ສຕລ ແຕ່ງຕັ້ງທ່ານ ສົມສະຫວາດ ເປັນປະທານກິດຕິມະສັກ ພ້ອມແຜນຈັດບານເຕະພາຍໃນ-ລະດັບຊາດ - Laoedaily

ສຕລ ແຕ່ງຕັ້ງທ່ານ ສົມສະຫວາດ ເປັນປະທານກິດຕິມະສັກ ພ້ອມແຜນຈັດບານເຕະພາຍໃນ-ລະດັບຊາດ

ກອງປະຊຸມໃຫຍ່ ສະໄໝສາມັກ ສະຫະພັນບານເຕະແຫ່ງຊາດລາວ ປະຈໍາປີ 2020 ຈັດຂຶ້ນໃນວັນທີ 19 ທັນວາ 2020 ທີ່ໂຮງແຮມເມືອງແທັງ ເຊິ່ງໂອກາດດັ່ງກ່າວໄດ້ມີການປະກາດແຕ່ງຕັ້ງ ທ່ານ ສົມສະຫວາດ ເລັ່ງສະຫວັດ ທີ່ປຶກສາ ຄະນະບໍລິຫານງານສູນກາງພັກ ເປັນປະທານກິດຕິມະສັກຂອງ ສຕລ ໂດຍໃຫ້ກຽດມອບເສື້ອ ສຕລ ໃຫ້ແກ່ ປະທານກິດຕິມະສັກໂດຍ ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ ເຊິ່ງມີຄະນະ ສຕລ ແລະ ຕາງໜ້າແຕ່ລະສະຫະພັນບານເຕະແຂວງ ແລະ ນະຄອນຫຼວງ ເຂົ້າຮ່ວມເປັນສັກຂີພິຍານ.

ເຊິ່ງໃນກອງປະຊຸມດັ່ງກ່າວໄດ້ລາຍການແຜນການເຄື່ອນໄຫວໃນປີ 2020 ໂດຍສະເພາະແມ່ນຜົນສໍາເລັດການແຂ່ງຂັນບານເຕະທົ່ວປະເທດ ເພື່ອຂໍ່ານັບຮັບຕ້ອນວັນຊາດທີ 2 ທັນວາ ຄົບຮອບ 45 ປີທີ່ນະຄອນຫຼວງວຽງຈັນ ເປັນເຈົ້າພາບໃນເດືອນພະຈິກ ທີ່ຜ່ານມາ ທີ່ເປັນເຫດການທີ່ພົ້ນເດັ່ນທີ່ສຸດໃນປະຫວັດສາດຂອງບານເຕະລາວ.

ກ່ອນທີ່ ທ່ານ ວີເພັດ ສີຫາຈັກຣ ປະທານ ສຕລ ຈະຂຶ້ນລາຍງານແຜນການຫຼາຍຢ່າງໃນປີ 2021 ໂດຍບາງແຜນການທີ່ສໍາຄັນທ່ານກ່າວວ່າ: ແຜນວຽກຈັດການແຂ່ງຕໍ່ ສະຫະພັນບານເຕະແຫ່ງຊາດລາວ ຮ່ວມກັບ ສະຫະພັນບານເຕະແຂວງ ແລະ ນະຄອນຫຼວງ ວາງແຜນຈະຈັດການແຂ່ງຂັນໃນປີ 2021 ປະກອບມີ ການແຂ່ງຂັນປະຈໍາປີພາຍໃນແຂວງ ແລະ ນະຄອນຫຼວງ, ການແຂ່ງຂັນເຍົາວະຊົນຊາຍ ຮຸ່ນອາຍຸບໍ່ເກີນ 18 ປີ, ການແຂ່ງຂັນເຍົາວະຊົນຊາຍ ຮຸ່ນອາຍຸບໍ່ເກີນ 15 ປີ ແລະ ການແຂ່ງຂັນບານເຕະເຍົາວະຊົນຍິງ ຮຸ່ນອາຍຸບໍ່ເກີນ 15 ປີ ເພື່ອສ້າງພື້ນຖານໃຫ້ແຕ່ລະແຂວງມີນັກກີລາຮຸ່ນສືບທອດ ພິເສດກໍແມ່ນທາງ ສຕລ ແມ່ນຈະໄດ້ຈັດການແຂ່ງຂັນບານເຕະລາຍການໃຫຍ່ປະຈໍາປີ ທົ່ວປະເທດ ເພື່ອຂໍ່ານັບຮັບຕອນວັນຊາດທີ 2 ທັນວາ ປີໜຶ່ງຕໍ່ໜຶ່ງຄັ້ງ.

ທ່ານ ກ່າວອີກວ່າ: ສ່ວນແຜນການແຂ່ງຂັນລາຍການນາໆຊາດແມ່ນພວກເຮົາກຽມສົ່ງເຂົ້າຮ່ວມຫຼາຍລາຍການໃນປີ 2021 ປະກອບມີ ທີມຊາດຊາຍ ຈະເຂົ້າຮ່ວມ ເອເອັຟເອັຟ ຊູຊູກິ ຄັບ, ຊີເກມ, ຢູ 23 ເອຊຽນ ຄັບ, ຊີງແຊັມອາຊີ ຢູ 19 ແລະ ລາຍການຊີງແຊັມອາຊຽນ 3 ລາຍການ ຢູ 22, ຢູ 19 ແລະ ຢູ 16, ສ່ວນທີມຊາດຍິງມີ: ຊີເກມ 2021; ຊີງແຊັມອາຊຽນ 3 ຮຸ່ນຄື ຊຸດໃຫຍ່, ຢູ 18 ກັບ ຢູ 15; ຊີງແຊັມລະດັບອາຊີ 2 ລາຍການຄື ຢູ 20 ກັບ ຢູ 17 ປີ.

ສໍາລັບ ກອງປະຊຸມໃຫຍ່ ສະໄໝສາມັກ ສະຫະພັນບານເຕະແຫ່ງຊາດລາວ ປະຈໍາປີ 2020 ແມ່ນຈັດຂຶ້ນເປັນໄລຍະເວລາເຄິ່ງມື້ ເຊິ່ງເຕັມໄປດ້ວຍຄວາມໝາຍຄວາມສໍາຄັນ ໂດຍສະເພາະກໍແມ່ນການລາຍງານຜົນສໍາເລັດຂອງການປະຕິບັດແຜນໃນປີ 2020 ແລະ ກໍຍັງມີການລາຍງານຫຼາຍໆແຜນວຽກທີ່ໜ້າຕິດຕາມໃນປີ 2021 ຕ້ອງຕິດຕາມກັນຕໍ່ໄປ.
ຂ່າວ: ຄໍາສອນ, ຮູບ: ສະຫະພັນບານເຕະແຫ່ງຊາດລາວ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ