ໄຂ່ຕົ້ມດອງສະອິວ - Laoedaily

ໄຂ່ຕົ້ມດອງສະອິວ

ໃນໄລຍະນີ້ປະເພດອາຫານດອງເປັນອີກລາຍການໜຶ່ງທີ່ຄົນນິຍົມກິນ ຫຼື ນຳມາເຮັດ ບໍ່ວ່າຈະເປັນປູທະເລດອງ, ກຸ້ງທະເລດອງ, ໄຂ່ແດງດອງເປັນຕົ້ນ ເຊິ່ງລາຍການຕ່າງໆທີ່ກ່າວມານັ້ນ ສ່ວນໃຫຍ່ຈະປຸງແຕ່ງ ແລະ ຮັບປະທານແບບດິບໆ ແຕ່ມີຂັ້ນຕອນໃນການດອງມາແລ້ວ.

ມື້ນີ້ຜູ້ຂຽນຈຶ່ງໄດ້ນຳເອົາລາຍການອາຫານດອງ ແຕ່ບໍ່ດິບມາຝາກ ທ່ານໄດ້ລອງໄປປຸງແຕ່ງເຮັດໃຫ້ຄົນໃນຄອບຄົວໄດ້ລອງຊີມກັນເບິ່ງ ເມນູນີ້ແມ່ນເຮັດມາຈາກໄຂ່ ນັ້ນກໍຄືໄຂ່ຕົ້ມດອງສະອິວ.

ເຄື່ອງປຸງແຕ່ງ

ໄຂ່ເປັດຕົ້ມ ຫຼື ໄຂ່ໄກ່ຕົ້ມ 15 ໜ່ວຍ

ຫອມບົ່ວໃບຕົ້ນໃຫຍ່ຊອຍ 1/2 ຕົ້ນ

ຫອມບົ່ວຫົວໃຫຍ່ຊອຍ 1/2 ຫົວ

ໝາກເຜັດແດງສັບ ( ໃສ່ຕາມໃຈມັກ )

ສະອິວ 200 ມິນລີລິດ

ນ້ຳດື່ມ 200 ມິນລີລິດ

ນ້ຳຕານ 160 ກຣາມ

ກະທຽມສັບ 1 ບ່ວງຊາ

ງາຂາວຂົ້ວ

ວິທີປຸງແຕ່ງ

1 ປະສົມສະອິວ, ນ້ຳດື່ມ ແລະ ນ້ຳຕານລົງໃນພາຊະນະ ຄົນທຸກຢ່າງໃຫ້ເຂົ້າກັນ.

2 ໃສ່ຫອມບົ່ວໃບ, ຫອມບົ່ວຫົວ ໃຫຍ່, ໝາກເຜັດແດງ, ກະທຽມ ແລະ ງາຂາວຂົ້ວລົງໄປພ້ອມຄົນໃຫ້ເຂົ້າກັນດີ.

3 ໃສ່ໄຂ່ຕົ້ມທີ່ກຽມໄວ້ແລ້ວນັ້ນ ລົງໃນກ່ອງທີ່ຈະດອງ ພ້ອມທັງເທສ່ວນປະສົມນ້ຳດອງລົງໄປໃຫ້ໝົດ ປິດຝາປະໄວ້ 3 – 4 ຊົ່ວໂມງ ແຊ່ໃນຕູ້ເຢັນ.

4 ຜ່າໄຂ່ແບ່ງເຄິ່ງໄວ້ເທິງເຂົ້າຈ້າວຮ້ອນໆ ພ້ອມລາດສະອິວນ້ຳດອງລົງໄປເລັກໜ້ອຍ ພ້ອມເສີບຮັບປະທານໄດ້ເລີຍ.

ໝາຍເຫດ: ໄຂ່ຕົ້ມຫຼັງຈາກທີ່ດອງໄວ້ 3 – 4 ຊົ່ວໂມງ ຖ້າຢາກໃຫ້ມີລົດຊາດທີ່ເຂັ້ມຂຸ້ນຂຶ້ນ ສາມາດໃຊ້ເວລາດອງດົນກວ່ານີ້ໄດ້.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ