ສາວຕານ້ອຍ ຮອງອັນດັບ 2 ນາງສາວລາວ 2020 ຕອບຮັບເຂົ້າຮ່ວມບານສົ່ງອີກຄັ້ງ ເມື່ອມີໂອກາດ - Laoedaily

ສາວຕານ້ອຍ ຮອງອັນດັບ 2 ນາງສາວລາວ 2020 ຕອບຮັບເຂົ້າຮ່ວມບານສົ່ງອີກຄັ້ງ ເມື່ອມີໂອກາດ

ເປັນອີກເຫດການທີ່ເດັ່ນປະຈໍາປີ 2020 ໄປເລີຍກໍວ່າໄດ້ ສໍາລັບ ນາງ ພິມມະສອນ ວໍລະສັກ ( ຕານ້ອຍ ) ທີ່ປີນີ້ບໍ່ໄດ້ລົງແຂ່ງຂັນບານສົ່ງ ໃນລາຍການທົ່ວປະເທດ ຊີງຂັນປະທານສະຫະພັນບານສົ່ງແຫ່ງຊາດລາວ 2020 ເນື່ອງຈາກຕິດພາລະກິດ ຫຼັງຈາກທີ່ເຂົ້າປະກວດນາງສາວລາວປະຈໍາປີ 2020 ສາມາດຍາດໄດ້ຮອງອັນດັບ 2.

ສາວຕານ້ອຍ ແຈ້ງເກີດ ແລະ ກາຍເປັນດາວປະຈໍາວົງການບານສົ່ງລາວ ຢ່າງເຕັມຕົວ ໃນປີ 2019 ຫຼັງເປັນນັກກີລາຕົວຫຼັກຂອງທີມ ມະຫາວິທະຍາໄລແຫ່ງຊາດລາວ ( ມຊ ) ເຂົ້າຮ່ວມການແຂ່ງຂັນບານສົ່ງທົ່ວປະເທດ ຊີງຂັນປະທານສະຫະພັນບານສົ່ງແຫ່ງຊາດລາວ ປະຈໍາປີ 2019 ເຖິງວ່າ ຈະບໍ່ສາມາດພາທີມຜ່ານເຂົ້າຮອບ 4 ທີມໄດ້ ແຕ່ຕານ້ອຍກໍຫຼິ້ນໄດ້ໂດດເດັ່ນສົມກັບໜ້າຕາທີ່ງົດງາມ.

ຢ່າງໃດກໍຕາມ, ໃນຕົ້ນປີນີ້ ສາວ ຕານ້ອຍ ວໍລະສັກ ລົງຫຼິ້ນໃຫ້ກັບ ຄະນະເສດຖະສາດ ແລະ ບໍລິການທຸລະກິດ ( ຄສບ ) ສາມາດພາທີມຄ້ວາແຊັມບານສົ່ງຍິງ ໃນງານແຂ່ງຂັນກີລານັກສຶກສາທົ່ວ ມະຫາວິທະຍາ ໄລແຫ່ງຊາດ ຄັ້ງທີ 11 ປະຈຳສົກສຶກສາ 2019-2020 ເມື່ອວັນທີ 23 ມັງກອນ 2020.

ຫຼ້າສຸດ ຕານ້ອຍ ໄດ້ເຂົ້າປະກວດນາງສາວລາວປະຈໍາປີ 2020 ເມື່ອບໍ່ດົນມານີ້ ກໍສາມາດຍາດໄດ້ຮອງອັນດັບ 2 ເຮັດໃຫ້ ຕານ້ອຍ ບໍ່ໄດ້ເຂົ້າຮ່ວມແຂ່ງຂັນບານສົ່ງທົ່ວປະເທດໃນປີນີ້ ເນື່ອງຈາກຕິດພາລະກິດກັບວົງການນາງສາວລາວ, ແຕ່ຢ່າງໃດກໍຕາມ ໃນພິທີເປີດ ແລະ ປິດການແຂ່ງຂັນບານສົ່ງທົ່ວປະເທດ ລະຫວ່າງວັນທີ 19-26 ທັນວາ 2020 ຕານ້ອຍ ກໍໄດ້ເຂົ້າຮ່ວມ ແລະ ກ່າວເຖິງປະສົບການ ລວມເຖິງໃຫ້ກໍາລັງໃຈນັກບານສົ່ງທຸກທີມ ແນ່ນອນວ່າກອງເຊຍຫຼາຍໆຄົນກໍຕັ້ງໜ້າລໍຖ້າການກັບມາລົງແຂ່ງຂັນຂອງ ຕານ້ອຍ ໃນອະນາຄົດ.

ໃນພິທີໄປຮ່ວມງານການແຂ່ງຂັນບານສົ່ງເມື່ອທ້າຍອາທິດທີ່ຜ່ານມາ ຕານ້ອຍ ກ່າວວ່າ: (ເບິ່ງຄລິບລຸ່ມນີ້)

ສໍາລັບ ພິມມະສອນ ວໍລະສັກ ເປັນສາວງາມຈາກແຂວງ ໄຊຍະບູລີ ໄດ້ຮັບຕຳແໜ່ງຮອງອັນດັບ 2 ນາງສາວລາວ 2020 ປັດຈຸບັນອາຍຸ 21 ປີສ່ວນສູງ 168 ຊັງຕີແມັດ ກຳລັງສຶກສາຢູ່ທີ່ ມະຫາວິທະຍາໄລແຫ່ງຊາດ, ຄະນະເສດຖະສາດ ແລະ ບໍລິຫານທຸລະກິດ ສາຂາການຕະຫຼາດ ປີທີ 4 ( ປະລິນຍາຕີ ) ແລະ ກຳລັງສຶກສາຢູ່ທີ່ ວິທະຍາໄລ ໂລໂກສ ສາຂາ ພາສາອັງກິດທົ່ວໄປ ປີທີ 2 ( ຊັ້ນສູງ ).

ຂ່າວ: ຄໍາສອນ; ຮູບ: ສອນໄຊ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ