ຈີນ ສ້າງຕັ້ງໂຮງງານຜະລິດວັກແຊັງປ້ອງກັນໂຄວິດທີ່ແຂວງຢູນນານ - Laoedaily

ຈີນ ສ້າງຕັ້ງໂຮງງານຜະລິດວັກແຊັງປ້ອງກັນໂຄວິດທີ່ແຂວງຢູນນານ

ສຳນັກຂ່າວຊິນຮວາ ລາຍງານວ່າ: ໂຄງການກໍ່ສ້າງໂຮງງານຜະລິດວັກແຊັງປ້ອງກັນໂຄວິດ – 19 ເຊິ່ງຕັ້ງຢູ່ແຂວງຢູນນານ ຂອງ ສປ ຈີນ ໄດ້ເລີ່ມລົງມືກໍ່ສ້າງແລ້ວ ເມື່ອວັນທີ 21 ທັນວາຜ່ານມາ ແລະ ຄາດວ່າຈະໃຫ້ສຳເລັດ ແລະ ເປີດການຜະລິດໃນກາງປີໜ້າ.

ລາຍງານຂ່າວລະບຸວ່າ: ໂຮງງານດັ່ງກ່າວຈະຜະລິດວັກແຊັງປ້ອງກັນໂຄວິດ – 19 ຊະນິດ ເອັມອາເອັນເອ ( mRNA ) ຕັ້ງຢູ່ເມືອງອີ້ຊີ ແຂວງຢຸນນານ ໂດຍຈະໃຫ້ສຳເລັດພາຍໃນໄລຍະເວລາ 8 ເດືອນ ຫຼື ປະມານທ້າຍເດືອນສິງຫາປີ 2021, ຖ້າຫາກວ່າໂຮງງານດັ່ງກ່າວກໍ່ສ້າງສຳເລັດຈະສາມາດຜະລິດວັກແຊັງທີ່ພັດທະນາຈາກ ສປ ຈີນ ໄດ້ 120 ລ້ານໂດສຕໍ່ປີ.

ທັງນີ້, ສຳນັກງານບໍລິຫານເວດສະພັນແຫ່ງ  ຊາດຈີນ ( NMPA ) ໄດ້ອະນຸມັດທົດລອງວັກແຊັງ mRNA ເມື່ອເດືອນມິຖຸນາຜ່ານມາ ແລະ ປັດຈຸບັນກຳລັງຢູ່ໃນຂັ້ນຕອນການທົດລອງທາງຄລີນິກໄລຍະ 2 ເຊິ່ງວັກແຊັງດັ່ງກ່າວເປັນການພັດທະນາຮ່ວມກັນຂອງສະຖາບັນວິທະຍາສາດການແພດທະຫານ ( AMMS ), ບໍລິສັດ Suzhou Abogen Biosciences ແລະ ບໍລິສັດ Walvax Biotechnology ໂດຍທີມງານຜູ້ພັດທະນາລະບຸວ່າຜ່ານການທົດລອງວັກແຊັງດັ່ງກ່າວ ສາມາດສ້າງພູມຄຸ້ມກັນໄດ້ດີ ແລະ ມີຄວາມປອດໄພ ແລະ ສາມາດຮັກສາໄວ້ໃນອຸນຫະພູມ 2 – 8 ອົງສາ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ