ທສວ ຈັດກອງປະຊຸມ ສະໄໝສາມັນ ພ້ອມວາງທິດທາງວຽກງານ 2021 - Laoedaily

ທສວ ຈັດກອງປະຊຸມ ສະໄໝສາມັນ ພ້ອມວາງທິດທາງວຽກງານ 2021

ກອງປະຊຸມ ສະໄໝສາມັນ ຄັ້ງທີ V ຂອງ ສະພາບໍລິຫານກອງທຶນສົ່ງເສີມວິສາຫະກິດຂະໜາດນ້ອຍ ແລະ ກາງ (ທສວ) ໄດ້ຈັດຂຶ້ນເມື່ອມໍ່ໆມານີ້ ໂດຍການເປັນປະທານຂອງ ທ່ານ ສົມຈິດ ອິນທະມິດ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ, ປະທານສະພາບໍລິຫານ ທສວ; ມີສະມາຊິກສະພາບໍລິຫານ ທສວ ເຂົ້າຮ່ວມຢ່າງພ້ອມພຽງ.

ການຈັດກອງປະຊຸມໃນຄັ້ງນີ້ ແມ່ນເພື່ອຮັບຟັງການລາຍງານ, ພິຈາລະນາຮັບຮອງ ແລະ ໃຫ້ທິດຊີ້ນໍາ ຕໍ່ປະເດັນສໍາຄັນຕ່າງໆ. ໃນນັ້ນ, ສະພາບໍລິຫານ ທສວ ໄດ້ຮັບຟັງລາຍງານຄວາມຄືບໜ້າຂອງການຈັດຕັ້ງປະຕິບັດຜົນຂອງກອງປະຊຸມສະໄໝສາມັນ ຄັ້ງທີ IV ຂອງສະພາບໍລິຫານ ທສວ,  ການສ້າງປຶ້ມຄູ່ມື ການຄຸ້ມຄອງການເງິນ-ການບັນຊີ ແລະ ຜົນຂອງກອງປະຊຸມຄະນະກໍາມະການກວດກາພາຍໃນຂອງ ທສວ.

Image may contain: 6 people, people sitting and indoor

ສະພາບໍລິຫານ ທສວ ໄດ້ພິຈາລະນາຮັບຮອງເອົາ ບົດສະຫຼຸບການຈັດຕັ້ງປະຕິບັດວຽກງານຂອງ ທສວ ປີ 2020 ແລະ ທິດທາງແຜນການ ປີ 2021, ການປັບຖານເງິນເດືອນຂອງພະນັກງານຕາມສັນຍາຂອງ ທສວ ແລະ ຮັບຮອງເອົາເຄື່ອງໝາຍຂອງ ທສວ. ພ້ອມກັນນັ້ນ, ກອງປະຊຸມໄດ້ໃຫ້ທິດຊີ້ນໍາໃຫ້ກອງເລຂາເບິ່ງຄືນຕື່ມວ່າ ພາຍໃນປີ 2021 ທສວ ຈະເຮັດຫຍັງແດ່ ເພື່ອໃຫ້ບໍລິການແກ່ສັງຄົມ ໂດຍໃຫ້ເນັ້ນໃສ່ຊຸກຍູ້ການນຳໃຊ້ບ້ວງເງິນຊ່ວຍເຫຼືອທາງດ້ານວິຊາການຂອງ ທສວ ໃຫ້ຫລາຍຂຶ້ນ, ເປີດກວ້າງໃຫ້ຫົວໜ່ວຍວິສາຫະກິດທີ່ຕ້ອງການການຊ່ວຍເຫຼືອດ້ານວິຊາການ ທີ່ສອດຄ່ອງກັບກິດຈະກຳສົ່ງເສີມວິສາຫະກິດຂະໜາດນ້ອຍ ແລະ ກາງ (ວນກ) ສະເໜີໂຄງການຊ່ວຍເຫຼືອເພື່ອຂໍທຶນສະໜັບສະໜູນຈາກ ທສວ. ພ້ອມນັ້ນ, ກໍໃຫ້ຊຸກຍູ້ພາກສ່ວນກ່ຽວຂ້ອງຮ່ວມມືກັນສ້າງໂຄງການ Coaching ສຳລັບ ວິສາຫະກິດທີ່ໄດ້ຮັບເງິນກູ້ບ້ວງ 3% ຕໍ່ປີ ເພື່ອບໍ່ໃຫ້ເກີດມີໜີ້ທີ່ບໍ່ເກີດດອກອອກຜົນ ຫຼື NPL.

Image may contain: 4 people, people sitting, office and indoor

ນອກຈາກນັ້ນ, ກອງປະຊຸມຍັງເຫັນດີດ້ານຫລັກການໃຫ້ນໍາໃຊ້ບ້ວງເງິນສະສົມຂອງ ທສວ ໃນປີ 2021 ຈໍານວນ 4,76 ຕື້ກີບ ເພື່ອເພີ່ມທຶນໃຫ້ສະຖາບັນການເງິນຈຸລະພາກ ເພື່ອປ່ອຍສິນເຊື່ອໃຫ້ຈຸນລະວິສາຫະກິດ. ນອກນັ້ນ, ກອງປະຊຸມຍັງໄດ້ມອບໃຫ້ກອງເລຂາ ທສວ ສົມທົບກັບ ກະຊວງການເງິນ ແລະ ທະນາຄານແຫ່ງ ສປປ ລາວ ເພື່ອທົບທວນຄືນຜົນການນຳໃຊ້ບ້ວງເງິນ 200 ຕື້ກີບ ໃນປີ 2020 ເພື່ອຈະເປັນບ່ອນອີງໃນການອະນຸມັດງົບປະມານຈໍານວນ 200 ຕື້ກີບ ໃຫ້ ທສວ ປະຈໍາປີ 2021.

ພ້ອມດຽວກັນ, ທສວ ຈະສືບຕໍ່ແຜນວຽກທີ່ຄົງຄ້າງໃຫ້ປະສົບຜົນສໍາເລັດ ແລະ ປະຕິບັດວຽກງານຕ່າງໆ ຕາມແຜນວຽກທີ່ວາງໄວ້ ໃຫ້ໄດ້ຮັບໝາກຜົນອັນດີ ໂດຍສະເພາະແມ່ນການຊ່ວຍເຫຼືອດ້ານວິຊາການ ສ້າງຄວາມເຂັ້ມແຂງແກ່ ວນກ ໃຫ້ສາມາດເຂົ້າເຖິງແຫຼ່ງທຶນໄດ້ຢ່າງທົ່ວເຖິງ ແລະ ສືບຕໍ່ວຽກງານເຜີຍແຜ່ຂໍ້ມູນຂ່າວສານໃຫ້ສັງຄົມໄດ້ຮັບຊາບຢ່າງທົ່ວເຖິງ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ