ກຳປູເຈຍ ສາມາດຜະລິດນ້ຳມັນໄດ້ເປັນຄັ້ງປະຫວັດສາດ - Laoedaily

ກຳປູເຈຍ ສາມາດຜະລິດນ້ຳມັນໄດ້ເປັນຄັ້ງປະຫວັດສາດ

ສຳນັກຂ່າວຕ່າງປະເທດລາຍງານວ່າ ສົມເດັດຮຸນເຊັນ ນາຍົກລັດຖະມົນຕີແຫ່ງຣາຊະອານາຈັກກຳປູເຈຍ ໄດ້ປະກາດວ່າ: ກຳປູເຈຍສາມາດຜະລິດນ້ຳມັນດິບໃນນ່ານນ້ຳຂອງຕົນເອງໄດ້ແລ້ວ ຖືວ່າເປັນຜົນສຳເລັດອັນຍິ່ງໃຫຍ່ທີ່ສຸດສຳລັບກຳປູເຈຍ.

ນາຍົກກຳປູເຈຍກ່າວວ່າ: ປີເກົ່າ 2020 ກຳລັງຈະຜ່ານພົ້ນໄປ, ປີໃໝ່ 2021 ກຳລັງຈະກ້າວມາເຖິງ ປະເທດຊາດຂອງພວກເຮົາໄດ້ຮັບຂອງຂວັນອັນຍິ່ງໃຫຍ່ ນັ້ນກໍຄືການຜະລິດນ້ຳມັນເປັນຄັ້ງທຳອິດຢູ່ໃນດິນແດນຂອງພວກເຮົາ.

ລາຍງານຂ່າວລະບຸວ່າ: ບໍລິສັດເຊັຟຣອນເປັນຜູ້ຄົ້ນພົບບໍ່ນ້ຳມັນໃນເຂດທະເລຂອງກຳປູເຈຍໃນປີ 2005 ແຕ່ບໍ່ສາມາດຂຸດຄົ້ນ ແລະ ຜະລິດນ້ຳມັນໄດ້ ເນື່ອງຈາກການເຈລະຈາຕໍ່ລອງແບ່ງປັນຜົນປະໂຫຍດກັບລັດຖະບານກຳປູເຈຍບໍ່ລົງໂຕ ເພາະວ່າລັດຖະບານກຳປູເຈຍປະເມີນວ່າ ນ່ານນ້ຳຂອງກຳປູເຈຍມີນ້ຳມັນຫຼາຍຮ້ອຍລ້ານບາເຣລ, ດັ່ງນັ້ນບໍລິສັດເຊັຟຣອນຈຶ່ງໄດ້ຂາຍຫຸ້ນໃຫ້ບໍລິສັດຄຣິສເອເນີຈີຂອງສິງກະໂປໃນປີ 2014.

ປັດຈຸບັນບໍລິສັດຄຣິສເອເນີຈີ ຖືຫຸ້ນ 95% ໃນບໍ່ນ້ຳມັນແຫ່ງນີ້, ສ່ວນອີກ 5% ແມ່ນລັດຖະບານກຳປູເຈຍຖືຫຸ້ນ, ບໍລິສັດຄຣິສເອເນີຈີ ປະເມີນວ່າ ຈະສາມາດຂຸດຄົ້ນ ແລະ ຜະລິດນ້ຳມັນໄດ້ປະມານ 7.500 ບາເຣລ/ວັນ ເຊິ່ງຖືວ່າເປັນປະລິມານລະດັບກາງເມື່ອທຽບກັບການຜະລິດຂອງປະເທດໃກ້ຄຽງ ເປັນຕົ້ນແມ່ນຫວຽດນາມ ແລະ ໄທ ແຕ່ລາຍໄດ້ຈາກການຜະລິດ ແລະ ຂາຍນ້ຳມັນຖືວ່າມີຄວາມສຳຄັນທີ່ສຸດສຳລັບລັດຖະບານກຳປູເຈຍ.

ລັດຖະບານກຳປູເຈຍປະເມີນວ່າ ຈະມີລາຍຮັບຈາກຄ່າພາກຫຼວງ, ພາສີ-ອາກອນ ໄລຍະທຳອິດຈາກໂຄງການດັ່ງກ່າວຢ່າງໜ້ອຍ 500 ລ້ານໂດລາສະຫະລັດ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ