ພະຍາດໝາກໄຂ່ຫຼັງ ທີ່ບໍ່ໄດ້ມາຈາກການກິນເຄັມ - Laoedaily

ພະຍາດໝາກໄຂ່ຫຼັງ ທີ່ບໍ່ໄດ້ມາຈາກການກິນເຄັມ

ອົງການອະນາໄມໂລກ ຫຼື WHO ອອກມາປະກາດໃຫ້ຄົນທົ່ວໂລກໄດ້ຄໍານຶງເຖິງການບໍລິໂພກອາຫານລົດຊາດເຄັມ ອັນເປັນປັດໄຈສ່ຽງຂອງພະຍາດໝາກໄຂ່ຫຼັງ ແຕ່ຫາກເວົ້າກັນແທ້ໆ ອາຫານລົດຊາດເຄັມກໍບໍ່ໄດ້ເປັນປັດໄຈດຽວທີ່ນຳໄປສູ່ພະຍາດໝາກໄຂ່ຫຼັງແຕ່ຢ່າງໃດ ເພາະຍັງມີສາເຫດ ແລະ ຄວາມສ່ຽງອີກຫຼາຍເລື່ອງ. ສະນັ້ນ, ເຮົາຕ້ອງມີ ຄວາມໃສ່ໃຈລະວັງຕໍ່ພະຍາດໝາກໄຂ່ຫຼັງໃຫ້ຫຼາຍກວ່ານີ້.

ສາເຫດພະຍາດໝາກໄຂ່ຫຼັງ ທີ່ບໍ່ໄດ້ມາຈາກການກິນເຄັມ

ການກິນລົດຊາດທີ່ຫວານຫຼາຍ, ມັນຫຼາຍ, ເຜັດຫຼາຍ ແລະ ອື່ນໆ.

ຫາກວ່າທ່ານບໍ່ມັກກິນອາຫານເຄັມຢູ່ແລ້ວ ກໍຢ່າຟ້າວວ່າຈະພົ້ນຈາກຄວາມສ່ຽງພະຍາດໝາກໄຂ່ຫຼັງ ເພາະຖ້າບັງເອີນທ່ານເປັນຜູ້ທີ່ມັກ ແລະ ຮັກໃນການກິນມັນ ແລະ ຫວານຫຼາຍເກີນໄປ ຄວາມສ່ຽງທີ່ເວົ້າມາກໍບໍ່ຕ່າງຈາກການກິນເຄັມ.

ດື່ມນ້ຳໜ້ອຍ

ນອກຈາກພຶດຕິກຳການກິນອາຫານແລ້ວ ການດື່ມນ້ຳໜ້ອຍກໍເປັນສາເຫດທີ່ເພີ່ມ ຄວາມສ່ຽງໃນການເປັນພະຍາດໝາກໄຂ່ຫຼັງໄດ້ເຊັ່ນກັນ.

ບໍ່ອອກກຳລັງກາຍ

ງານວິໄຈພົບວ່າຜູ້ທີ່ຂາດການອອກກຳລັງກາຍຢ່າງສະໝ່ຳສະເໝີ ມີຄວາມສ່ຽງເປັນພະຍາດໝາກໄຂ່ຫຼັງຫຼາຍກວ່າຄົນທົ່ວໄປ ເຖິງ 2 ເທົ່າ.

ສັນຍານອັນຕະລາຍພະຍາດໝາກໄຂ່ຫຼັງ

ອາການຜິດປົກກະຕິທີ່ອາດຈະເກີດຂຶ້ນກ່ອນເປັນອັນດັບທຳອິດ ສຳລັບຄົນເຈັບເປັນພະຍາດໝາກໄຂ່ຫຼັງ ຄື ມີອາການບວມ ໂດຍສະເພາະຢູ່ເປືອກຕາ, ໃບໜ້າ ຫຼື ບາງຄົນເປັນຢູ່ໜ້າແຄ່ງ.

ປັດສະວະຜິດປົກກະຕິ ເຊັ່ນ: ມີເລືອດເຈືອປົນ ຫຼື ມີລັກສະນະເປັນຟອງລະອຽດ ທັງຍັງສົ່ງຜົນໃຫ້ປະລິມານປັດສະວະມີ ຄວາມຜິດປົກກະ ຕິ, ປະລິມານປັດສະວະຫຼຸດລົງທັງທີ່ດື່ມນ້ຳເທົ່າເດີມ ຫຼື ປັດສະວະຫຼາຍຂຶ້ນໃນເວລາກາງຄືນ.

ອັນຕະລາຍຂອງພະຍາດໝາກໄຂ່ຫຼັງ

ສຳລັບພະຍາດອື່ນໆເມື່ອເຮົາພົບອາການຜິດປົກກະຕິໄວ ເຮົາກໍມັກຈະໄດ້ຮັບການປິ່ນປົວທີ່ດີ ແຕ່ໂຊກຮ້າຍທີ່ພາວະຂອງພະຍາດໝາກໄຂ່ຫຼັງບໍ່ໄດ້ເປັນແບບນັ້ນ ເພາະທັນທີທີ່ເຮົາສັງເກດເຫັນອາການຜິດປົກກະຕິທີ່ວ່ານັ້ນ ໝາຍເຖິງເຮົາກຳລັງເຈັບເປັນພະຍາດໝາກໄຂ່ຫຼັງໃນໄລຍະທີ່ອັນຕະລາຍ ຫຼື ໂຫດຮ້າຍທີ່ສຸດ ກໍຄືເປັນໄລຍະທີ 5 ທີ່ຈະເຮັດໃຫ້ເກີດມີອາການໝາກໄຂ່ຫຼັງວາຍໄລຍະສຸດທ້າຍ.

ວິທີປິ່ນປົວພະຍາດໝາກໄຂ່ຫຼັງ

ໂດຍປົກກະຕິການປິ່ນປົວພະຍາດໝາກໄຂ່ຫຼັງ ຈະຂຶ້ນຢູ່ກັບໄລຍະຂອງພະຍາດທີ່ຄົນເຈັບເປັນ ໃນໄລຍະທີ 1 – 4 ແພດຈະເຮັດການຢັບຢັ້ງຄວາມເສື່ອມຂອງໝາກໄຂ່ຫຼັງໃຫ້ຊ້າທີ່ສຸດ ດ້ວຍການປິ່ນປົວພະຍາດຕັ້ງຕົ້ນທີ່ກໍ່ໃຫ້ເກີດພະຍາດໝາກໄຂ່ຫຼັງ ເຊັ່ນ:

ຄວບຄຸມເບົາຫວານໃຫ້ດີ

ຄວບຄຸມຄວາມດັນໃຫ້ຢູ່ໃນລະດັບປົກກະຕິ

ງົດເວັ້ນການສູບຢາ

ຫຼຸດນ້ຳໜັກລົງ

ຄວບຄຸມອາຫານບໍ່ໃຫ້ມີລົດຊາດຈັດເກີນໄປ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ