ຕະຫຼາດນັດແຮງງານນະຄອນຫຼວງວຽງຈັນມີຕໍາແໜ່ງງານວ່າງ 6 ພັນຕໍາແໜ່ງ - Laoedaily

ຕະຫຼາດນັດແຮງງານນະຄອນຫຼວງວຽງຈັນມີຕໍາແໜ່ງງານວ່າງ 6 ພັນຕໍາແໜ່ງ

ພະແນກແຮງງານ ແລະ ສະຫວັດດີການສັງຄົມນະຄອນຫຼວງວຽງຈັນ ( ຮສສ.ນວ) ຈັດງານຕະຫຼາດນັດແຮງງານ ຄັ້ງທີ 4 ຂຶ້ນ ເຊິ່ງມີຕໍາແໜ່ງງານວ່າງ ຈໍານວນ 6 ພັນຕໍາແໜ່ງ ໂດຍຄາດຄະເນຈະມີຜູ້ໄດ້ວຽກເຮັດງານທໍາ 1 ພັນຄົນ.

ພິທີເປີດຕະຫຼາດນັດແຮງງານຈັດຂຶ້ນໃນວັນທີ 18 ທັນວາ 2020 ເຂົ້າຮ່ວມຂອງ ທ່ານ ສີຫຸນ ສິດທິລືໄຊ ຮອງເຈົ້າຄອງນະຄອນຫຼວງວຽງຈັນ, ທ່ານ ປະເດີມພອນ ສົນທະນີ ຮອງລັດຖະມົນຕີກະຊວງ ຮສສ ມີຜູ້ປະກອບການຫົວໜ່ວຍແຮງງານ ແລະ ນັກສຶກສາເຂົ້າຮ່ວມ.

ທ່ານ ນາງ ລໍາພອຍ ສີອັກຄະຈັນ ຫົວໜ້າພະແນກ ຮສສ.ນວ ກ່າວວ່າ: ງານຕະຫຼາດນັດແຮງງານ ປະຈຳປີ 2020 ຈັດຂຶ້ນໃນວັນທີ 18 – 21 ທັນວາ 2020 ( 4 ວັນ ) ທີ່ພະແນກ ຮສສ.ນວ ເຊິ່ງເປັນໜຶ່ງໃນກິດຈະກຳຂອງການຈັດຫາງານ ເພື່ອສ້າງໂອກາດ ແລະ ເອື້ອອຳນວຍ ຄວາມສະດວກໃຫ້ແກ່ຜູ້ຊອກເຮັດວຽກເຮັດງານທຳ ແລະ ບັນດາຫົວໜ່ວຍແຮງງານ, ສ້າງເງື່ອນໄຂໃຫ້ແຮງງານຕ້ອງການພັດທະນາສີມືແຮງງານສາມາດເຂົ້າເຖິງສະຖາບັນຕ່າງໆ ເພື່ອຫຼຸດຜ່ອນອັດຕາວ່າງງານ ແລະ ຫຼຸດຜ່ອນການເຄື່ອນຍ້າຍແຮງງານໄປເຮັດວຽກຢູ່ຕ່າງປະເທດແບບບໍ່ຖືກຕ້ອງ. ນອກນັ້ນ, ຍັງສ້າງເງື່ອນໄຂ ແລະ ເອື້ອອຳນວຍຄວາມສະດວກໃຫ້ຜູ້ຕ້ອງການຊອກວຽກເຮັດງານທຳ, ຫົວໜ່ວຍແຮງງານໄດ້ພົບປະກັນ ລະຫວ່າງ ລູກຈ້າງ ແລະ ນາຍຈ້າງ, ສາມາດນຳໄປສູ່ການຮັບສະໝັກ ແລະ ຖືກບັນຈຸເຂົ້າໃນຕຳແໜ່ງວ່າງທີ່ເໝາະສົມຕາມກັບຄວາມຮູ້, ຄວາມສາມາດຂອງຜູ້ຊອກເຮັດວຽກ.

Image may contain: 11 people, people standing

ທ່ານກ່າວວ່າ: ພາຍໃນງານນີ້ມີຮ້ານຈັດຫາງານ 22 ຮ້ານ, ໃນນັ້ນບ່ອນຮັບສະໝັກງານ 19 ຮ້ານ ມີຕໍາແໜ່ງງານວ່າງຫຼາຍກວ່າ 6 ພັນຕໍາແໜ່ງ ຄາດວ່າຈະມີນັກສຶກສາ, ຜູ້ຊອກວຽກເຮັດງານທໍາ, ຜູ້ຕ້ອງການປ່ຽນວຽກໃໝ່ຫຼາຍກວ່າ 3 ພັນຄົນ ແລະ ມວນຊົນເຂົ້າຮ່ວມຫຼາຍກວ່າ 5 ພັນຄົນ ແລະ ຄາດວ່າຜູ້ຊອກວຽກເຮັດງານທໍາຈະຖືກຄັດເລືອກບັນຈຸເຂົ້າໃນຕໍາແໜ່ງວ່າງງານຂອງບັນດາຫົວໜ່ວຍແຮງງານ ຈໍານວນ 1 ພັນຄົນ.

Image may contain: 2 people

ທ່ານ ສີຫຸນ ສິດທິລືໄຊ ກ່າວວ່າ: ງານດັ່ງກ່າວແມ່ນຈັດແຕກຕ່າງຈາກປີຜ່ານມາ ເນັ້ນໃຫ້ຜູ້ວ່າງງານ, ນັກສຶກສາ ສາມາດລົງທະບຽນເພື່ອໃຫ້ສັງຄົມມີຄວາມເຂົ້າໃຈ ແລະ ເຂົ້າເຖິງຂ່າວສານຄວາມຕ້ອງການຂອງຕະຫຼາດແຮງງານໃຫ້ຫຼາຍຂຶ້ນ.

Image may contain: 5 people

ທ່ານກ່າວວ່າ: ປັດຈຸບັນຄຸນນະພາບແຮງງານພາຍໃນເຮົາຍັງຈໍາກັດ ຄວາມສາມາດແຂ່ງຂັນໃນອາຊຽນຍັງເປັນສິ່ງທ້າທາຍ, ລະບຽບວິໄນຂອງຜູ້ອອກແຮງງານຍັງປະຕິບັດບໍ່ທັນໄດ້ດີ, ການສ້າງແຜນພັດທະນາສືມືແຮງງານຍັງບໍ່ທັນສອດຄ່ອງກັບ ຄວາມຕ້ອງການຕະຫຼາດແຮງງານຂອງພວກເຮົາ. ສະນັ້ນ, ຈຶ່ງຮຽກຮ້ອງມາຍັງ ຮສສ.ນວ ສົມທົບກັບຫົວ ໜ່ວຍທຸລະກິດເພີ່ມທະວີ ຄວາມຮ່ວມມື, ວາງແຜນ ແລະ ສ້າງແຜນພັດທະນາສີມືແຮງງານ ແລະ ກໍາລັງແຮງງານພາຍໃນໃຫ້ມີຄຸນນະພາບ ສາມາດຮອງຮັບໃນຕໍາແໜ່ງງານ ປະກອບສ່ວນໃນການພັດທະນາເສດຖະກິດ – ສັງຄົມໃນແຕ່ລະໄລຍະ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ