ດ່ວນ! ສາທາເຕືອນ ໃຫ້ກວດສອບທີ່ມາຂອງກຸ້ງກ່ອນບໍລິໂພກ ພ້ອມປຸງແຕ່ງໃຫ້ສຸກດີກ່ອນຮັບປະທານ - Laoedaily

ດ່ວນ! ສາທາເຕືອນ ໃຫ້ກວດສອບທີ່ມາຂອງກຸ້ງກ່ອນບໍລິໂພກ ພ້ອມປຸງແຕ່ງໃຫ້ສຸກດີກ່ອນຮັບປະທານ

ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ຖະແຫຼງຂ່າວໃນວັນທີ 23 ທັນວາ 2020 ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ, ຂະນະດຽວກັນ ຍັງມີຜູ້ຕິດເຊື້ອພະຍາດດັ່ງກ່າວປິ່ນປົວຢູ່ໂຮງໝໍພຽງ 4ຄົນ ພ້ອມເຕືອນປະຊາຊົນຜູ້ບໍລິໂພກອາຫານທະເລ ຄວນກວດສອບທີ່ມາໃຫ້ແນ່ໃຈກ່ອນຮັບປະທານ ແລະ ປຸງແຕ່ງໃຫ້ສຸກດີ ເພື່ອປ້ອງກັນການຕິດເຊື້ອໂຄວິດ-19.

ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ, ຕາງໜ້າໃຫ້ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ ໂຄວິດ-19 ລາຍງານໃຫ້ຮູ້ວ່າ: ການເກັບຕົວຢ່າງມາກວດວິເຄາະ ແລະ ຄົ້ນຫາຜູ້ຕິດເຊື້ອພະຍາດ ໃນວັນທີ 22 ທັນວາ 2020, ໄດ້ເກັບຕົວຢ່າງມາກວດວິເຄາະທັງໝົດ 207 ຄົນ, ໃນນັ້ນ ມີ 5 ຕົວຢ່າງຈາກບຸກຄົນທົ່ວໄປມີອາການ; 14 ຕົວຢ່າງຈາກບຸກຄົນທົ່ວໄປບໍ່ມີອາການ; ແຮງງານລາວກັບມາແຕ່ໄທບໍ່ມີອາການ 178 ຕົວຢ່າງ; ແຮງງານຫວຽດນາມບໍ່ມີອາການ 9 ຕົວຢ່າງ ແລະ ແຮງງານລາວມາແຕ່ຫວຽດນາມບໍ່ມີອາການ 1 ຕົວຢ່າງ; ຜົນກວດວິເຄາະທັງໝົດ ແມ່ນບໍ່ພົບເຊື້ອ.

ໝາຍຄວາມວ່າ ວັນທີ 22 ທັນວາ 2020 ບໍ່ພົບຜູ້ຕິດເຊື້ອໃໝ່. ສັງລວມການກວດວິເຄາະ ແຕ່ເດືອນມັງກອນ ຮອດ ວັນທີ 22 ທັນວາ 2020 ໄດ້ເກັບຕົວຢ່າງມາກວດທັງໝົດ 88.754 ຕົວຢ່າງ, ກວດພົບເຊື້ອສະສົມ 41 ຄົນ.

ສ່ວນການຕິດຕາມປີ່ນປົວຄົນເຈັບຢູ່ໂຮງໝໍ ຄົນເຈັບຕິດເຊື້ອ ໂຄວິດ-19 ທີ່ນອນຕິດຕາມຢູ່ໂຮງໝໍ, ຖ້າຜົນກວດໃຫ້ຜົນລົບຕິດຕໍ່ກັນ 2 ຄັ້ງ ແມ່ນຈະໄດ້ຮັບອະນຸຍາດໃຫ້ອອກໂຮງໝໍໄດ້; ມາຮອດປະຈຸບັນ ຍັງມີຄົນເຈັບຕິດເຊື້ອພະຍາດ ໂຄວິດ-19 ຈຳນວນ 4 ຄົນ ທີ່ຍັງສືບຕໍ່ນອນປິ່ນປົວຢູ່ໂຮງໝໍທີ່ຖືກກຳນົດໄວ້, ທຸກຄົນແມ່ນມີອາການເບົາບາງ, ບໍ່ມີອາການສົນຫຍັງ.

ທ່ານ ຮອງຫົວໜ້າກົມຄວບຄຸມພະນຍາດຕິດຕໍ່ ກ່າວຕື່ມວ່າ: ສະພາບການລະບາດຂອງ ໂຄວິດ-19 ໃນທົ່ວໂລກ ສຳລັບ ເດືອນທັນວາ ແມ່ນຖືວ່າໜັກໜ່ວງຫຼາຍ ນັບແຕ່ເກີດມີການລະບາດມາ. ສະເພາະ ປະເທດອັງກິດ ມີລາຍງານຈຳນວນຜູ້ຕິດເຊື້ອໃໝ່ ຫຼາຍກວ່າ 1 ແສນຄົນ ພາຍໃນອາທິດດຽວ, ບາງປະເທດ ກໍ່ມີລາຍງານຈຳນວນຜູ້ເສຍຊີວິດສູງຂຶ້ນຢ່າງໜ້າກັງວົນ. ນອກຈາກນັ້ນ ບາງປະເທດ ໄດ້ປີດຊາຍແດນ ແລະ ຢຸດຕິການຂົນສົ່ງສິນຄ້າເຂົ້າ-ອອກເປັນການຊົ່ວຄາວ ສົ່ງຜົນກະທົບຕໍ່ເສດຖະກິດ ແລະ ວິຖີການດຳລົງຊີວິດຂອງປະຈຳວັນຂອງປະຊາຊົນ ທັງທາງກົງ ແລະ ທາງອ້ອມ. ສະເພາະ ສປປ ລາວ ເຮົາ ແມ່ນມີຄວາມສ່ຽງສູງທີ່ຈະມີຜູ້ຕິດເຊື້ອຈາກຕ່າງປະເທດ ເຂົ້າມາແຜ່ເຊື້ອ ແລະ ເກີດການລະບາດຮອບໃໝ່ ໃນປະເທດຂອງພວກເຮົາ.

ສະນັ້ນ ພວກເຮົາທຸກຄົນຕ້ອງເປັນເຈົ້າການຮ່ວມກັນ ໃນການປະຕິບັດມາດຕະການທີ່ຄະນະສະເພາະກິດວາງອອກຢ່າງເຂັ້ມງວດ ກໍ່ຄື ແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ, ສະບັບເລກທີ 1414/ຫສນຍ, ລົງວັນທີ 23 ທັນວາ 2020 ແລະ ຄຳແນະນຳຂອງຂະແໜງການກ່ຽວຂ້ອງ ເພື່ອສະກັດກັ້ນ ການລະບາດແຕ່ຫົວທີ ບໍ່ໃຫ້ຂະຫຍາຍເປັນວົງກວ້າງ.

ນອກຈາກນີ້, ໃນຕອນທ້າຍຂອງການຖະແຫຼງຂ່າວ ທ່ານ ສີສະຫວາດ ສຸດທານີລະໄຊ ໄດ້ກ່າວວ່າ: ປັດຈຸບັນ ການບໍລິໂພກກຸ້ງທີ່ນໍາເຂົ້າ ຂໍໃຫ້ປຸງແຕ່ງໃຫ້ສຸກດີ ໃຫ້ລະມັດລະວັງໃນການປຸງແຕ່ງຕ່າງໆ ເນື່ອງຈາກວ່າມີຂໍ້ມູນມີການແຜ່ເຊື້ອໂຄວິດ-19 ຈາກສັດທະເລ ແຕ່ແທ້ຈິງແລ້ວບໍ່ແມ່ນ; ຫາກເຮົາເຮັດສຸກ ເຮົາສາມາດກິນໄດ້ ແຕ່ວ່າຂໍໃຫ້ເບິ່ງທີ່ມາຂອງກຸ້ງ ແລະ ອາຫານທະເລເຫຼົ່ານັ້ນ ວ່າມັນມາຈາກເຂດທີ່ມີການລະບາດຂອງພະຍາດໂຄວິດ-19 ຫຼືບໍ່. ແນວໃດກໍ່ຕາມ ໃນໄລຍະນີ້ ບໍ່ໄດ້ໝາຍຄວາມວ່າບໍ່ໃຫ້ພໍ່ແມ່ປະຊາຊົນບໍລິໂພກ ແຕ່ໃຫ້ຮູ້ແຫຼ່ງທີ່ມາຂອງອາຫານທະເລຢ່າງຊັດເຈນ ແລະ ເວລາປຸງແຕ່ງ ໃຫ້ປຸງແຕ່ງໃຫ້ສຸກ ບໍ່ໃຫ້ບໍລິໂພກດິບ, ຄວາມຈິງແລ້ວເຊື້ອພະຍາດຈະຕິດຢູ່ໃນນັ້ນ ເວລາເຮົາຈັບບາຍ ແລ້ວໃຊ້ມືມາສໍາຜັດໃສ່ໜ້າ, ຕາ, ປາກ, ດັງ ຈະເຮັດໃຫ້ເຊື້ອເຂົ້າຮ່າງກາຍໃນຕອນນັ້ນ ແຕ່ຫາກບໍລິໂພກສຸກແມ່ນບໍ່ມີບັນຫາ, ສະນັ້ນ ສິ່ງສໍາຄັນທີ່ສຸດແມ່ນມືເຮົາ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ