ການໃຊ້ຜ້າອັດປາກ - ດັງ ສຳລັບເດັກທີ່ຄວນປະຕິບັດ - Laoedaily

ການໃຊ້ຜ້າອັດປາກ – ດັງ ສຳລັບເດັກທີ່ຄວນປະຕິບັດ

ໃນສະພາວະທີ່ທົ່ວໂລກຍັງມີການລະບາດຂອງພະຍາດໂຄວິດ – 19 ຢູ່ນັ້ນ, ວິທີໜຶ່ງທີ່ທຸກຄົນຄວນປ້ອງກັນຕົນເອງຈາກພະຍາດດັ່ງກ່າວ ກໍຄືການໃຊ້ຜ້າອັດປາກ – ອັດດັງ, ລ້າງມືດ້ວຍເຈວແອລກໍຮໍ, ບໍ່ໄປທີ່ຊຸມຊົນແອອັດ, ຮັກສາໄລຍະຫ່າງ 2 ແມັດເປັນຕົ້ນ ເຊິ່ງກໍແມ່ນວິທີປ້ອງກັນຈາກພະຍາດສຳລັບທຸກຄົນ. ໃນນີ້, ສຳລັບເດັກທີ່ຈະຕ້ອງໃສ່ຜ້າອັດປາກ – ດັງ ໃນໄລຍະໂຄວິດ – 19 ທີ່ຄວນເຮັດ ມີດັ່ງນີ້:

ສຳລັບເດັກທີ່ມີສຸຂະພາບປົກກະຕິ ສາມາດໃສ່ຜ້າອັດປາກ – ອັດດັງທົ່ວໄປໄດ້ ໂດຍທີ່ບໍ່ແມ່ນຜ້າອັດປາກ – ອັດດັງທາງການແພດ ເຊິ່ງແບ່ງຕາມໄວອາຍຸ ດັ່ງນີ້:

1 ເດັກອາຍຸຕໍ່າກ່ວາ 5 ປີ ບໍ່ຄວນຖືກບັງຄັບໃຫ້ໃສ່ຜ້າອັດປາກ – ອັດດັງ.

2 ເດັກອາຍຸ 6 – 11 ປີ ຄວນປະເມີນວ່າມີການລະບາດເປັນວົງກວ້າງໃນບໍລິເວນບ່ອນທີ່ເດັກອາໄສຢູ່ ຫຼື ບໍ່?

3 ອາຍຸ 12 ປີຂຶ້ນໄປ ຄວນໃສ່ຜ້າອັດປາກ – ດັງຕາມເງື່ອນໄຂດຽວກັນກັບຜູ້ໃຫຍ່ ໂດຍສະເພາະແມ່ນເວລາທີ່ບໍ່ສາມາດຮັກສາໄລຍະຫ່າງຈາກຜູ້ອື່ນໄດ້ ແລະ ຢູ່ໃນບໍລິເວນທີ່ລະບາດ.

4 ເດັກຄວນເຮັດຕາມຫຼັກການດຽວກັນກັບຜູ້ໃຫຍ່ ກ່ຽວກັບການໃສ່ຜ້າອັດປາກ – ດັງພ້ອມທັງລ້າງມືກ່ອນໃສ່ຜ້າອັດປາກ – ອັດດັງທຸກໆຄັ້ງ.

5 ຜູ້ໃຫຍ່ຕ້ອງໝັ້ນໃຈວ່າຜ້າອັດປາກ – ດັງທີ່ກຽມໄວ້ໃຫ້ເດັກຕ້ອງມີຂະໜາດເໝາະສົມກັບດັງ, ປາກ ແລະ ຄາງຂອງເດັກ ແລະ ຄວນສອນວິທີສວມໃສ່, ຖອດອອກໃຫ້ເດັກຢ່າງປອດໄພ ພ້ອມທັງສອນໃຫ້ເດັກສຳຜັດກັບຜ້າອັດປາກ – ອັດດັງດ້ານໜ້າ ແລະ ບໍ່ໃຫ້ດຶງລົງມາໄວ້ລຸ່ມຄາງ ຫຼື ປາກ.

6 ຄວນມ້ຽນຜ້າອັດປາກ – ອັດດັງໄວ້ໃນກະເປົາ ຫຼື ບ່ອນອື່ນໆ ແລະ ບໍ່ຄວນໃຊ້ຜ້າອັດປາກ – ດັງຮ່ວມກັບຄົນອື່ນ.

7 ຕ້ອງປະເມີນການໃຊ້ຜ້າອັດປາກ – ດັງຂອງເດັກທຸກໄວ ທີ່ພັດທະນາຜິດປົກກະຕິ ຫຼື ມີບັນຫາສຸຂະພາບອື່ນໆ ໂດຍຜູ້ປົກຄອງ, ຄູ ຫຼື ແພດຜູ້ທີ່ໃຫ້ບໍລິການເດັກຄົນນັ້ນ.

8 ສຳລັບເດັກທີ່ມີພະຍາດປະຈຳຕົວ ເຊັ່ນ: ພະຍາດຫອບຫືດ, ມະເຮັງ ຄວນໃສ່ຜ້າອັດປາກ – ດັງທາງການແພດ ແລະ ຄວນປຶກສາແພດກ່ອນ ເພາະຜ້າອັດປາກ – ດັງທາງການແພດສາມາດຊ່ວຍປົກປ້ອງ ແລະ ປ້ອງກັນການແຜ່ລະບາດໄປສູ່ຜູ້ອື່ນໄດ້ດີ ແລະ ແນະນຳໃຫ້ທຸກຄົນທີ່ມີຄວາມສ່ຽງຈາກພະຍາດປະຈຳຕົວໄດ້ນຳອີກ.

9 ເດັກທີ່ມີອາການໂຄວິດ – 19 ຄວນໃສ່ຜ້າອັດປາກ – ດັງ ທາງການແພດໃຫ້ຫຼາຍທີ່ສຸດເທົ່າທີ່ຈະເຮັດໄດ້ ແລະ ຄວນແຍກເດັກຈາກຜູ້ອື່ນນຳ ພ້ອມທັງສະມາຊິກໃນຄອບຄົວຜູ້ເບິ່ງແຍງໃກ້ຊິດເດັກເຈັບປ່ວຍ ເວັ້ນໄລຍະຫ່າງຕໍ່າກວ່າ 1 ແມັດ ຄົນຢູ່ໃນເຮືອນກໍຄວນໃສ່ຜ້າອັດປາກ – ດັງ ເຊັ່ນດຽວກັນ.

10 ຖ້າເດັກເຂົ້າໃກ້ຄົນເຈັບຢູ່ໃນເຮືອນໃນໄລຍະຫ່າງຕໍ່າກວ່າ 1 ແມັດ ເດັກ ແລະ ຜູ້ໃຫຍ່ຄວນໃສ່ຜ້າອັດປາກ – ດັງທາງການແພດຕະຫຼອດເວລາ.

11 ເດັກບໍ່ຄວນໃສ່ຜ້າອັດປາກ – ດັງ ໃນລະຫວ່າງຫຼິ້ນກີລາ ຫຼື ກິດຈະກຳຕ່າງໆ ເຊັ່ນ: ເວລາແລ່ນ, ໂດດ ຫຼື ຫຼິ້ນໃນສວນສາທາລະນະ ເມື່ອເວລາຈັດກິດຈະກຳເຫຼົ່ານີ້ໃຫ້ກັບເດັກ ຄວນມີມາດຕະການທາງສາທາລະນະສຸກ ສິ່ງສຳຄັນແມ່ນການຮັກສາໄລຍະຫ່າງ ຢ່າງໜ້ອຍ 1 ແມັດ ຈຳກັດຈຳນວນເດັກທີ່ຫຼິ້ນດ້ວຍກັນ ແລະ ເຕືອນໃຫ້ເດັກລ້າງມືເລື້ອຍໆ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ