ງານບຸນຊ້າງ ໄຊຍະບູລີ ປີ 2021 ຈະຈັດນ້ອຍ ຕາມຮີດຄອງປະເພນີ - Laoedaily

ງານບຸນຊ້າງ ໄຊຍະບູລີ ປີ 2021 ຈະຈັດນ້ອຍ ຕາມຮີດຄອງປະເພນີ

ແຂວງ ໄຊຍະບູລີ ຈະໄດ້ຈັດງານບຸນຊ້າງປະຈໍາປີ 2021 ຂຶ້ນຕາມຮີດຄອງປະເພນີ ໂດຍຈະໄດ້ຈໍາກັດແຂກ ເຂົ້າຮ່ວມງານບຸນດັ່ງກ່າວເພື່ອເປັນການປະຕິບັດຕາມມາດຕະການຂອງໜ່ວຍສະເພາະກິດແຫ່ງຊາດ ໃນການຄວບຄຸມ ແລະ ແກ້ໄຂ ການລະບາດຂອງພະຍາດ ໂຄວິດ-19.

ໃນຕອນບ່າຍຂອງວັນທີ 25 ທັນວາ ຜ່ານມາ ທີ່ຫ້ອງປະຊຸມ ແນວລາວຊ້າງຊາດ ແຂວງ ໄຊຍະບູລີ ໄດ້ຈັດກອງປະຊຸມ ປຶກສາຫາລື ກ່ຽວກັບການກະກຽມຈັດງານບຸນຊ້າງ ປະຈໍາປີ 2021 ຂຶ້ນ ໂດຍການເປັນປະທານຂອງ ທ່ານ ເພັດພິໄຊ ສູນວິໄລ ກໍາມະການປະຈໍາພັກແຂວງ, ຮອງເຈົ້າແຂວງ ໄຊຍະບູລີ, ເຂົ້າຮ່ວມມີ ຫົວໜ້າ, ຮອງຫົວໜ້າ ພະແນກການ, ກົມກອງ ແລະ ພະນັກງານວິຊາການຈາກຫ້ອງວ່າການແຂວງເຂົ້າຮ່ວມ.

ໃນກອງປະຊຸມຜູ້ເຂົ້າຮ່ວມແມ່ນໄດ້ປຶກສາຫາລືກັນເພື່ອຫ້າງຫາກະກຽມໃນການຈັດງານບຸນຊ້າງປະຈໍາປີ, ໂດຍໄດ້ຕົກລົງຈັດງານບຸນຊ້າງເປັນເວລາ 1 ວັນຄື: ວັນທີ 13 ກຸມພາ 2021 ເປັນມື້ຈັດງານບຸນ, ໃນງານຈະມີການທໍາບຸນຕັກບາດເພື່ອອຸທິດບຸນກູສົນໄປໃຫ້ຊ້າງທີ່ລ່ວງລັບໄປແລ້ວ, ຈາກນັ້ນຈະໄດ້ມີການແຮ່ຊ້າງ 21 ໂຕອ້ອມເມືອງເຂົ້າສູ່ສະໜາມຫຼວງຂອງແຂວງ, ມີການບາສີສູ່ຂວັນໃຫ້ຊ້າງ ແລະ ນໍາຊ້າງກິນອາຫານບຸບເຟຖືວ່າຈົບພິທີ.ນອກນີ້ຍັງຈະມີການສະແດງສິນຄ້າທີ່ເປັນຜະລິດຕະພັນຂອງທ້ອງຖິ່ນພາຍໃນແຂວງຈໍານວນໜຶ່ງເພື່ອວາງສະແດງໃນງານບຸນຊ້າງປີນີ້.

ທ່ານ ເພັດພິໄຊ ສູນວິໄລ ກ່າວວ່າ: ການຈັດງານບຸນຊ້າງປີ2021 ນີ້ ແມ່ນຈະໄດ້ເຮັດນ້ອຍຕາມຮີດຄອງປະເພນີທີ່ເຄີຍປະຕິບັດກັນມາ, ໂດຍໄດ້ກໍານົດເອົາວັນທີ 13 ກຸມພາ 2021 ເປັນມື້້ຈັດງານບຸນ, ກໍານົດ 1 ວັນ ໂດຍໄດ້ກໍານົດຈໍານວນພົນເພື່ອເຂົ້າຮ່ວມ, ທັງໝົດນີ້ແມ່ນການປຶກສາຫາລື ແລະ ກໍານົດການຈັດງານບຸນຂັ້ນຕົ້ນ, ສ່ວນວ່າຈະໄດ້ຈັດງານບຸນດັ່ງກ່າວຫຼືບໍ່ນັ້ນແມ່ນຂັ້ນເທິງຈະເປັນຜູ້ຕັດສິນວ່າຈະອະນຸຍາດໃຫ້ຈັດຫຼືບໍ່ ແລະ ຈະໄດ້ມີການຖະແຫຼງຂ່າວໃຫ້ສັງຄົມໄດ້ຮັບຮູ້ຕາມທີ່ຫຼັງ ແລະ ດ້ານໜຶ່ງກໍ່ເພື່ອເປັນການຕ້ານ ແລະ ສະກັດກັ້ນບໍ່ໃຫ້ມີການແຜ່ລະບາດຂອງພະຍາດ ໂຄວິດ-19 ມາຍັງແຂວງ ໄຊຍະບູລີ.

ຂ່າວ-ພາບ: ອຸ່ນເຮືອນ ໂພທິລັກ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ