ແຮ່ນນ້າ 4 EVE ສາວນ້ອຍຜູ້ທີ່ເຕັມໄປດ້ວຍຄວາມສາມາດ - Laoedaily

ແຮ່ນນ້າ 4 EVE ສາວນ້ອຍຜູ້ທີ່ເຕັມໄປດ້ວຍຄວາມສາມາດ

ໄວໜຸ່ມຂະນະນີ້ ບໍ່ມີໃຜທີ່ຈະບໍ່ຮູ້ຈັກສາວນ້ອຍຄົນນີ້ ແຮ່ນນ້າ ໂຮເຊັ້ນບູ້ມ ຫຼື ແຮ່ນນ້າ 4EVE ເຊິ່ງເປັນສາວນ້ອຍຄົນລາວໜຶ່ງໃນ 7 ສະມາຊິກຂອງວົງ 4EVE ທີ່ຫາກໍ່ປ່ອຍຜົນງານເພງອອກມາໃໝ່ໆ ໝາດໆ ໃຫ້ແຟນຄລັບໄດ້ຊົມ ແລະ ຟັງກັນ ເຊິ່ງເຮັດໃຫ້ຜົນການຕອບຮັບຈາກບົດເພງ Oohlala ແມ່ນມີກະແສຕອບຮັບຈາກແຟນໆ.

ສາວນ້ອຍແຮ່ນນ້າຄົນນີ້ ເປັນຜູ້ທີ່ປ່ຽມລົ້ນດ້ວຍ ຄວາມໜ້າຮັກ ມີສະເໜ່ ບວກກັບພອນສະຫວັນ ແລະ ພອນສະແຫວງ ທີ່ເຮັດໃຫ້ສາວນ້ອຍຄົນນີ້ ມີຜົນງານຫຼາຍໆຢ່າງໃນວົງການບັນເທີງລາວ ແລະ ວົງການບັນເທີງຂອງປະເທດເພື່ອນບ້ານ (ປະເທດໄທ) ນັ້ນກໍ່ຄືວົງ 4EVE. ນອກຈາກນີ້ ສາວນ້ອຍແຮ່ນນ້າຍັງໄດ້ຜ່ານເວທີການປະກວດຕ່າງໆ ມາຫຼາຍພໍສົມຄວນ ເວົ້າໄດ້ວ່າ ເກັ່ງ ແລະ ໜ້າຮັກຢ່າງດຽວບໍ່ພຽງພໍ ແຕ່ຕ້ອງມີຄວາມສະແຫວງຫາປະສົບການຢູ່ເລື້ອຍໆ.

ທີມຂ່າວເສດຖະກິດ-ການຄ້າ ໄດ້ສຳພາດ ແຮ່ນນ້າ 4EVE ກ່ຽວກັບຜົນງານ ທີ່ຫາກໍ່ໄດ້ປ່ອຍໃນອາທິດທີ່ຜ່ານມາວ່າເປັນແນວໃດ: ຜົນຕອບຮັບແມ່ນອອກມາດີ ເຮັດໃຫ້ຍອດວິວຂຶ້ນໄວຫຼາຍ ພ້ອມທັງໄດ້ຮັບຄວາມນິຍົມຈາກຄົນໄທ ເເລະ ຊາວຕ່າງຊາດຫຼາຍ ພຽງແຕ່ປ່ອຍເພງອອກໄປບໍ່ດົນກໍເຮັດໃຫ້ມີຄລິບ reaction ຈາກ youtuber ຊື່ດັງຈາກຫຼາຍປະເທດ ແມ່ນແຕ່ຄົນຝຣັ່ງກໍຟັງ ແຮ່ນນ້າຮູ້ສຶກດີໃຈຫຼາຍທີ່ຜົນງານທຳອິດ ແມ່ນມີກະແສຕອບຮັບທີ່ດີ.

ແຟນຄລັບຫຼາຍຄົນ ອາດຈະຢາກຮູ້ວ່າ ຊ່ວງທີ່ແຮ່ນນ້າໄດ້ເຂົ້າຮ່ວມການແຂ່ງຂັນຢູ່ໃນລາຍການທີ່ປະເທດເພື່ອນບ້ານ (ປະເທດໄທ) ແຮ່ນນ້າ ມີວິທີຈັດການບໍລິຫານຕາລາງການເຮັດວຽກ ແລະ ການຮຽນແນວໃດ?: ກ່ອນຕັດສິນໃຈປະກວດ ເເຮ່ນນ້າ ຄິດໜັກຫຼາຍ ເພາະວ່າຕົນເອງຕ້ອງໄດ້ຄິດເພື່ອໄວ້ ຖ້າວ່າແຮ່ນນ້າເຂົ້າຮອບແລ້ວ ແຮ່ນນ້າຕ້ອງໄດ້ໃຊ້ຊີວິດຢູ່ໄທ ແລ້ວກໍຄິດເລື່ອງວຽກຢູ່ລາວກັບການຮຽນເພາະຕອນນັ້ນ ແຮ່ນນ້າ ຢູ່ ມ.7 ແລະ ສິ່ງທຳອິດທີ່ແຮ່ນນ້າຕ້ອງເຮັດຄື ປືກສາຄອບຄົວເລື່ອງການຮຽນ ແລະ ຄ່າໃຊ້ຈ່າຍຕ່າງໆ ເພາະ ແຮ່ນນ້າ ໄດ້ເລືອກທີ່ຈະມາຮຽນຕໍ່ຢູ່ໄທ ໂດຍສ່ວນຕົວແຮ່ນນ້າ ຕັ້ງໃຈຈະ ຮຽນຕໍ່ຢູ່ໄທແນ່ ເລີຍສວຍໂອກາດເຂົ້າແຂ່ງຂັນ ລາຍການ Girlgroup ໄປພ້ອມ ຈຶ່ງເຮັດໃຫ້ແຮ່ນນ້າສາມາດບໍລິຫານຈັດການຕາລາງຮຽນໄດ້ງ່າຍຂຶ້ນ (ໃນຊ່ວງການແຂ່ງຂັນໂຮງຮຽນໃຫ້ຮຽນ online ແຮ່ນນ້າກໍເລີຍມີເວລາ ສຸມໃສ່ການແຂ່ງໄດ້ຫຼາຍຂຶ້ນ ສ່ວນວຽກບ້ານ ແຮ່ນນ້າ ກໍເຮັດສົ່ງອາຈານປົກກະຕິຕາມກຳໜົດ). ສ່ວນເລື່ອງວຽກຢູ່ລາວ ແຮ່ນນ້າ ໄດ້ຢຸດຊ່ວງໜຶ່ງ ເພື່ອການແຂ່ງຂັນ ແຕ່ກະຍັງມີລູກຄ້າ ສົ່ງສິນຄ້າມາໃຫ້ຣີວິວຮອດໄທ ແລະ ກໍໄດ້ຮັບງານຢູ່ໄທໄປພ້ອມໆກັນ.

ການທີ່ ແຮ່ນນ້າ ເລືອກໄປຄັດເລືອກ ມັນເປັນສິ່ງທີ່ທ້າທາຍກັບແຮ່ນນ້າແນວໃດ?: ດ້ວຍເວລາທີ່ສັ້ນ ແລະ ຕ້ອງກຽມໂຕໃຫ້ທັນ ໂດຍສ່ວນໂຕ ແຮ່ນນ້າເປັນຄົນເຕັ້ນບໍ່ແຂງ ແລະ rap ບໍ່ເປັນ ແຕ່ແຮ່ນນ້າກໍໃຊ້ທຸກວິນາທີໃຫ້ມີຄ່າ ແລະ ຕັ້ງໃຈຊ້ອມ.

ອຸປະສັກຕ່າງໆ ທີ່ແຮ່ນນ້າຕ້ອງໄດ້ພົບ ແຮ່ນນ້າມີວິທີຈັດການກັບມັນແນວໃດ?: ຕັ້ງສະຕິ ເພາະມີຫຼາຍເທື່ອທີ່ ແຮ່ນນ້າ ຮູ້ສຶກທໍ້ຖອຍ ແລະ ບໍ່ຢາກເເຂ່ງຕໍ່ ແຕ່ຄອບຄົວ, ໝູ່, ອ້າຍເອື້ອຍນ້ອງ, ແຟນຄລັບ ກໍຈະສົ່ງກຳລັງໃຈມາໃຫ້ ເລີຍເຮັດໃຫ້ໂຕເອງຮູ້ສຶກຢາກສູ້ຕໍ່.

ແລ້ວກ່ອນທີ່ຈະມາເປັນ ແຮ່ນນ້າ ທີ່ທຸກຄົນຮູ້ຈັກໃນມື້ນີ້ ຜ່ານມາ ແຮ່ນນ້າ ມີວິທີແນວໃດໃນກັບຮັບມືກັບບັນຫາ?: ຢາກຈະບອກວ່າ ແຮ່ນນ້າ ຜ່ານມາຫຼາຍເວທີ ແລ້ວບໍ່ເຄີຍຊະນະເລີຍ, 4EVE Girlgroup ເປັນເວທີທຳອິດໃນຊີວິດ ທີ່ແຮ່ນນ້າຊະນະ ເພາະກ່ອນໜ້ານີ້ ທຸກຄົນກໍຈະຄຸ້ນໜ້າແຮ່ນນ້າໃນເວທີ Missteen laos, Sofy girl, pepsi singing contest ຫຼື ເວທີສາກົນ Miss asia global ແລະອື່ນໆ ແຕ່ເວທີເຫຼົ່ານີ້ແຮ່ນນ້າບໍ່ເຄີຍໄດ້ທີ 1 ເລີຍ ເເຕ່ແຮ່ນນ້າກໍບໍ່ຢຸດທີ່ຈະພັດທະນາຕົນເອງ. ບາງຄົນເເຂ່ງເວທີດຽວແລ້ວທໍ້ ບໍ່ຢາກແຂ່ງຕໍ່ ຖ້າເຮົາມີຄວາມຄິດແບບນີ້ເຮົາຈະບໍ່ມີວັນເຖິງເປົ້າໝາຍຕົວເອງ ເພາະສະນັ້ນຫ້າມຢຸດພັດທະນາ ຖ້າມື້ນີ້ບໍ່ແມ່ນມື້ຂອງເຮົາ ມັນຕ້ອງມີມື້ໜຶ່ງທີ່ເປັນຂອງເຮົາເເນ່ນອນ ເເລ້ວທຸກຄົນຈະຮັກໃນສິ່ງທີ່ເຈົ້າເປັນ.

ຂອບໃຈຮູບຈາກ: 4EVE, Hannah Rosenbloom

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ