ໂຮງຊ່າງຫັດຖະກຳກອງແຊງ ເຂົ້າເຖິງແຫຼ່ງທຶນດອກເບ້ຍ 3% ຕໍ່ປີ - Laoedaily

ໂຮງຊ່າງຫັດຖະກຳກອງແຊງ ເຂົ້າເຖິງແຫຼ່ງທຶນດອກເບ້ຍ 3% ຕໍ່ປີ

ໂຮງຊ່າງຫັດຖະກຳກອງແຊງ ແກະສະຫຼັກໄມ້ລາຍລາວ ພັດທະນາສິນຄ້າຈົນໄດ້ຮັບກາໝາຍສິນຄ້າໜຶ່ງເມືອງ ໜຶ່ງຜະລິດຕະພັນ ໃນປີ 2014 ແລະ ທຸລະກິດໄດ້ມີການຂະຫຍາຍຕົວ; ຫຼ້າສຸດສາມາດເຂົ້າເຖິງແຫຼ່ງທຶນດອກເບ້ຍ 3% ຕໍ່ປີ ຂອງກອງທຶນສົ່ງເສີມວິສາຫະ  ກິດຂະໜາດນ້ອຍ ແລະ ກາງ    ( ສວ) ເພື່ອມາຕໍ່ຍອດທຸລະກິດ.

ວິສາຫະກິດສ່ວນບຸກຄົນໂຮງຊ່າງຫັດຖະກຳກອງແຊງ ແກະສະຫຼັກໄມ້ລາຍລາວ, ປະກອບກິດຈະການດ້ານຫັດຖະກຳໄມ້ແກະສະຫຼັກລາຍລາວ ທີ່ເຮັດດ້ວຍມື ຕັ້ງຢູ່ບ້ານຫ້ວຍຫົງ ເມືອງຈັນທະບູລີ ນະຄອນຫຼວງວຽງຈັນ.

ທ່ານ ອາຈານ ກອງແຊງ ລາດສະມູນ ເຈົ້າຂອງທຸລະກິດໂຮງຊ່າງຫັດຖະກຳກອງແຊງ ໄດ້ກ່າວວ່າ: ຕົນເອງຈົບການສຶກສາຈາກໂຮງຮຽນວິຈິດສິນ ປີ 1996, ຫຼັງຈາກຈົບມາກໍປະກອບອາຊີບເປັນຊ່າງຄວັດໄມ້, ປັ້ນລີງລາຍຕາມວັດວາອາຮາມຕ່າງໆ ຕົນເອງປະກອບອາຊີບດັ່ງກ່າວມາຈົນເຖິງ ປີ 2008 ເຫັນໄດ້ວ່າວຽກງານແກະສະຫຼັກໄມ້ເປັນທີ່ຕ້ອງການຫຼາຍຂຶ້ນທັງຢູ່ພາຍໃນ ແລະ ຕ່າງປະເທດ, ເຮັດໃຫ້ມີແນວຄິດຫັນເປັນທຸລະກິດຢ່າງຈິງຈັງ ໂດຍເລີ່ມຕົ້ນສ້າງໂຮງງານນ້ອຍໆຜະລິດແບບທຸລະກິດຄອບຄົວ ໂດຍເລີ່ມຜະລິດເພື່ອຂາຍໃຫ້ບຸກຄົນ. ໃນປີ 2009 ກໍໄດ້ເລີ່ມເປັນທີ່ຮູ້ຈັກຂອງຕະຫຼາດ ໂດຍການເຂົ້າຮ່ວມງານວາງສະແດງສິນຄ້າຢູ່ສູນການຄ້າ ລາວ – ໄອເຕັກ ເຊິ່ງຜົນຕອບຮັບແມ່ນດີເກີນຄາດສາມາດຂາຍສິນຄ້າທີ່ນຳໄປວາງສະແດງໄດ້ໝົດ ແລະ ຍັງໄດ້ຮັບການສັ່ງຊື້ຈາກລູກຄ້າເພີ່ມຂຶ້ນ.

Image may contain: 5 people, people standing and indoor

ສົກປີ 2011 – 2012 ໄດ້ຂຶ້ນທະບຽນວິສາຫະກິດ ແລະ ສ້າງເປັນໂຮງຊ່າງຫັດຖະກຳຄັກແນ່. ອາຈານ ກອງແຊງ ບໍ່ພຽງແຕ່ຮັບນາຍຊ່າງທີ່ມີຄວາມສາມາດເຂົ້າມາເຮັດວຽກນຳເທົ່ານັ້ນ ແຕ່ຍັງໄດ້ສ້າງໂອກາດໃຫ້ນັກຮຽນທີ່ກຳລັງສຶກສາຢູ່ຫາລາຍໄດ້ເສີມ ແລະ ຮັບເອົານັກຮຽນຈົບໃໝ່ຈາກໂຮງຮຽນວິຈິດສິນເຂົ້າມາເຮັດວຽກ; ໃນປີ 2014 ໂຮງຊ່າງຫັດຖະກຳກອງແຊງ ໄດ້ຮັບກາໝາຍສິນຄ້າໜຶ່ງເມືອງ ໜຶ່ງຜະລິດຕະພັນແຫ່ງຊາດ ( ODOP ) ຈາກກົມສົ່ງເສີມ ແລະ ພັດທະນາສິນຄ້າ ( ສພຄ ) ປັດຈຸບັນແມ່ນກົມສົ່ງເສີມການຄ້າ, ກະຊວງອຸດສາຫະກຳ ແລະ ການຄ້າ ແລະ ເປັນໜຶ່ງໃນສະມາຊິກສະມາຄົມເຟີນີເຈີລາວ.

Image may contain: one or more people, indoor and food

ອາຈານ ກອງແຊງ ໃຫ້ຮູ້ຕື່ມອີກວ່າ: ປັດຈຸບັນການດຳເນີນທຸລະກິດຂອງຕົນ ແມ່ນເປັນໄປດ້ວຍດີ ນອກຈາກການຂາຍສິນຄ້າຕາມງານວາງສະແດງສິນຄ້າຫັດຖະກຳຕ່າງໆຢູ່ພາຍໃນແລ້ວ ຍັງໄດ້ຖືກຮັບເຊີນໄປວາງສະແດງສິນຄ້າຢູ່ຫຼາຍປະເທດ ເຊັ່ນ: ປະເທດໄທ, ສປ ຈີນ, ສ.ເກົາຫຼີ ແລະ ອື່ນໆ ເຊິ່ງການໄປຮ່ວມການວາງສະແດງແຕ່ລະຄັ້ງ ກໍໄດ້ຮັບການຕອບຮັບທີ່ດີສະເໝີມາ, ນອກຈາກທຸລະກິດໂຮງຊ່າງຫັດຖະກໍາແລ້ວ ເພິ່ນຍັງປະກອບທຸລະກິດຮັບເໝົາກໍ່ສ້າງ ແລະ ຕົກແຕ່ງພາຍໃນເຮືອນດ້ວຍໄມ້ຕື່ມອີກດ້ວຍ.

ວິສາຫະກິດສ່ວນບຸກຄົນໂຮງຊ່າງຫັດຖະກຳກອງແຊງ ແກະສະຫຼັກໄມ້ລາຍລາວ ໄດ້ຮັບສິນເຊື່ອບ້ວງ 3% ຕໍ່ປີ ຜ່ານການປ່ອຍກູ້ຂອງທະນາຄານ ມາຣູຮານ ເຈແປນ ລາວ ມູນຄ່າ 900 ລ້ານກີບ ເຊິ່ງໄດ້ແບ່ງທຶນອອກເປັນ 2 ປະເພດ ຄື: ທຶນໝູນວຽນທີ່ນຳໃຊ້ເຂົ້າໃນການຊື້ວັດຖຸປະເພດໄມ້ສະໜອງໃຫ້ໂຮງງານ ແລະ ທຶນຄົງທີ່ນຳໃຊ້ເຂົ້າໃນການປັບປຸງ ແລະ ຕໍ່ຕື່ມໂຮງງານບ່ອນຜະລິດ.

Image may contain: outdoor

ອາຈານ ກອງແຊງ ໄດ້ຮູ້ຂໍ້ມູນຂອງແຫຼ່ງທຶນບ້ວງ 3% ນີ້ ຈາກທາງຫ້ອງການອຸດສາຫະກຳ ແລະ ການຄ້າເມືອງ. ດັ່ງນັ້ນ, ຈຶ່ງເລີ່ມຕົ້ນສຶກສາຫາຂໍ້ມູນ ກ່ຽວກັບທະນາຄານທີ່ເຂົ້າຮ່ວມໂຄງການ ແລະ ເຫັນວ່າທະນາຄານ ມາຣູຮານ ເຈແປນ ລາວ ຕົນເອງເຄີຍເປັນລູກຄ້າ ແລະ ເປັນໜຶ່ງໃນທະນາຄານທີ່ເຂົ້າຮ່ວມໂຄງການ ຈຶ່ງຕັດສິນໃຈເລືອກເຂົ້າຫາທະນາຄານດັ່ງກ່າວ ພາຍຫຼັງທີ່ໄດ້ຮັບການອະນຸມັດສິນເຊື່ອແລ້ວ ກໍເຂົ້າຮ່ວມການຝຶກອົບຮົມໃນຫົວຂໍ້ການຂຽນແຜນທຸລະກິດ, ການເງິນ ແລະ ການບັນຊີ. ພ້ອມນີ້, ຍັງກຳລັງກະກຽມເຂົ້າລະບົບບັນຊີຖືກຕ້ອງຕາມກົດໝາຍວ່າດ້ວຍລະບົບບັນຊີໃຫ້ສຳເລັດພາຍໃນປີ 2020.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ