ສະຫາຍເລຂາທິການໃຫຍ່ ເນັ້ນ 9 ຂໍ້ ໃຫ້ ຄຊປລ ເອົາໃຈໃສ່ຈັດຕັ້ງປະຕິບັດ - Laoedaily

ສະຫາຍເລຂາທິການໃຫຍ່ ເນັ້ນ 9 ຂໍ້ ໃຫ້ ຄຊປລ ເອົາໃຈໃສ່ຈັດຕັ້ງປະຕິບັດ

ກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VIII ອັດລົງດ້ວຍຜົນສຳເລັດອັນງົດງາມ ໂດຍເປັນເອກະສັນເລືອກເອົາສະຫາຍ ອາລຸນໄຊ ສູນນະລາດ ເປັນເລຂາ ຄຊປລ. ຂະນະທີ່ສະຫາຍ ບຸນຍັງ ວໍລະຈິດເລຂາທິການໃຫຍ່ຄະນະບໍລິຫານງານສູນກາງພັກ ເນັ້ນໜັກ 9 ຂໍ້ ໃຫ້ ຄຊປລ ເອົາໃຈໃສ່ຈັດຕັ້ງປະຕິບັດ.

ກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VIII ຈັດຂຶ້ນລະຫວ່າງວັນທີ 24-25 ທັນວາ 2020 ທີ່ຫໍປະຊຸມແຫ່ງຊາດ ນະຄອນຫຼວງວຽງຈັນ ພາຍໃຕ້ການເປັນປະທານຂອງ ສະຫາຍ ອາລຸນໄຊ ສູນນະລາດ, ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກ, ເລຂາຄະນະບໍລິຫານງານສູນກາງຊາວໜຸ່ມ ປະຊາຊົນ ປະຕິວັດລາວ (ຄຊປລ); ໃຫ້ກຽດເຂົ້າຮ່ວມຂອງ ສະຫາຍ ບຸນຍັງ ວໍລະຈິດເລຂາທິການໃຫຍ່ຄະນະບໍລິຫານງານສູນກາງພັກ, ປະທານປະເທດແຫ່ງສປປລາວ.
ຕະຫຼອດໄລຍະການດຳເນີນກອງປະຊຸມ 1 ວັນເຄິ່ງ ຜູ້ແທນໄດ້ຍົກສູງຄວາມຮັບຜິດຊອບໜ້າທີ່ການເມືອງຂອງຕົນເຂົ້າໃນການຄົ້ນຄວ້າປະກອບຄຳເຫັນ ພິຈາລະນາ ແລະ ຮັບຮອງເອົາຮ່າງລາຍງານການເມືອງທີ່ໄດ້ຕີລາຄາການຈັດຕັ້ງປະຕິບັດ ມະຕິກອງປະຊຸມໃຫຍ່ ຜູ້ແທນຊາວໜຸ່ມທົ່ວປະເທດ ຄັ້ງທີ VII ໄລຍະ 5 ປີຜ່ານມາ ໂດຍໄດ້ສະຫຼຸບຕີລາຄາການນຳພາຈັດຕັ້ງປະຕິບັດໜ້າທີ່ວຽກງານຊາວໜຸ່ມ; ພ້ອມທັງຮັບຮອງເອົາທິດທາງ, ຄາດໝາຍສູ້ຊົນ, ໜ້າທີ່ວຽກງານ ຕະຫຼອດໄລຍະກອງປະຊຸມໃຫຍ່ ຄັ້ງທີ VIII ໃນ 5 ປີຕໍ່ໜ້າ (2021-2025).

ນອກຈາກນັ້ນ, ຜູ້ແທນກອງປະຊຸມຍັງໄດ້ພ້ອມກັນໃຊ້ສິດປະຊາທິປະໄຕຂອງຕົນໃນການບ່ອນບັດເລືອກຕັ້ງເອົາ ຄຊປລ ສະໄໝທີ VIII ໂດຍມີຜູ້ສະໝັກທັງໝົດ 68 ສະຫາຍ ຍິງ 8 ສະຫາຍ; ເລືອກໄດ້ 63 ສະຫາຍ, ຍິງ 7 ສະຫາຍ.

Image may contain: 11 people, people standing and people on stage

ກອງປະຊຸມຄັ້ງປະຖົມມະລຶກໄດ້ເປັນເອກະສັນເລືອກເອົາຄະນະເລຂາທິການ ສູນກາງຊາວໝຸ່ມປະຊາຊົນ ປະຕິວັດລາວ ຈຳນວນ 13 ສະຫາຍ, ຍິງ 2 ສະຫາຍ; ກອງປະຊຸມເປັນເອກະສັນ ເລືອກເອົາສະຫາຍ ອາລຸນໄຊ ສູນນະລາດ ເປັນເລຂາ ຄຊປລ; ສະຫາຍ ບຸນຕາ ເທບພະວົງ, ສະຫາຍ ນວນທອງ ສຸວັນວິໄຊ ແລະ ສະຫາຍ ທອງຈັນ ພູມີພັນ ເປັນຮອງເລຂາ. ເລືອກເອົາ ສະຫາຍ ນວນທອງ ສຸວັນວິໄຊ ເປັນປະທານກວດກາ, ສະຫາຍ ສຸລິຍາ ສີດາວົງ ເປັນຮອງປະທານກວດກາ.

ໃນໂອກາດດັ່ງກ່າວ ສະຫາຍ ບຸນຍັງ ວໍລະຈິດ ໄດ້ໂອລົມຕໍ່ກອງປະຊຸມ ໂດຍໄດ້ຍ້ອງຍໍຊົມເຊີຍ ຕໍ່ຜົນສຳເລັດໃນການຈັດຕັ້ງປະຕິບັດວຽກງານກອງປະຊຸມໃຫຍ່ຜູ້ ແທນຊາວໜຸ່ມທົ່ວປະເທດ ຄັ້ງທີ VII, ການປະກອບສ່ວນຂອງຊາວໜຸ່ມ-ເຍົາວະຊົນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ ຕະຫຼອດໄລຍະ 5 ປີຜ່ານມາ. ພ້ອມໄດ້ເນັ້ນໜັກຕໍ່ ຄຊປລ ສະໄໝທີ VIII ໃຫ້ເອົາໃຈໃສ່ບາງໜ້າວຽກຄື:

1) ໃຫ້ຄະນະຊາວໜຸ່ມທຸກຂັ້ນ ເອົາໃຈໃສ່ສຸດຂີດໃນການປົກປັກຮັກສາໝາກຜົນຂອງການປະຕິວັດ, ສືບທອດມູນເຊື້ອອັນດີງາມຂອງຊາດ ແລະ ຂອງຊາວໜຸ່ມ;

2) ຕັ້ງໜ້າສຶກສາອົບຮົມພະນັກງານຊາວໜຸ່ມ, ສະມາຊິກຊາວໜຸ່ມ ໃຫ້ມີຄຸນທາດການເມືອງໜັກແໜ້ນ, ມີນ້ຳໃຈຮັກຊາດ;

3) ເປັນເຈົ້າການໃນການເຕົ້າໂຮມຄວາມສາມັກຄີ, ປຸກລະດົມຊາວໜຸ່ມ, ເຍົາວະຊົນ ແລະ ອະນຸຊົນລາວບັນດາເຜົ່າ;

Image may contain: 1 person

4) ໃຫ້ຄະນະພັກ, ອົງການປົກຄອງ, ອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນທຸກຂັ້ນ ຕ້ອງສືບຕໍ່ເພີ່ມທະວີໃນການສຶກສາອົບຮົມ, ບຳລຸງສ້າງ ແລະ ສ້າງເງື່ອນໄຂ ເອື້ອອຳນວຍໃນການເຄື່ອນໄຫວພັດທະນາ ແລະ ປົກປ້ອງສິດຜົນປະໂຫຍດອັນຊອບທຳຂອງ ຊາວໜຸ່ມ-ເຍົາວະຊົນລາວບັນດາເຜົ່າ;

5) ຄະນະຊາວໜຸ່ມປະຊາຊົນປະຕິວັດລາວ ແຕ່ລະຂັ້ນ ຕ້ອງເອົາໃຈໃສ່ປັບປຸງການຈັດຕັ້ງຂອງຕົນໃຫ້ມີຄວາມ ໜັກແໜ້ນເຂັ້ມແຂງທາງດ້ານປະລິມານ ແລະ ຄຸນນະພາບ, ຂະຫຍາຍສະມາຊິກໃຫ້ກ້ວາງ ຂວາງ;

6) ຍົກສູງຄວາມຮູ້ຄວາມສາມາດ, ຫົວຄິດປະດິດສ້າງທາງດ້ານວິທະຍາ ສາດ-ເຕັກໂນໂລຊີ, ICT, ປົກປ້ອງສິດຜົນປະໂຫຍດອັນຊອບທຳ, ຕ້ານ ແລະ ສະກັດກັ້ນປະກົດການຫຍໍ້ທໍ້ຂອງຊາວໜຸ່ມ-ເຍົາວະຊົນ;

7) ອອກແຮງແຂ່ງຂັນສ້າງຂະບວນການຂອງຊາວໜຸ່ມ-ເຍົາວະຊົນ ໃຫ້ມີຄວາມຟົດຟື້ນ, ຫ້າວຫັນ, ມີເນື້ອໃນຕິດພັນກັບການສຶກສາອົບຮົມ ໂດຍການສືບຕໍ່ຈັດຕັ້ງປະຕິບັດຂໍ້ແຂ່ງຂັນຮັກຊາດ-ພັດທະນາ, ວຽກງານ 3 ສ້າງຂອງພັກ, ດ້ວຍຂະບວນການແຂ່ງຂັນ 4 ບຸກຂອງຊາວໜຸ່ມ ແລະ 3 ດີ 4 ຮູ້ຂອງເຍົາວະຊົນ ທັນວາ ຕິດພັນກັບຄໍາຂວັນທີ່ວ່າ “ບ່ອນໃດຍາກຊາວໜຸ່ມບຸກ ບ່ອນໃດທຸກຊາວໜຸ່ມມີໜ້າ ເມື່ອໃດຊາດຕ້ອງການຊາວໜຸ່ມຂານອາສາ”;

8) ໃນຍຸກແຫ່ງຂໍ້ມູນຂ່າວສານ, ຍຸກແຫ່ງການເຊື່ອມໂຍງທີ່ມີທັງສິ່ງທີ່ເປັນກາລະໂອກາດ ແລະ ມີສິ່ງທ້າທາຍຫຼາຍປະການ, ຊາວໜຸ່ມໃນຍຸກນີ້ ຕ້ອງປູກຈິດສຳນຶກໃຫ້ເຂົາເຈົ້າຮັບຮູ້ ແລະ ເຂົ້າໃຈຢ່າງຖືກຕ້ອງໃນການບໍລິໂພດຂໍ້ມູນຂ່າວສານ

9) ເພີ່ມທະວີການພົວພັນຮ່ວມມືກັບຊາວໜຸ່ມບັນດາປະເທດເພື່ອນມິດຍຸດທະສາດ, ບັນດາປະເທດໃນພາກພື້ນ ແລະ ສາກົນ, ອົງການຈັດຕັ້ງສາກົນ ແລະ ອົງການຈັດຕັ້ງທີ່ບໍ່ຂຶ້ນກັບລັດຖະບານ ເພື່ອຍາດແຍ່ງເອົາການສະໜັບສະໜູນ ແລະ ການຊ່ວຍເຫຼືອ ເປັນຕົ້ນ: ບົດຮຽນ, ເຕັກນິກ-ວິທະ ຍາສາດ, ທຶນຮອນ, ວັດຖຸ-ອຸປະກອນ ເພື່ອມາພັດທະນາປະເທດຊາດ ກໍ່ຄືຊາວໜຸ່ມ-ເຍົາວະຊົນລາວໃຫ້ເຂັ້ມແຂງໄປສູ່ຄຸນນະພາບໃໝ່.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ