ເຊັນສັນຍາຮ່ວມທຸລະກິດໂຄງການເກັບຊື້ ແລະ ປຸງແຕ່ງຖ່ານຫີນຢູ່ເຂດພາກເໜືອ - Laoedaily

ເຊັນສັນຍາຮ່ວມທຸລະກິດໂຄງການເກັບຊື້ ແລະ ປຸງແຕ່ງຖ່ານຫີນຢູ່ເຂດພາກເໜືອ

ວັນທີ 18 ທັນວາ 2020 ນີ້ ທີ່ໂຮງແຮມແລນມາກ ນະຄອນຫຼວງວຽງຈັນ ໄດ້ມີພິທີເຊັນສັນຍາ ( MOA ) ຮ່ວມທຸລະກິດໂຄງການເກັບຊື້ ແລະ ປຸງແຕ່ງຖ່ານຫີນຢູ່ເຂດພາກເໜືອ ເພື່ອຈໍາໜ່າຍພາຍໃນ ແລະ ສົ່ງອອກໄປ ສປ ຈີນ ລະຫວ່າງ ກະຊວງປ້ອງກັນປະເທດ ຕາງໜ້າໂດຍ ທ່ານ ພົນຈັດຕະວາ ຄໍາມີ ຫຼ້າບຸນທັນ ຫົວໜ້າກົມເສດຖະກິດ ແລະ ບໍລິສັດ ບີພີ ບໍ່ແຮ່ ຈໍາກັດຜູ້ດຽວ ໂດຍແມ່ນ ທ່ານ ບຸນແພງ ສີມຸກດາ ປະທານບໍລິສັດ, ໃຫ້ກຽດເຂົ້າຮ່ວມເປັນປະທານໂດຍ ທ່ານ ພົນຕີ ອ່ອນສີ ແສນສຸກ ຮອງລັດຖະມົນຕີກະຊວງປ້ອງກັນປະເທດ ພ້ອມດ້ວຍການຈັດຕັ້ງຫ້ອງວ່າການກະຊວງ, ບັນດາຫົວໜ້າກົມ, ຮອງກົມກ່ຽວຂ້ອງຂອງກະຊວງປ້ອງກັນປະເທດ ແລະ ບັນດາແຂກຖືກເຊີນຂອງທັງສອງຝ່າຍເຂົ້າຮ່ວມເປັນສັກຂີພິຍານ.

ຈຸດປະສົງຂອງການເຊັນສັນຍາຮ່ວມທຸລະກິດໃນຄັ້ງນີ້ ແມ່ນເພື່ອຮ່ວມກັນຈັດຕັ້ງປະຕິບັດຕາມຂອບເຂດ ເຊິ່ງມີໜ້າວຽກຕົ້ນຕໍເບື້ອງຕົ້ນ ຄື: ເກັບຊື້ ແລະ ປຸງແຕ່ງຖ່ານຫີນຢູ່ເຂດພາກເໜືອ ເພື່ອຈໍາໜ່າຍພາຍໃນ ແລະ ສົ່ງອອກໄປ ສປ ຈີນ ໂດຍແມ່ນໂຄງການຮ່ວມມືຂອງທັງສອງຝ່າຍບົນພື້ນຖານການເຫັນດີຂອງຂັ້ນເທິງ ໂດຍສະເພາະແມ່ນອົງການກ່ຽວຂ້ອງຂອງລັດຖະບານ ແລະ ພິເສດແມ່ນກະຊວງປ້ອງກັນປະເທດທີ່ໄດ້ມີການອະນຸມັດໃຫ້ມີການຮ່ວມມື ໂດຍປະຕິບັດສອດຄ່ອງຕາມລະບຽບກົດໝາຍ ແລະ ແຈ້ງການຂອງຫ້ອງວ່າການສໍານັກງານນາຍົກລັດຖະມົນຕີ

Image may contain: 13 people, people standing

ເຊິ່ງໃນໄລຍະເລີ່ມຕົ້ນໂຄງການທັງສອງຝ່າຍຄາດຄະເນເງິນລົງທຶນ ປະມານ 10 ລ້ານໂດລາສະຫະລັດ ຫຼື ປະມານ 100 ຕື້ກີບ ເຊິ່ງມີຮູບແບບການຖືຮຸ້ນ ແລະ ການຮ່ວມມື ໂດຍກໍານົດອັດຕາສ່ວນການຖືຮຸ້ນ ເຊິ່ງທັງສອງຝ່າຍຮ່ວມກັນບໍລິຫານ ແລະ ຈັດການດ້ວຍການສ້າງຕັ້ງເປັນບໍລິສັດຮ່ວມທຸລະກິດຂອງທັງສອງຝ່າຍ ເພື່ອຈັດຕັ້ງເຄື່ອນໄຫວຢ່າງຖືກຕ້ອງ ບົນພື້ນຖານການຮ່ວມມືດັ່ງກ່າວ ຄາດວ່າໂຄງການຈະໄດ້ຮັບການຈັດຕັ້ງປະຕິບັດໃຫ້ເປັນຈິງ ແລະ ມີໝາກຜົນຄວາມສໍາເລັດ, ມີຄວາມຮັບປະກັນປະຕິບັດຖືກຕ້ອງຕາມລະບຽບກົດໝາຍ ແລະ ສາມາດປະກອບພັນທະໃຫ້ລັດຢ່າງມີລັກສະນະຕັ້ງໜ້າ ໂດຍນໍາໃຊ້ຫຼາຍພາກສ່ວນເສດຖະກິດເຂົ້າຮ່ວມ ພ້ອມທັງເປັນການສ້າງວຽກເຮັດງານທໍາໃຫ້ປະຊາຊົນລາວໄດ້ຈໍານວນໜຶ່ງ ແລະ ຄາດວ່າໂຄງການດັ່ງກ່າວຈະນໍາຜົນປະໂຫຍດມາສູ່ຄູ່ຮ່ວມມືທັງສອງຝ່າຍ ເວົ້າລວມກໍຄືສັງຄົມ ແລະ ປະເທດຊາດ.

Image may contain: 15 people, people standing

ໃນສັນຍາການຮ່ວມມືຄັ້ງນີ້ອັນສໍາຄັນແມ່ນຫຼາຍພາກສ່ວນໄດ້ໃຫ້ການຮ່ວມມືເຮັດໃຫ້ໂຄງການ ສາມາດດໍາເນີນການໄດ້ຕາມແຜນແຕ່ລະໄລຍະ ໃນຕໍ່ໜ້າການຈັດຕັ້ງປະຕິບັດໂຄງການຕ້ອງໄດ້ເບິ່ງຄືນການເກັບກໍາຂໍ້ມູນ ແລະ ການຈັດຕັ້ງປະຕິບັດຕ້ອງຕິດພັນກັບສະພາບຕົວຈິງຂອງທ້ອງຖິ່ນ ພ້ອມກັນຖອດຖອນບົດຮຽນ ແລະ ແກ້ໄຂໃຫ້ຖ່ວງທັນໃນໄລຍະດໍາເນີນການຂອງໂຄງການ ເຊິ່ງຈະເປັນບົດຮຽນອັນສໍາຄັນເຂົ້າໃນການຈັດຕັ້ງປະຕິບັດໃຫ້ໂຄງການມີຄວາມສໍາເລັດ ແລະ ກ້າວສູ່ການເປັນບໍລິສັດຮ່ວມທຸລະກິດທີ່ມີປະສິດທິຜົນ, ວ່ອງໄວ, ທັນສະໄໝ ແລະ ຄຸ້ມຄອງໄດ້ບົນພື້ນຖານຄວາມເປັນໜຶ່ງດຽວ, ຍຸຕິທໍາ, ໂປ່ງໃສ, ກ້າວໄປນໍາກັນໃຫ້ປາກົດຜົນເປັນຈິງ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ