ເປີດຫ້ອງການປະສານງານ ຊາຍແດນລານຕຸ້ຍ ແຂວງຜົ້ງສາລີ ສປປ ລາວ - Laoedaily

ເປີດຫ້ອງການປະສານງານ ຊາຍແດນລານຕຸ້ຍ ແຂວງຜົ້ງສາລີ ສປປ ລາວ

ໃນວັນທີ 22 ທັນວາ 2020 ນີ້ ທີ່ດ່ານສາກົນລານຕຸ້ຍ ເມືອງຍອດອູ ແຂວງຜົ້ງສາລີ ໄດ້ຈັດພິທີ ມອບ-ຮັບ ແລະ ເປີດຫ້ອງການປະສານງານຊາຍແດນລານຕຸ້ຍ. ເຂົ້າຮ່ວມ ແລະ ກ່າວເປີດພິທີໂດຍ ທ່ານ ທອງສີ ເສົາສຸລີພົມ ຮອງເລຂາຄະນະບໍລິ ຫານງານພັກແຂວງ, ປະທານຄະນະກໍາມະການກວດກາ ແລະ ຄວບຄຸມຢາເສບຕິດແຂວງ, ມີທ່ານ ພັອ ອະນຸເດດ ຄູນຄໍາ ຮອງຫົວໜ້າຫ້ອງວ່າການກະຊວງປ້ອງກັນຄວາມສະຫງົບ, ມີທ່ານ ແສງເດືອນ ພົມມະວົງສາ ຕາງໜ້າອົງການສະຫາປະຊາຊາດ ພາກພື້ນອາຊີ ປາຊີຟິກ ຕາເວັນອອກສຽງໃຕ້, ມີ ທ່ານ ພັທ ຢິນວັນນະສຸກ ບຸດຕະນະວົງ ຮອງເລຂາຄະນະພັກ, ຮອງຫົວໜ້າກອງບັນຊາການ ປກສ ແຂວງ ພ້ອມດ້ວຍແຂກເຊີນ ຕະຫຼອດຮອດພະນັກງານ-ນັກຮົບ ປກສ ແຂວງ ແລະ ພະນັກງານປະຈໍາດ່ານສາກົນລານຕຸ້ຍເຂົ້າຮ່ວມເປັນສັກຂີພິຍານ.


ຫ້ອງການດັ່ງກ່າວ ແມ່ນໄດ້ຮັບເໝົາກໍ່ສ້າງໂດຍ ບໍລິສັດ ດາລາ ກໍ່ສ້າງເຄຫະສະຖານແຂວງຜົ້ງສາລີ ໄດ້ເລີ່ມກໍ່ສ້າງຕັ້ງແຕ່ວັນທີ 13 ຕຸລາ 2020 ແລະ ກໍ່ສ້າງສໍາເລັດໃນວັນທີ 7 ພະຈິກ 2020 ໂດຍມີອາຄານ 1 ຫຼັງ ໃນນັ້ນ, ມີຫ້ອງການເຮັດວຽກ 2 ຫ້ອງ, ຫ້ອງປະຊຸມ 1 ຫ້ອງ ແລະ ຫ້ອງນອນຂອງພະນັກງານ 2 ຫ້ອງ.

ການສ້າງຫ້ອງການປະສານງານຊາຍແດນລານຕຸ້ຍ ແມ່ນຄວາມສໍາເລັດຂອງການຮ່ວມມືລະຫວ່າງລັດຖະບານ ສປປ ລາວ ແລະ ລັດຖະບານ ສປ ຈີນ ເພື່ອເປັນບ່ອນປະສານງານ, ແລກປ່ຽນຂໍ້ມູນຂ່າວ ສານທີ່ເປັນປະໂຫຍດເຊິ່ງກັນ ແລະ ກັນ.

ນອກນັ້ນ ກໍເພື່ອເປັນການປະສານສົບທົບກັນ ໃນການສະກັດກັ້ນບັນດາບັນຫາທີ່ອາດເກີດຂຶ້ນຢູ່ລຽບຕາມຊາຍແດນ ເປັນຕົ້ນແມ່ນ ບັນຫາການກໍ່ອາດຊະຍາກໍາຂ້າມຊາດ, ບັນຫາການລັກລອບຄ້າຂາຍເຖື່ອນ, ລັກລອບຂົນສົ່ງສິ່ງເສບຕິດ, ສິ່ງທີ່ຜິດກົດໝາຍຕ່າງໆ, ບັນຫາການຄ້າມະນຸດ ແລະ ບັນຫາອື່ນໆໃຫ້ຫຼຸດໜ້ອຍຖອຍລົງເທື່ອລະກ້າວ ເພື່ອແນໃສ່ເຮັດໃຫ້ຢູ່ລຽບຕາມຊາຍແດນລະຫວ່າງສອງປະເທດມີຄວາມສະຫງົບ, ມີຄວາມປອດໄພ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ.

 

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ