ຝຶກອົບຮົມຫຼັກສູດຜູ້ແຈ້ງພາສີທົ່ວໄປ ຊຸດທີ I ໃຫ້ຜູ້ປະກອບການ - Laoedaily

ຝຶກອົບຮົມຫຼັກສູດຜູ້ແຈ້ງພາສີທົ່ວໄປ ຊຸດທີ I ໃຫ້ຜູ້ປະກອບການ

ກົມພາສີກະຊວງການເງິນ ໄດ້ຈັດຊຸດຝຶກອົບຮົມຫຼັກສູດຜູ້ແຈ້ງພາສີທົ່ວໄປໃຫ້ແກ່ຜູ້ປະກອບການ ປະຈຳປີ 2020 ຊຸດທີ I ຂຶ້ນລະຫວ່່່າງວັນທີ 21 – 25 ທັນວາ 2020 ທີ່ສະຖາບັນເສດຖະກິດ – ການເງິນ ໂດຍການເຂົ້າຮ່ວມຂອງ ທ່ານ ພຸດທະນິກອນ ເຄນນະວົງ ຫົວໜ້າພະແນກສອບສວນການແຈ້ງພາສີ, ກົມພາສີ, ມີບັນດາຄະນະພະແນກອ້ອມຂ້າງກົມພາສີ, ບັນດາສຳມະນາກອນ ແລະ ວິທະຍາກອນເຂົ້າຮ່ວມ.

ການຝຶກອົບຮົມຄັ້ງນີ້ກໍເພື່ອເປັນການເຜີຍແຜ່ ແລະ ຜັນຂະຫຍາຍກົດໝາຍ ວ່າດ້ວຍພາສີ ແລະ ນິຕິກຳ – ລະບຽບການທີ່ສຳຄັນຕ່າງໆທີ່ຕິດພັນກັບການດຳເນີນທຸລະກິດຂອງບັນດາບໍລິສັດ ເວົ້າລວມ, ເວົ້າສະເພາະແມ່ນການແຈ້ງພາສີເປັນລາຍລະອຽດ ເຊິ່ງຕິດພັນກັບການນຳໃຊ້ລະບົບແຈ້ງພາສີດ້ວຍລະບົບເອເລັກໂຕຣນິກ ຫຼື ລະບົບ ASYCUDA ໃຫ້ແກ່ບັນດາບໍລິສັດທີ່ດຳເນີນການເຄື່ອນໄຫວທຸລະກິດການສົ່ງອອກ – ນຳເຂົ້າສິນຄ້າ, ເຄື່ອງຂອງຢູ່ບັນດາດ່ານພາສີໃນຂອບເຂດທົ່ວປະເທດ ເພື່ອໃຫ້ມີຄວາມເຂົ້າໃຈ ແລະ ປະຕິບັດໃຫ້ຖືກຕ້ອງຕາມລະບຽບການກຳນົດ ແລະ ສາມາດນຳເອົາບົດຮຽນໄປປະຕິບັດໃນການປະກອບເອກະສານການແຈ້ງພາສີເປັນລາຍລະອຽດ.

ຊຸດຝຶກອົບຮົມໃນຄັ້ງນີ້ມີຫຼາຍຫົວຂໍ້ທີ່ສຳຄັນກ່ຽວກັບວຽກງານພາສີ ເປັນຕົ້ນ: ຄວາມຮູ້ພື້ນຖານກ່ຽວກັບກົດໝາຍວ່າດ້ວຍພາສີ, ການກຳນົດມູນຄ່າແຈ້ງພາສີ, ການຈັດລະຫັດສິນຄ້າ ແລະ ສາລະບານອັດຕາພາສີ, ການຢັ້ງຢືນແຫຼ່ງກຳນົດສິນຄ້າ ແລະ ການປະຕິບັດການຄ້າເສລີ, ການຄຸ້ມຄອງແຜນນຳເຂົ້າສິນຄ້າ, ລະບຽບການກວດສອບຄືນການແຈ້ງພາສີ, ລະບຽບການຄຸ້ມຄອງຜູ້ແຈ້ງພາສີ ແລະ ຜູ້ປະກອບການມາດຕະຖານ ເອອີໂອ ນໍາອີກດ້ວຍ.

[ ຂ່າວ – ຮູບ: ກະຊວງການເງິນ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ