ໂຮງຮຽນ ມ.ຕົ້ນ ນ້ຳຈ້ວມ ເມືອງຫ້ວຍຊາຍ ມີອາຄານຮຽນຫຼັງໃໝ່ - Laoedaily

ໂຮງຮຽນ ມ.ຕົ້ນ ນ້ຳຈ້ວມ ເມືອງຫ້ວຍຊາຍ ມີອາຄານຮຽນຫຼັງໃໝ່

ພິທີມອບ – ຮັບ ອາຄານຮຽນຫຼັງໃໝ່ຂອງໂຮງຮຽນ    ມ.ຕົ້ນ ນໍ້າຈ້ວມ ເມືອງຫ້ວຍຊາຍ ແຂວງບໍ່ແກ້ວ ໄດ້ຈັດຂຶ້ນໃນວັນທີ 18 ທັນວາຜ່ານມາ ທີ່ໂຮງຮຽນດັ່ງກ່າວ ໂດຍການເຂົ້າຮ່ວມຂອງ ທ່ານ ຫົງແກ້ວ ວິໄນວົງ ເຈົ້າເມືອງຫ້ວຍຊາຍ ແຂວງບໍ່ແກ້ວ, ມີບັນດາຄະນະພັກຜູ້ຊີ້ນຳກຸ່ມບ້ານ, ຫົວໜ້າ – ຮອງຫົວໜ້າຫ້ອງການ, ຕົວແທນຜູ້ໃຫ້ທຶນ, ບໍລິສັດຜູ້ຮັບເໝົາກໍ່ສ້າງ, ຄະນະອຳນວຍການໂຮງຮຽນ, ອົງການປົກຄອງບ້ານ, ການຈັດຕັ້ງ, ພະນັກງານຄູ – ອາຈານ, ຫ້ອງການທີ່ກ່ຽວຂ້ອງ ແລະ ນັກຮຽນເຂົ້າຮ່ວມ.

ໃນພິທີຄະນະຮັບຜິດຊອບໂຄງການກໍ່ສ້າງອາຄານຮຽນ ຫ້ອງການສຶກສາທິການ ແລະ ກີລາ ເມືອງຫ້ວຍຊາຍ ໄດ້ລາຍງານຜົນສຳເລັດການກໍ່ສ້າງອາຄານຮຽນຫຼັງໃໝ່ ວ່າ: ໂຄງການກໍ່ສ້າງອາຄານຮຽນຫຼັງໃໝ່ຢູ່ໂຮງຮຽນ ມ.ຕົ້ນ ນ້ຳຈ້ວມ ໄດ້ເລີ່ມລົງມືກໍ່ສ້າງມາແຕ່ວັນທີ 27 ທັນວາ 2019 ເປັນຕົ້ນມາ ແລະ ສຳເລັດໃນວັນທີ 27 ມິຖຸນາ 2020 ໃຊ້ເວລາການກໍ່ສ້າງທັງໝົດ 6 ເດືອນ ເປັນອາຄານຊັ້ນດຽວ ຂະໜາດຄວາມຍາວ 48 ແມັດ, ກວ້າງ 6 ແມັດ, ໂຄງສ້າງແມ່ນເບຕົງເສີມເຫຼັກ, ຫຼັງຄາມຸງດ້ວຍສັງກະສີ, ກໍ່ຝາດ້ວຍດິນຈີ່, ໂບກທັງສອງດ້ານພ້ອມທາສີ, ຕິດເພດານສະມາດບອດ, ພື້ນເທດ້ວຍເບຕົງ.

ປະກອບມີ 6 ຫ້ອງຮຽນ, ມີໂຕະ – ຕັ່ງຄູ – ອາຈານ, ໂຕະ – ຕັ່ງນັກຮຽນຄົບຊຸດ, ມີສອງຫ້ອງນ້ຳ ໂດຍແມ່ນທຶນຊ່ວຍເຫຼືອລ້າຈາກລັດຖະບານ ແລະ ປະຊາຊົນຍີ່ປຸ່ນ ໂດຍມີການປະກອບສ່ວນຂອງອົງການປົກຄອງບ້ານ ແລະ ປະຊາຊົນພາຍໃນກຸ່ມບ້ານ ລວມມູນຄ່າທັງໝົດ 832 ລ້ານກວ່າກີບ. ຈາກນັ້ນ, ໄດ້ຜ່ານບົດບັນທຶກການມອບ – ຮັບອາຄານຮຽນຫຼັງໃໝ່ ພ້ອມທັງຮ່ວມເຊັນບົດບັນທຶກເຊັນມອບໂດຍ ບໍລິສັດ ແສງຟ້າລີ ຜູ້ຮັບເໝົາການກໍ່ສ້າງ ເຊັນຮັບໂດຍ ທ່ານ ສົມພິດ ຈັນທະວົງ ກຳມະການພັກເມືອງ, ຫົວໜ້າຫ້ອງການສຶກສາທິການ ແລະ ກີລາເມືອງ ພ້ອມກັບມອບຕໍ່ໃຫ້ຄະນະອຳນວຍການໂຮງຮຽນ, ຄູ – ອາຈານ, ອົງການປົກຄອງບ້ານເປັນຜູ້ຄຸ້ມຄອງ, ນຳໃຊ້ສືບຕໍ່ໄປ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ