24 ທັນວາ ລາວບໍ່ພົບຜູ້ຕິດເຊື້ອໃໝ່ ຂະນະທີ່ ສາທາ ສືບຕໍ່ຮຽກຮ້ອງໃຫ້ປະຊາຊົນລາວ ຈົ່ງເພີ່ມທະວີການປ້ອງກັນໃຫ້ຫຼາຍຂຶ້ນກວ່າເກົ່າ - Laoedaily

24 ທັນວາ ລາວບໍ່ພົບຜູ້ຕິດເຊື້ອໃໝ່ ຂະນະທີ່ ສາທາ ສືບຕໍ່ຮຽກຮ້ອງໃຫ້ປະຊາຊົນລາວ ຈົ່ງເພີ່ມທະວີການປ້ອງກັນໃຫ້ຫຼາຍຂຶ້ນກວ່າເກົ່າ

ການເຝົ້າລະວັງ ແລະ ປ້ອງກັນການແຜ່ລະບາດຂອງເຊື້ອພະຍາດໂຄວິດ-19 ໃນ ສປປ ລາວ ມາຮອດວັນທີ 24 ທັນວາ 2020 ແມ່ນບໍ່ພົບຜູ້ຕິດເຊື້ອໃໝ່ເພີ່ມ ແຕ່ດ້ານຄະນະສະເພາະກິດ ຍັງເນັ້ນສືບຕໍ່ໃຫ້ພໍ່ແມ່ປະຊາຊົນເຂັ້ມງວດປະຕິບັດຕາມມາດຕະການປ້ອງກັນໃຫ້ຫຼາຍຂຶ້ນກວ່າເກົ່າ ເນື່ອງຈາກປັດຈຸບັນຍັງມີການຄົມມະນາຄົມມາຈາກຕ່າງປະເທດເດີນທາງເຂົ້າລາວ ເຊິ່ງຫຼ້າສຸດວັນທີ 23 ທັນວາ ທົ່ວປະເທດມີຜູ້ເດີນທາງເຂົ້າມາ ທັງໝົດ 2.943 ຄົນ.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດ ໂຄວິດ-19 ໄດ້ຖະແຫຼງໃນວັນທີ 24 ທັນວາ 2020 ວ່າ: ສໍາລັບການເຝົ້າລະວັງ ໂຄວິດ-19 ຢູ່ ສປປ ລາວ ຮອດ 17:00 ໂມງ ຂອງວັນທີ 23 ທັນວາ 2020 ການຕິດຕາມຜູ້ເດີນທາງຈາກຈຸດຜ່ານແດນຕ່າງໆ ທົ່ວປະເທດມີຜູ້ເດີນທາງເຂົ້າມາ ທັງໝົດ 2.943 ຄົນ: ໃນນັ້ນ; ຈຸດຜ່ານດ່ານ ລາວ – ໄທ 1.872 ຄົນ (ແຮງງານລາວກັບມາແຕ່ໄທ 115 ຄົນ); ຈຸດຜ່ານດ່ານ ລາວ – ຈີນ 90 ຄົນ; ຈຸດຜ່ານດ່ານ ລາວ – ຫວຽດນາມ 840 ຄົນ; ຈຸດຜ່ານດ່ານ ລາວ – ກຳປູເຈຍ ທັງໝົດ 2 ຄົນ; ເດີນທາງຜ່ານ ສະໜາມບິນສາກົນວັດໄຕ ທັງໝົດ 139 ຄົນ (ຄົນຈີນ 138 ຄົນ, ຄົນລາວ 1 ຄົນ) ເຊິ່ງທຸກຄົນແມ່ນໄດ້ແທກອຸນຫະພູມຮ່າງກາຍ, ແຕ່ບໍ່ພົບຜູ້ມີອາການເປັນໄຂ້ ແລະ ໄດ້ເກັບຕົວຢ່າງທຸກໆຄົນມາກວດ (ຍົກເວັ້ນຜູ້ຂັບລົດຂົນສົ່ງ ແລະ ຜູ້ຕິດຕາມ) ແລ້ວຈຶ່ງນຳສົ່ງໄປຫາສະຖານທີ່ ຈຳກັດບໍລິເວນທີ່ກຳນົດໄວ້ຈົນກວ່າຈະຄົບກຳນົດ 14 ວັນ.

ສຳລັບການຕິດຕາມຜູ້ຖືກຈຳກັດບໍລິເວນຢູ່ໃນສະຖານທີ່ ທີ່ກຳນົດໄວ້ໃນຂອບເຂດທົ່ວປະເທດ ປະຈຸບັນ ທົ່ວປະເທດສູນຈໍາກັດບໍລິເວນທີ່ຍັງເປີດຢູ່ ມີທັງໝົດ 38 ສູນ, ມີຜູ້ຖືກຈຳກັດບໍລິເວນຢູ່ສູນ 2.152 ຄົນ, ໄດ້ເກັບຕົວຢ່າງມາກວດວິເຄາະ ທັງໝົດ ແລະ ບໍ່ພົບຜູ້ຕິດເຊື້ອ. ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 23 ທັນວາ 2020, ໄດ້ເກັບຕົວຢ່າງມາກວດວິເຄາະທັງໝົດ 259 ຄົນ, ໃນນັ້ນ ມີ 2 ຕົວຢ່າງຈາກບຸກຄົນທົ່ວໄປມີອາການ; 35 ຕົວຢ່າງຈາກບຸກຄົນທົ່ວໄປບໍ່ມີອາການ; ແຮງງານລາວກັບມາແຕ່ໄທບໍ່ມີອາການ 81 ຕົວຢ່າງ; ແຮງງານຈີນບໍ່ມີອາການ 140 ຕົວຢ່າງ ແລະ ແຮງງານລາວມາແຕ່ຈີນບໍ່ມີອາການ 1 ຕົວຢ່າງ; ຜົນກວດວິເຄາະທັງໝົດ ແມ່ນບໍ່ພົບເຊື້ອ, ໝາຍຄວາມວ່າ ວັນທີ 23 ທັນວາ 2020 ບໍ່ພົບຜູ້ຕິດເຊື້ອໃໝ່; ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 23 ທັນວາ 2020 ໄດ້ເກັບຕົວຢ່າງມາກວດທັງໝົດ 89.013 ຕົວຢ່າງ, ກວດພົບເຊື້ອສະສົມ 41 ຄົນ. ມາຮອດປະຈຸບັນ ຍັງມີຄົນເຈັບຕິດເຊື້ອພະຍາດ ໂຄວິດ-19 ຈຳນວນ 4 ຄົນ ທີ່ຍັງສືບຕໍ່ນອນປິ່ນປົວຢູ່ໂຮງໝໍທີ່ຖືກກຳນົດໄວ້, ທຸກຄົນແມ່ນມີອາການເບົາບາງ, ບໍ່ມີອາການສົນຫຍັງ.

ທ່ານກ່າວຕື່ມວ່າ: ສະພາບການລະບາດຂອງ ໂຄວິດ-19 ໃນທົ່ວໂລກ ສຳລັບ ເດືອນທັນວາ ແມ່ນຖືວ່າໜັກໜ່ວງຫຼາຍ ນັບແຕ່ເກີດມີການລະບາດມາ. ສະເພາະ ປະເທດອັງກິດ ມີລາຍງານຈຳນວນຜູ້ຕິດເຊື້ອໃໝ່ ຫຼາຍກວ່າ 1 ແສນຄົນ ພາຍໃນອາທິດດຽວ, ບາງປະເທດ ກໍ່ມີລາຍງານຈຳນວນຜູ້ເສຍຊີວິດສູງຂຶ້ນຢ່າງໜ້າກັງວົນ. ນອກຈາກນັ້ນ ບາງປະເທດ ໄດ້ປິດຊາຍແດນ ແລະ ຢຸດຕິການຂົນສົ່ງສິນຄ້າເຂົ້າ-ອອກເປັນການຊົ່ວຄາວ ສົ່ງຜົນກະທົບຕໍ່ເສດຖະກິດ ແລະ ວິຖີການດຳລົງຊີວິດປະຈຳວັນຂອງປະຊາຊົນ ທັງທາງກົງ ແລະ ທາງອ້ອມ; ສະເພາະ ສປປ ລາວ ເຮົາ ແມ່ນມີຄວາມສ່ຽງສູງທີ່ຈະມີຜູ້ຕິດເຊື້ອຈາກຕ່າງປະເທດເຂົ້າມາແຜ່ເຊື້ອ ແລະ ເກີດການລະບາດຮອບໃໝ່ ໃນປະເທດຂອງພວກເຮົາ.

ສະນັ້ນພວກເຮົາທຸກຄົນຕ້ອງເປັນເຈົ້າການຮ່ວມກັນໃນການປະຕິບັດມາດຕະການທີ່ຄະນະສະເພາະກິດວາງອອກຢ່າງເຂັ້ມງວດ ກໍ່ຄື ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 1414/ຫສນຍ, ລົງວັນທີ 23 ທັນວາ 2020 ແລະ ຄຳແນະນຳຂອງຂະແໜງການກ່ຽວຂ້ອງ ເພື່ອສະກັດກັ້ນ ການລະບາດແຕ່ຫົວທີ ບໍ່ໃຫ້ຂະຫຍາຍເປັນວົງກວ້າງ.

ສະນັ້ນ ຈຶ່ງຂໍຮຽກຮ້ອງມາຍັງ ທຸກພາກສ່ວນໃນສັງຄົມ ໃຫ້ຄວາມຮ່ວມມື ມີນ້ຳໃຈສາມັກຄີ ເປັນອັນໜຶ່ງດຽວກັນ, ມີຄວາມຮັບຜິດຊອບຕໍ່ຕົນເອງ ແລະ ສັງຄົມ ປະຕິບັດມາດຕະການປ້ອງກັນການຕິດເຊື້ອ ຢ່າງເຄັ່ງຄັດ ແລະ ເປັນປະຈຳ ເປັນຕົ້ນ ແມ່ນ ໃສ່ຜ້າອັດປາກ-ດັງ, ໝັ່ນລ້າງມືເລື້ອຍໆ ດ້ວຍນ້ຳສະອາດໃສ່ສະບູ ຫຼື ເຈວລ້າງມື, ຮັກສາໄລຍະຫ່າງ 1-2 ແມັດຂຶ້ນໄປ, ຫຼີກລ້ຽງການເດີນທາງໄປຍັງສະຖານທີ່ແອອັດ, ບໍ່ໃຊ້ເຄື່ອງຮ່ວມກັນ ເພື່ອຫຼຸດຜ່ອນໂອກາດໃນການແຜ່ເຊື້ອ ພ້ອມດຽວກັນນັ້ນ ກໍ່ໃຫ້ໝັ່ນສັງເກດອາການຂອງຕົນເອງ ຫາກມີອາການຫາຍໃຈຝືດ, ດັງບໍ່ໄດ້ກິ່ນ, ລິ້ນບໍ່ໄດ້ລົດຊາດ ໃຫ້ທ່ານໄປພົບແພດທັນທີ ເພື່ອທຳການເກັບຕົວຢ່າງກວດຊອກຫາເຊື້ອ; ຮັກຕົນເອງ, ຮັກຄອບຄົວ ແລະ ມີຄວາມຮັບຜິດຊອບຕໍ່ສັງຄົມ ດ້ວຍການ ໃສ່ຜ້າອັດປາກ-ດັງ ເປັນປະຈຳ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ