ເຜີຍແຜ່ຜົນສຳເລັດການເຄື່ອນໄຫວວຽກງານສະພາປະຊາຄົມ ວັດທະນະທຳ - ສັງຄົມອາຊຽນ - Laoedaily

ເຜີຍແຜ່ຜົນສຳເລັດການເຄື່ອນໄຫວວຽກງານສະພາປະຊາຄົມ ວັດທະນະທຳ – ສັງຄົມອາຊຽນ

ວັນທີ 23 ທັນວາ 2020 ທີ່ຫໍວັດທະນະທຳແຫ່ງຊາດ ໄດ້ຈັດກອງປະຊຸມເຜີຍແຜ່ຜົນສຳເລັດການເຄື່ອນໄຫວວຽກງານ ສະພາປະຊາຄົມວັດທະນະທໍາ – ສັງຄົມອາຊຽນ ສປປ ລາວ ຂຶ້ນເປັນປະທານຂອງ ທ່ານ ສະຫວັນຄອນ ຣາຊມຸນຕຣີ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ມີບັນດາຫົວໜ້າກົມ, ເຈົ້າໜ້າທີ່ອາວຸໂສ, ຫົວໜ້າກອງ, ຜູ້ອໍານວຍການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ສະຫວັນຄອນ ຣາຊ ມຸນຕຣີ ໄດ້ກ່າວຕໍ່ກອງປະຊຸມບາງຕອນວ່າ: ອາຊຽນເປັນອົງການຈັດຕັ້ງພາກພື້ນ ລະ ຫວ່າງ ລັດຖະບານ ກັບ ລັດຖະບານ ເຊິ່ງໄດ້ຖືກສ້າງຕັ້ງຂຶ້ນໃນວັນທີ 8 ສິງຫາ 1967 ທີ່ບາງກອກ ປະເທດໄທ ໂດຍການລົງນາມຖະແຫຼງການອາຊຽນ ຫຼື ເອີ້ນວ່າ: ຖະແຫຼງການບາງກອກ ໂດຍມີ 5 ປະເທດສະມາຊິກກໍ່ຕັ້ງຄື: ອິນໂດເນເຊຍ, ມາເລເຊຍ, ຟີລິບປິນ, ສິງກະໂປ ແລະ ໄທ. ໃນກາງຊຸມປີ 1970 ເປັນຕົ້ນມາ, ອາຊຽນ ໄດ້ປະຕິບັດນະໂນບາຍຂະຫຍາຍສະມາຊິກຂອງຕົນ ໂດຍຮັບເອົາ ບຣູໄນ ດາຣູຊາລາມ ເຂົ້າເປັນສະມາຊິກອາຊຽນໃນວັນທີ 8 ມັງກອນ 1984, ສສ ຫວຽດນາມ ໃນວັນທີ 28 ກໍລະກົດ 1995, ສປປ ລາວ ແລະ ມຽນມາ ໃນວັນທີ 23 ກໍລະກົດ 1997 ແລະ ກໍາປູເຈຍ ໃນວັນທີ 30 ເມສາ 1999. ປັດຈຸບັນດໍາເນີນຂັ້ນຕອນການພິຈາລະນາຂໍ້ສະເໜີຂອງ ຕີມໍເລັສເຕ ເຂົ້າເປັນສະມາຊິກອາຊຽນຕາມກົດບັດອາຊຽນ.

Image may contain: 1 person, sitting

ທ່ານໄດ້ກ່າວອີກວ່າ: ອາຊຽນມີ 3 ປະຊາຄົມ ເຊັ່ນ: ປະຊາຄົມການເມືອງ – ຄວາມໝັ້ນຄົງ ( APSC ), ປະຊາຄົມເສດຖະກິດອາຊຽນ ( AEC ) ແລະ ປະຊາຄົມວັດທະນະທໍາ – ສັງຄົມອາຊຽນ ( ASCC ) ເພື່ອເສີມຂະຫຍາຍ ແລະ ເພີ່ມທະວີການເຊື່ອມໂຍງພາຍໃນພາກພື້ນອາຊຽນ ແລະ ການຮ່ວມມືກັບພາຍນອກ ໂດຍດໍາເນີນນະໂຍບາຍເປີດກວ້າງໃນການເສີມຂະຫຍາຍຖ່ວງທ່າທີ່ດີ ໃນການພົວພັນກັບບັນດາປະເທດຄູ່ເຈລະຈາຂອງອາຊຽນ ລວມທັງເສີມຂະຫຍາຍການພົວພັນກັບຄູ່ຮ່ວມມືພາຍນອກອື່ນໆ ໂດຍນໍາໃຊ້ຮູບແບບການຮ່ວມມືຕ່າງໆທີ່ແທດເໝາະ ແລະ ປັບຕົວໄດ້ຢ່າງຄ່ອງແຄ້ວ, ໜັກແໜ້ນ ແລະ ສະເໝີຕົ້ນສະເໝີປາຍ. ພ້ອມດຽວກັນນີ້, ອາຊຽນ ຍັງຈະສົ່ງເສີມບັນດາກົນໄກທີ່ອາຊຽນສ້າງຕັ້ງຂຶ້ນໃຫ້ເຂັ້ມແຂງ ແລະ ສົ່ງເສີມຄວາມເປັນແກນກາງ ແລະ ຄວາມເປັນເອກະພາບຂອງຕົນໃນການພົວພັນກັບພາຍນອກ ແລະ ໃນໂຄງສ້າງພາກພື້ນທີ່ພວມຜັນແປ. ສໍາຄັນທີ່ສຸດ ອາຊຽນ ຈະສືບຕໍ່ກ້າວໄປໃນຫຼັກການແຫ່ງ ຄວາມເປັນເຈົ້າການ, ຢຶດໝັ້ນໃນ “ ວິຖີທາງອາຊຽນ ” ກໍຄືບັນດາຫຼັກການທີ່ໄດ້ກໍານົດໄວ້ໃນກົດບັດອາຊຽນ ທັງເປັນປະຊາຄົມທີ່ສ້າງຄວາມເພິ່ງພໍໃຈ ແລະ ສະບາຍໃຈໃຫ້ແກ່ກັນ ແລະ ກັນ, ສືບຕໍ່ປະກອບສ່ວນເຂົ້າໃນການປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມວັດທະນະຖາວອນໃນພາກພື້ນ ແລະ ໃນໂລກ.

Image may contain: 3 people, people standing, people on stage and indoor

ການຈັດຕັ້ງໃນຄັ້ງນີ້ ເຊິ່ງຖືວ່າເປັນກອງປະຊຸມທີ່ມີຄວາມໝາຍສໍາຄັນ ສໍາລັບທີ່ຈະຮ່ວມກັນຮັບຟັງການລາຍງານຜົນສໍາເລັດຂອງກອງປະຊຸມສຸດຍອດອາຊຽນ ຄັ້ງທີ 36 ແລະ 37 ນໍາສະເໜີໂດຍຜູ້ຕາງໜ້າຈາກກົມອາຊຽນ    ( ກະຊວງການຕ່າງປະເທດ ), ກອງປະຊຸມລັດຖະມົນຕີ ປະຊາຄົມວັດທະນະທໍາ – ສັງຄົມອາຊຽນ ຄັ້ງທີ 23 ແລະ 24 ນໍາສະເໜີໂດຍເຈົ້າ ໜ້າທີ່ອາວຸໂສປະຊາຄົມວັດທະນະ   ທໍາ – ສັງຄົມອາຊຽນ ແລະ ບັນດາກອງປະຊຸມລັດຖະມົນຕີຂອງແຕ່ລະຂະແໜງການຂອງເສົາຄໍ້າວັດທະນະທໍາ – ສັງຄົມອາຊຽນ ນໍາສະເໜີໂດຍບັນດາຜູ້ຕາງໜ້າຈາກແຕ່ລະຂະແໜງການ.

Image may contain: 5 people, people sitting and indoor

ນອກຈາກນີ້, ກອງປະຊຸມກໍໄດ້ຮັບຟັງການປະກອບຄໍາຄິດເຫັນຈາກຂະແໜງການຕ່າງໆ ເພື່ອພ້ອມກັນຊອກຫາວິທີການທີ່ເໝາະສົມ ຊຸກຍູ້ໃຫ້ການຈັດຕັ້ງປະຕິບັດຂອບການຮ່ວມມືວຽກງານອາຊຽນໃຫ້ເກີດຜົນປະໂຫຍດສູງສຸດ ໃຫ້ນັບມື້ກວ້າງຂວາງ ແລະ ມີປະສິດທິຜົນຍິ່ງຂຶ້ນ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ