ສປປ ລາວ ສົ່ງ 23 ປະເພດກີລາຮ່ວມຊີງໄຊໃນຊີເກມ ຄັ້ງທີ 31 ພ້ອມໝັ້ນໃຈຍາດຜົນງານດີກວ່າເກົ່າ - Laoedaily

ສປປ ລາວ ສົ່ງ 23 ປະເພດກີລາຮ່ວມຊີງໄຊໃນຊີເກມ ຄັ້ງທີ 31 ພ້ອມໝັ້ນໃຈຍາດຜົນງານດີກວ່າເກົ່າ

ທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ກະຊວງ ສຶກສາທິການ ແລະ ກີລາ ກ່າວລາຍງານໃນກອງປະຊຸມໃຫຍ່ ຄະນະກໍາມະການໂອແລມປິກແຫ່ງຊາດລາວ ເມື່ອຕົ້ນອາທິດນີ້ວ່າ: ເຊິ່ງຫຼັງຈາກເຂົ້າຮ່ວມ ຊີເກມ ຄັ້ງທີ 30 ທີ່ຟິລິບປິນ ພວກເຮົາຍັງໂຊກດີທີ່ສາມາດຍາດໄດ້ 1 ຫຼຽນຄໍາໃນໄລຍະທ້າຍຂອງແຂ່ງຂັນຈາກກີລາຄິກບ໊ອກຊິ້ງ ສາມາດກອບກູ້ເອົາຊື່ສຽງຂອງວົງການກີລາລາວ ພວກເຮົາກໍມີການກະກຽມນັກກີລາເຂົ້າຮ່ວມງານມະຫາກໍາກີລາຊີເກມ ຄັ້ງທີ 31 ທີ່ ສ.ສ ຫວຽດນາມ ເປັນເຈົ້າພາບໃນປີ 2021 ພວກເຮົາໄດ້ມີກອງປະຊຸມ 2 ຄັ້ງໃນກອງປະຊຸມທົ່ວອາຊຽນທີ່ຜ່ານມາ ແລະ ໄດ້ມີການສະເໜີບັນຈຸປະເພດກີລາຕ່າງໆເຂົ້າ ຈາກປະເທດຕ່າງໆ ກ່ອນທີ່ເຈົ້າພາບຈະກໍານົດຊີງຂັນ 36 ກວ່າປະເພດກີລາ.

“ ພວກເຮົາໄດ້ມີການປະສານກັບບັນດາສະຫະພັນ ໂດຍອີງໃສ່ປະເພດກີລາທີ່ເຄີຍໄດ້ຮັບຫຼຽນຄໍາມາກ່ອນ ຈິ່ງກໍານົດສົ່ງເຂົ້າຮ່ວມຊີເກມ ຄັ້ງທີ 31 ຈໍານວນ 23 ປະເພດກີລາ ເປັ້ນຕົ້ນແມ່ນ 18 ກີລາທີ່ເຄີຍໄດ້ຫຼຽນລາງມາແລ້ວປະກອບມີ ເປຕັງ, ມວຍລາວ, ໂວວິນາມ, ວູຊູ, ຄິກບ໊ອກຊີ້ງ, ສະນຸກເກີ, ລົດຖີບ, ເທຄວັນໂດ, ມວຍສາກົນ, ກະຕໍ້, ປັນຈັກສີລັດ, ຄາຣາເຕໂດ້, ຢູໂດ, ມວຍປໍ້າ, ຍິງທະນູ, ແລ່ນ-ລານ, ຍົກນໍ້າໜັກ ແລະ ລອຍນໍ້າ ເຊິ່ງຈໍານວນນີ້ແມ່ນສະເໜີໃຊ້ງົບປະມານຂອງລັດຮອບດ້ານ, ສ່ວນສະເໜີໃຫ້ກຸມຕົວເອງແມ່ນ ກີລາບານເຕະ, ດອກປີກໄກ່, ເທັນນິສ, ກ໊ອຟ ແລະ ອີ-ສະປອດ ” ທ່ານ ແສງພອນ ພົນອາມາດ ກ່າວ.

ທ່ານກ່າວອີກວ່າ: ສໍາລັບກີລາທີ່ມີຫວັງຫຼຽນຄໍາແມ່ນຈະເຂົ້າເກັບຕົວເປັນໄລຍະເວລາ 4 ເດືອນກ່ອນແຂ່ງຂັນ ແລະ ສ່ວນຄວາມຫວັງຫຼຽນໃດຫຼຽນໜຶ່ງແມ່ນຫຼຸດລົງມາ 3 ເດືອນໃນແຕ່ລະປະເທດກີລາ. ຢ່າງໃດກໍຕາມ ພວກເຮົາກໍມີແຜນເຊີນເອົາຄູຝຶກຈາກຕ່າງປະເທດມາຝຶກແອບໃຫ້ເລັ່ງໃສ່ກີລາຕໍ່ສູ້ປ້ອງກັນຕົວເປັນຫຼັກ ແລະ ມີແຜນສົ່ງນັກກີລາໄປຝຶກຢູ່ຕ່າງປະເທດໂດຍສະເພາະແມ່ນ ເຈົ້າພາບ ຫວຽດນາມ ປະເພດລະໜຶ່ງເດືອນ ເພາະຄັ້ງທີ່ຜ່ານມາແມ່ນ ຫວຽດນາມ ໃຫ້ການຊ່ວຍ 20 ຄົນໃນໄລຍະ 3 ເດືອນ, ແຕ່ຊີເກມຄັ້ງນີ້ພວກເຮົາຈະຂໍເປັນ 40 ຄົນ ແລະ ກໍໄດ້ຮັບການຕອບຮັບແລ້ວ ພາຍໃນໄລຍະ 3 ເດືອນ, ສ່ວນເປົ້າໝາຍການກໍານົດຄາດໝາຍສູ້ຊົນໃນຊີເກມ ທີ່ຫວຽດນາມ ຄາດວ່າພວກເຮົາຈະມີຫຼຽນເພີ່ມຂຶ້ນ ເພາະວ່າເປັນປະເທດທີ່ໃກ້ຄຽງ ແລະ ມີບັນບັນດາປະເພດກີລາທີ່ເປັນເປົ້າໝາຍທີ່ບັນຈຸເຂົ້າໃນການແຂ່ງຂັນ.

ສໍາລັບ ຊີເກມ ຄັ້ງທີ 30 ໃນປີ 2019 ຟິລິບປິນ ຄອງເຈົ້າຄອງຫຼຽນຄໍາມີ 149 ຫຼຽນຄໍາ, 117 ຫຼຽນເງິນ ແລະ 120 ຫຼຽນທອງ ໜີຫ່າງອັນດັບ 2 ຢ່າງຫວຽດນາມ ໄປຂາດລອຍມີ 97 ຫຼຽນຄໍາ, 85 ຫຼຽນເງິນ ແລະ 104 ຫຼຽນທອງ. ຂະນະທີ່ ທັບນັກກິລາລາວ ຄວ້າ 1 ຫຼຽນຄໍາ, 5 ຫຼຽນເງິນ ແລະ 28 ຫຼຽນທອງ ຢູ່ອັນດັບທີ 10 ຂອງຕາຕະລາງ ເໜືອພຽງ ຕີມໍ ເລັສເຕີ ຄວ້າ 1 ຫຼຽນເງິນ ແລະ 5 ຫຼຽນທອງ ຢູ່ອັນດັບທີ 11 ອັນດັບສຸດທ້າຍຂອງຕາຕະລາງ. ຢ່າງໃດກໍຕາມ ໃນຊີເກມຄັ້ງທີ 31 ສປປ ລາວ ມີໂອກາດສ້າງຜົນງານໂດດເດັ່ນ.
ຂ່າວ-ຮູບ: ຄໍາສອນ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ