ມີເກືອບ 150 ບໍລິສັດ ເຂົ້າລົງທຶນຢູ່ເຂດເສດຖະກິດພິເສດສະຫວັນນະເຂດ - Laoedaily

ມີເກືອບ 150 ບໍລິສັດ ເຂົ້າລົງທຶນຢູ່ເຂດເສດຖະກິດພິເສດສະຫວັນນະເຂດ

ມາຮອດປັດຈຸບັນມີບໍລິສັດເຂົ້າມາຈົດທະບຽນການລົງທຶນຢູ່ເຂດເສດຖະກິດພິເສດສະຫວັນນະເຂດ 148 ບໍລິສັດ ຈາກ 15 ປະເທດ ມີມູນຄ່າການລົງທຶນ 544 ລ້ານໂດລາ, ມີແຮງງານທັງໝົດ 4.362 ຄົນ.

ເມື່ອບໍ່ດົນມານີ້, ທ່ານ ທອງໃສ ໄຊຍະວົງຄຳດີ ຫົວໜ້າເຂດເສດຖະກິດພິເສດ ສະຫວັນນະເຂດ ( ຂສສຂ ) ຫຼື SEZໄດ້ລາຍງານສະພາບການເຄື່ອນໄຫວວຽກງານຕໍ່ ທ່ານ ສອນໄຊ ສິດພະໄຊ ຜູ້ວ່າການທະນາຄານ ແຫ່ງ ສປປ ລາວ ທີ່ເຄື່ອນໄຫວເຮັດວຽກຢູ່ເຂດດັ່ງກ່າວ ໂດຍທ່ານຫົວໜ້າເຂດ ໄດ້ໃຫ້ຮູ້ວ່າ: ຂສສຂ ມີພາລະບົດບາດສຳຄັນໃນຂົງເຂດເສດຖະກິດແຫ່ງຊາດ ແລະ ຮັບການສ້າງຂຶ້ນໃນປີ 2002 ຕາມແລວເສດຖະກິດຕາເວັນອອກ – ຕາເວັນຕົກຂອງລັດຖະບານ ໂດຍເຂດດັ່ງກ່າວມີ 5 ຈຸດ ຄື: ຈຸດ A ເຂດການບໍລິການ – ການຄ້າ; ຈຸດ B ແລະ B1 ເປັນເຂດອຸດສາຫະກຳການຜະລິດ; ຈຸດ C ເປັນເຂດອຸດສາຫະກຳ ແລະ ການຂົນສົ່ງໂລຈິສຕິກ; ຈຸດ D ເປັນເຂດທີ່ພັກອາໄສ ແລະ ຈຸດຊາຍແດນ ແດນສະຫວັນ ເປັນເຂດການຄ້າຊາຍແດນ ເຊິ່ງປັດຈຸບັນໄດ້ໂຮມຕົວເຂົ້າເປັນເຂດເສດຖະກິດພິເສດສະຫວັນ – ເຊໂນ ແລະ ໄດ້ເອີ້ນຊື່ວ່າ: ເຂດເສດຖະກິດພິເສດ ສະຫວັນນະເຂດ.

Image may contain: 3 people, people standing, sky, cloud and outdoor

ທ່ານຫົວໜ້າ ຂສສຂ ໄດ້ສະເໜີບັນດານະໂຍບາຍສົ່ງເສີມການລົງທຶນ ໂດຍມີໄລຍະຍົກເວັ້ນອາກອນລາຍໄດ້ ເຊິ່ງຍົກເວັ້ນອາກອນກໍາໄລ ແຕ່ 2 – 10 ປີ ນັບແຕ່ປີມີກຳໄລເປັນຕົ້ນໄປ; ສຳລັບອັດຕາອາກອນກຳໄລເກັບໃນອັດຕາ 8 – 10% ພາຍຫຼັງສິ້ນສຸດໄລຍະການຍົກເວັ້ນ; ອາກອນລາຍໄດ້ສ່ວນບຸກຄົນເກັບໃນອັດຕາດຽວກັນ 5% ທັງຄົນລາວ – ຄົນຕ່າງປະເທດ ແລະ ອາກອນເງິນປັນຜົນ ເກັບໃນອັດຕາ 5% ສໍາລັບບໍລິສັດທີ່ມີ 2 ຂາຮຸ້ນຂຶ້ນໄປ. ສະເພາະກ່ຽວກັບນະໂຍບາຍດ້ານທີ່ດິນຜູ້ລົງທຶນສາມາດເຊົ່າດິນຢູ່ໃນ ຂສສຂ ໄດ້ເຖິງ 75 ປີ ແລະ ສາມາດຕໍ່ອາຍຸການເຊົ່າໄດ້. ນອກນີ້, ຜູ້ເຊົ່າຍັງສາມາດໂອນທີ່ດິນໃຫ້ແກ່ບຸກຄົນທີ່ 3 ໄດ້.

Image may contain: cloud, sky, tree, plant and outdoor

ສຳລັບການປະຕິບັດໜ້າວຽກ: ໜ່ວຍງານບໍລິການປະຕູດຽວຂອງ ຂສສຂ ໂດຍເຈົ້າໜ້າທີ່ເຂດດັ່ງກ່າວສາມາດອະນຸມັດເອກະສານການລົງທຶນພາຍໃນ 5 ມື້ລັດຖະການ ເຊັ່ນ: ໃບອະນຸຍາດການລົງທຶນ, ໃບທະບຽນວິສາຫະກິດ, ເອກະສານທາງອາກອນ, ກາປະທັບບໍລິສັດ. ນອກນີ້, ຍັງອຳນວຍຄວາມສະດວກ ເປັນຕົ້ນການອອກອະນຸຍາດນໍາເຂົ້າ – ສົ່ງອອກ, ໃບຢັ້ງຢືນແຫຼ່ງກຳເນີດສິນຄ້າ, ໂກຕາແຮງງານ, ໃບອະນຸຍາດພັກເຊົາ, ບັດປະຈໍາຕົວນັກລົງທຶນ, ວິຊາເຂົ້າ – ອອກ ແລະ ໃຫ້ຄໍາປຶກສາທາງດ້ານນິຕິກຳ.

Image may contain: 10 people, including Viloonna Tanthavong, people standing, text that says 'SAVAN AVANNAKARK SAVAN PACIFICA DEVELOPMENT'

ທ່ານ ທອງໃສ ໄຊຍະວົງຄຳດີ ຍັງຢືນຢັນເຖິງຄວາມຄືບໜ້າທາງດ້ານການພັດທະນາ ເຊິ່ງມາຮອດປັດຈຸບັນມີບໍລິສັດທີ່ເຂົ້າມາຈົດທະບຽນການລົງທຶນທັງໝົດ ມີ 148 ບໍລິສັດ ຈາກ 15 ປະເທດ, ແບ່ງອອກເປັນ 3 ຂະແໜງການ ຄື: ອຸດສາຫະກຳ 69 ບໍລິສັດ; ການຄ້າ 19 ບໍລິສັດ; ການບໍລິການ 60 ບໍລິສັດ ມີມູນຄ່າການລົງທຶນ 544 ລ້ານໂດລາ ແລະ ທຶນຈົດທະບຽນ 234 ລ້ານໂດລາ; ສະເພາະດ້ານການນໍາ   ເຂົ້າ – ສົ່ງອອກ ແມ່ນມີມູນຄ່າການນໍາເຂົ້າສະເລ່ຍຕໍ່ປີ 290 ລ້ານໂດລາ ແລະ ມູນຄ່າການສົ່ງອອກ ສະເລ່ຍຕໍ່ປີ 375 ລ້ານໂດລາ, ໃນດ້ານແຮງງານມີຈໍານວນແຮງງານທັງໝົດ 4.362 ຄົນ. ໃນນີ້, ມີຄົນລາວ 4.199 ຄົນ ແລະ ຄົນຕ່າງປະເທດ 163 ຄົນ.

  [ ຂ່າວ – ຮູບ: ຣັດສະໝີ ດວງສັດຈະ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ