ປະກາດແຂວງສະຫວັນນະເຂດ ຈົບຊັ້ນມັດທະຍົມສຶກສາຕອນຕົ້ນບຳລຸງ - Laoedaily

ປະກາດແຂວງສະຫວັນນະເຂດ ຈົບຊັ້ນມັດທະຍົມສຶກສາຕອນຕົ້ນບຳລຸງ

ພິທີປະກາດແຂວງສະຫວັນນະເຂດ ຈົບຊັ້ນມັດທະຍົມສຶກສາຕອນຕົ້ນບຳລຸງ ໄດ້ຈັດຂຶ້ນຢ່າງເປັນທາງການໃນຕອນເຊົ້າວັນທີ 29 ທັນວາ 2020 ທີ່ຫໍວັດທະນະທຳໄກສອນ ພົມວິຫານ ໂດຍການເປັນກຽດເຂົ້າຮ່ວມໃນພິທີຄັ້ງນີ້ຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກິລາ, ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ, ມີຄະນະການນຳຂັ້ນຕ່າງໆຂອງແຂວງ, ສະຖາບັນການສຶກສາພາກລັດ-ເອກະຊົນ, ແຂກຖືກເຊີນ, ຄູ-ອາຈານ, ຜູ້ບໍລິຫານການສຶກສາຂັ້ນຕ່າງໆ ແລະໂຮງຮຽນມັດທະຍົມສຶກສາຕອນຕົ້ນທົ່ວແຂວງເຂົ້າຮ່ວມຢ່າງພ້ອມພຽງ.


ໂອກາດນີ້, ທ່ານ ນາງ ຫຼິງທອງ ແສງຕາວັນ ຮອງເຈົ້າແຂວງສະຫວັນນະເຂດ ທັງເປັນຫົວໜ້າພະແນກສຶກສາທິການ ແລະກິລາແຂວງ ໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດການຮຽນ-ການສອນຊັ້ນມັດທະຍົມສຶກສາຕອນຕົ້ນບຳລຸງທົ່ວແຂວງ ແລະແຜນພັດທະນາການສຶກສາໃນຕໍ່ໜ້າ ໂດຍສັງເຂບວ່າ: ເພື່ອບັນລຸແຜນພັດທະນາເສດຖະກິດ-ສັງຄົມຂອງແຂວງໃນໄລຍະ 5 ປີ(2016-2020) ຕ້ອງເຮັດໃຫ້ປະຊາຊົນໃນເກນອາຍຸ 15-35 ປີໃນທົ່ວແຂວງ ມີລະດັບການສຶກສາຈົບຊັ້ນມັດທະຍົມສຶກສາຕອນຕົ້ນປະຊາຊົນຢ່າງໜ້ອຍ 90% ຂຶ້ນໄປ ໂດຍການຖອດຖອນບົດຮຽນຈາກການຈັດຕັ້ງປະຕິບັດວຽກງານບຳລຸງຊັ້ນປະຖົມສຶກສາຜ່ານມາ ແຂວງພວກເຮົາ ສາມາດຈັດຕັ້ງການບຳລຸງຍົກລະດັບການສຶກສາຊັ້ນມັດທະຍົມຕອນຕົ້ນໃຫ້ແກ່ປະຊາຊົນຕາມ 5 ຂັ້ນຕອນ, ເຊິ່ງຜ່ານການຈັດຕັ້ງປະຕິບັດ ຈິ່ງເຮັດໃຫ້ບັນດາເມືອງຕ່າງໆມີຜົນສຳເລັດເປັນແຕ່ລະໄລຍະ ມາຮອດປະຈຸບັນ, ທົ່ວແຂວງສະຫວັນນະເຂດ ມີປະຊາກອນ 15-35 ປີທັງໝົົດ 344.746 ຄົນ, ຍິງ 169.144 ຄົນ, ຮຽນຈົບຊັ້ນມັດທະຍົມຕອນຕົ້ນສາຍສາມັນ 305.801 ຄົນ, ມີກຸ່ມເປົ້າໝາຍເຂົ້າຮຽນມັດທະຍົມຕອນຕົ້ນບຳລຸງ 26.709 ຄົນ, ຍິງ 12.915 ຄົນ ສາມາດຮຽນຈົບຊັ້ນມັດທະຍົມຕອນຕົ້ນບຳລຸງໄດ້ 25.484 ຄົນ, ຍິງ 12.278 ຄົນ, ສະເລ່ຍຜູ້ຈົບຊັ້ນມັດທະຍົມຕອນຕົ້ນບຳລຸງທົ່ວແຂວງ ໄດ້ 95,41%, ບໍ່ຈົບມັດທະຍົມຕອນຕົ້ນບຳລຸງ 1.225 ຄົນ, ຍິງ 637 ຄົນ, ເທົ່າກັບ 4,59%.

ໄປຄຽງຄູ່ກັນນັ້ນ, ແຂວງພວກເຮົາ ກໍ່ໄດ້ເອົາໃຈໃສ່ບຳລຸງຍົກລະດັບການສຶກສາຊັ້ນມັດທະຍົມສຶກສາຕອນປາຍໃຫ້ແກ່ທະຫານ, ພະນັກງານ, ປະຊາຊົນ ແລະກຸ່ມຄົນທີ່ສົນໃຈຢູ່ໃນສູນການສຶກສານອກໂຮງຮຽນຂອງແຂວງ ຊຶ່ງໃນສົກຮຽນ 2016-2020 ມີຜູ້ເຂົ້າຮຽນບຳລຸງຍົກລະດັບທັງໝົດ 2.104 ຄົນ, ຍິງ 722 ຄົນ ໃນນັ້ນ ໂຮງຮຽນບຳລຸງ ມ.7 ມີ 1.401, ສອບເສັງຈົບຊັ້ນ ມ.7 ໄດ້ 1.377 ຄົນ ພ້ອມນີ້, ກໍ່ຍັງໄດ້ຊຸກຍູ້ສົ່ງເສີມໃຫ້ສູນການສຶກສານອກໂຮງຮຽນແຫ່ງຕ່າງໆ ຈັດຕັ້ງການຝຶກອົບຮົມວິຊາຊີບຂັ້ນພື້ນຖານໃຫ້ແກ່ຊຸມຊົນຜູ້ທີ່ມີຄວາມສົນໃຈຢາກມີວິຊາຊີບເສີມ ໃນສົກປີ 2016-2020 ໄດ້ຈຳນວນທັງໝົດ 628 ຄົນ.


ຈາກນັ້ນ, ໃນພິທີ ກໍ່ໄດ້ມີການມອບ-ຮັບໃບຢັ້ງຢືນຈົບຊັ້ນມັດທະຍົມສຶກສາຕອນຕົ້ນບຳລຸງທົ່ວແຂວງສະຫວັນນະເຂດຢ່າງເປັນທາງການ ຊຶ່ງໃຫ້ກຽດມອບໂດຍທ່ານລັດຖະມົນຕີກະຊວງສຶກສາທິການ ແລະກິລາ ແລະໃຫ້ກຽດຕາງໜ້າແຂວງຮັບໃບຢັ້ງຢືນໃນຄັ້ງຂອງທ່ານເຈົ້າແຂວງສະຫວັນນະເຂດ.


ໂອກາດຽວກັນນີ້, ໃນພິທີ ຍັງໄດ້ມີການປະດັບຫຼຽນ ແລະໃບຍ້ອງຍໍຂັ້ນຕ່າງໆ ໃຫ້ບຸກຄົນ ແລະກົມກອງ ທີ່ມີຜົນງານດີເດັ່ນ ປະກອບສ່ວນທາງດ້ານເຫື່ອແຮງ, ສະຕິປັນຍາໃນການຊີ້ນຳໆພາ ແລະເຄື່ອນໄຫວວຽກງານຂະບວນການຮຽນ-ການສອນໃນບັ້ນປະກາດຈົບຊັ້ນມັດທະຍົມຕອນຕົ້ນບຳລຸງສາຍປະຊາຊົນທົ່ວແຂວງສະຫວັນນະເຂດຕະຫຼອດໃນໄລຍະ 5 ປີຜ່ານມາ(2015-2020) ໃນນີ້ ໄດ້ມີການປະດັບຫຼຽນໄຊແຮງງານຊັ້ນ I ໃຫ້ຈຳນວນ 24 ທ່ານ, 1 ກົມກອງ, ຫຼຽນໄຊແຮງງານຊັ້ນ II ມີ 87 ທ່ານ, 8 ກົມກອງ, ຫຼຽນໄຊແຮງງານຊັ້ນ III ຈຳນວນ 130 ທ່ານ, 13 ກົມກອງ ແລະຫຼຽນກາແຮງງານ 202 ທ່ານກັບ 17 ກົມກອງ, ຈາກນີ້ ກໍ່ໄດ້ມອບໃບຍ້ອງຍໍລັດຖະບານໃຫ້ຈຳນວນ 328 ທ່ານກັບ 16 ກົມກອງ, ໃບຍ້ອງຍໍກະຊວງສຶກສາທິການ ແລະກິລາໃຫ້ 202 ທ່ານ ແລະ 14 ກົມກອງ, ມອບໃບຍ້ອງຍໍທ່ານເຈົ້າແຂວງສະຫວັນນະເຂດ ໃຫ້ພະນັກງານ-ຄູອາຈານຈຳນວນ 319 ທ່ານ ກັບ27 ກົມກອງ ແລະໃບຍ້ອງຍໍຫົວໜ້າພະແນກສຶກສາທິການ ແລະກິລາແຂວງອີກຈຳນວນ 143 ທ່ານ, 13 ກົມກອງ.


ໃນຕອນທ້າຍຂອງພິທີ, ກໍ່ໄດ້ຮັບຟັງການໂອ້ລົມໃຫ້ທິດຊີ້ນຳຕໍ່ວຽກງານການພັດທະນາການສຶກສາຂອງແຂວງສະຫວັນນະເຂດຈາກທ່ານ ນາງ ແສງເດືອນ ຫຼ້າຈັນທະບູນ ຈາກນັ້ນ, ບັນດາທ່ານຄະນະການນຳຂັ້ນສູນກາງ ແລະທ້ອງຖິ່ນ ພ້ອມດ້ວຍບັນດາທ່ານແຂກທີ່ເຂົ້າຮ່ວມໃນພິທີຄັ້ງນີ້ ກໍ່ໄດ້ຮ່ວມກັນລັ່ນຄ້ອງ 9 ບາດ ແລະເປີດປ້າຍແຂວງສະຫວັນນະເຂດ ສຳເລັດການຈັດການຮຽນ-ການສອນບຳລຸງຊັ້ນມັດທະຍົມຕອນຕົ້ນທົ່ວແຂວງຢ່າງເປັນທາງການ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ