັດຖະບານ, ສິນຄ້າສາມາດພົກພາສະດວກ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ