ພະແນກພາຍໃນແຂວງບໍ່ແກ້ວ ແລະ ຫ້ອງການພາຍໃນເມືອງ ໄດ້ຮັບລົດຈັກ - Laoedaily

ພະແນກພາຍໃນແຂວງບໍ່ແກ້ວ ແລະ ຫ້ອງການພາຍໃນເມືອງ ໄດ້ຮັບລົດຈັກ

ພະນັກງານຫ້ອງການກະຊວງພາຍໃນ ໄດ້ນໍາພາຫະນະລົດຈັກ ຈໍານວນ 6 ຄັນ ມາມອບໃຫ້ແກ່ຂະແໜງຄຸ້ມຄອງພົນລະເມືອງ ພະແນກພາຍໃນແຂວງບໍ່ແກ້ວ ແລະ ໜ່ວຍງານຄຸ້ມຄອງພົນລະເມືອງ ຫ້ອງການພາຍໃນເມືອງ 5 ເມືອງເພື່ອນໍາໃຊ້ເຂົ້າໃນການເຄື່ອນໄຫວຈັດຕັ້ງປະຕິບັດວຽກງານຂອງໂຄງການຈົດທະບຽນ ແລະ ສະຖິຕິພົນລະເມືອງ.

ພິທີ ມອບ-ຮັບໄດ້ຈັດຂຶ້ນໃນວັນທີ 27 ທັນວານີ້ ທີ່ພະແນກພາຍໃນແຂວງ ເຂົ້າຮ່ວມມີ ທ່ານ ເສົາທຽນ ວົງໄຊຍາ ຮອງຫົວໜ້າກົມຄຸ້ມຄອງພົນລະເມືອງ ຊົນເຜົ່າ ແລະ ສາສະໜາ, ທ່ານ ນາງ ດາວ ໄຊເສດຖາ ກໍາມະການພັກແຂວງ ຫົວຫນ້າພະແນກພາຍໃນແຂວງບໍ່ແກ້ວ.

ໃນພິທີຄະນະຮັບຜິດຊອບໄດ້ຜ່ານມະຕິຕົກລົງ ຂອງກະຊວງພາຍໃນ ວ່າດ້ວຍການມອບພາຫະນະລົດຈັກ ໃຫ້ແກ່ພະແນກພາຍໃນຂັ້ນແຂວງ ແລະ ຫ້ອງການພາຍໃນຂັ້ນເມືອງ ແຕ່ສູນກາງຫາທ້ອງຖິ່ນ ໃນທົ່ວປະເທດເປັນຜູ້ຄຸ້ມຄອງນໍາໃຊ້,ໂດຍໄດ້ຮັບທຶນສະໜັບສະໜູນ ຈາກທະນາຄານໂລກ. ໃນນີ້ ໄດ້ມອບໃຫ້ແກ່ຂະແໜງຄຸ້ມຄອງພົນລະເມືອງ ພະແນກພາຍໃນແຂວງ 1 ຄັນ ແລະ ໜ່ວຍງານຄຸ້ມຄອງພົນລະເມືອງ ຂອງຫ້ອງການພາຍໃນເມືອງ 5 ເມືອງ, ເມືອງລະ 1 ຄັນ ເພື່ອນໍາໃຊ້ເຂົ້າໃນການລົງເຄື່ອນໄຫວເຮັດວຽກງານ ຈົດທະບຽນ ແລະ ສະຖິຕິພົນລະເມືອງ ຂອງໂຄງການໃຫ້ມີຄວາມສະດວກວ່ອງໄວກວ່າເກົ່າ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ