ເປີດນໍາໃຊ້ຢ່າງເປັນທາງການ ທາງດ່ວນນະຄອນຫຼວງວຽງຈັນ-ວັງວຽງ ພ້ອມໃຫ້ແລ່ນຟຣີ 21-23 ທັນວານີ້ - Laoedaily

ເປີດນໍາໃຊ້ຢ່າງເປັນທາງການ ທາງດ່ວນນະຄອນຫຼວງວຽງຈັນ-ວັງວຽງ ພ້ອມໃຫ້ແລ່ນຟຣີ 21-23 ທັນວານີ້

ພິທີເປີດນໍາໃຊ້ທາງດ່ວນນະຄອນຫຼວງວຽງຈັນ-ວັງວຽງ ໄລຍະທີ 1 ຂອງທາງດ່ວນນະຄອນຫຼວງວຽງຈັນ ຫາດ່ານຊາຍແດນບໍ່ເຕັນ-ບໍ່ຫານ ຢ່າງເປັນທາງການ ໄດ້ຈັດຂຶ້ນໃນວັນທີ 20 ທັນວາ 2020 ທີ່ຈຸດເກັບເງິນນະຄອນຫຼວງວຽງຈັນຂອງທາງດ່ວນ, ໂດຍເປັນກຽດເຂົ້າຮ່ວມຂອງທ່ານ ບຸນຍັງ ວໍລະຈິດ ປະທານປະເທດ ແຫ່ງ ສປປ ລາວ, ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ, ມີບັນດາການນໍາຂັ້ນສູງ, ອາດີດດການນໍາພັກ-ລັດ, ລັດຖະມົນຕີ, ຮອງລັດຖະມົນຕີ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ທ່ານ ບຸນຈັນ ສິນທະວົງ ລັດຖະມົນຕີ ກະຊວງໂຍທາທິການ ແລະ ຂົນສົ່ງ ໄດ້ລາຍງານກ່ຽວກັບໂຄງການບາງຕອນກ່າວວ່າ: ໂຄງການກໍ່ສ້າງທາງດ່ວນ ແຕ່ນະຄອນຫຼວງວຽງຈັນ ຫາ ວັງວຽງ ແມ່ນນອນໃນໂຄງການທາງດ່ວນ ລາວ-ຈີນ ທີ່ມີຈຸດເລີ່ມແຕ່ນະຄອນຫຼວງວຽງຈັນ ຫາ ບໍ່ເຕັນ ແຂວງຫຼວງນ້ຳທາ ຊາຍແດນ ສປ ຈີນ ໂດຍຜ່ານ 4 ແຂວງຄື: ນະຄອນຫຼວງວຽງຈັນ; ແຂວງວຽງຈັນ; ຫຼວງພະບາງ; ອຸດົມໄຊ ແລະ ຫຼວງນ້ຳທາ. ສະເພາະການກໍ່ສ້າງໄລຍະທຳອິດແມ່ນຈະສ້າງແຕ່ ນະຄອນຫຼວງວຽງຈັນ ຫາ ວັງວຽງ ແຂວງວຽງຈັນ ທີ່ມີຄວາມຍາວທັງໝົດ 109 ກວ່າກິໂລແມັດ, ກວ້າງ 23 ແມັດ, ມີ 4 ຊ່ອງຈະລາຈອນ ແລະ ມີ 2 ແລວ ໄປ-ກັບ ເຊິ່ງເປັນການລົງທຶນຂອງກຸ່ມບໍລິສັດ ກໍ່ສ້າງລົງທຶນແຂວງຢຸນນານ ໃນຮູບແບບ (BOT) ຕາມແຜນການແມ່ນຈະໃຊ້ເວລາໃນການກໍ່ສ້າງ 2 ປີ ໃຫ້ສຳເລັດຄື ທ້າຍປີ 2018-2020 ໃນມູນຄ່າການກໍ່ສ້າງປະມານ 1.192 ລ້ານໂດລາ ແລະ ໄດ້ກຳນົດຫົວໜ່ວຍຄິດໄລ່ເກັບຄ່າບໍລິການ 0.06 ໂດລາຕໍ່ກິໂລແມັດ.

ທາງດ່ວນເສັ້ນນີ້ຈະຕັດຜ່ານ 4 ເມືອງ ຄື: ເມືອງນາຊາຍທອງ, ເມືອງໂພນໂຮງ, ເມືອງຫີນເຫີບ ແລະ ເມືອງວັງວຽງ. ສະເພາະແລວເສັ້ນທາງແຕ່ ນະຄອນຫຼວງວຽງຈັນ ຫາ ອຸມົງພູພະ ແມ່ນອອບແບບໃຫ້ລົດແລ່ນ 100 ກິໂລແມັດຕໍ່ຊົ່ວໂມງ ແລະ ແຕ່ອຸມົງ ຫາ ວັງວຽງ ແມ່ນ 80 ກິໂລແມັດຕໍ່ຊົ່ວໂມງ ຕະຫຼອດເສັ້ນທາງຈະມີການກໍ່ສ້າງວົງວຽນເຊື່ອມຕໍ່ຂຶ້ນລົງ ທາງດ່ວນທັງໝົດ 7 ຈຸດຄື: 1: ຈຸດບ້ານນາຊອນ; 2: ບ້ານບົວ; 3: ບ້ານສະກ້າ; 4: ໂພນໂຮງ; 5: ຫີນເຫີບ; 6: ທ່າເຮືອ ອ່າງນໍ້າງື່ມ ແລະ ຈຸດທີ 7: ແມ່ນວັງວຽງ ວົງວຽນທັງໝົດແມ່ນຈະອອກແບບເປັນຮູບລັກສະນະຄ້າຍຄືຮູບຊົງແກ ປະກອບໃຫ້ມີເສັ້ນທາງເພື່ອເຊື່ອມຕໍ່ກັບເສັ້ນທາງເລກທີ 13 ເໜືອ ເຊິ່ງບໍ່ພຽງແຕ່ສະດວກສະບາຍແກ່ການເຂົ້າ-ອອກ.

ພາຍຫຼັງພິທີເປີດນຳໃຊ້ຢ່າງເປັນທາງການໃນວັນທີ 20 ນີ້ ແມ່ນຈະເປີດໃຫ້ປະຊາຊົນນຳໃຊ້ ຟີຣີ ໂດນບໍ່ເສຍຄ່າທໍານຽມຜ່ານທາງເປັນເວລາ 3 ວັນ ໃນລະຫວ່າງວັນທີ 21 – 23 ທັນວາ 2020 ເພື່ອເປັນການຊົມເຊີຍວັນຊາດທີ 2 ທັນວາ ຄົບຮອບ 45 ປີ.

ໃນພິທີ ທ່ານ ສອນໄຊ ສີພັນດອນ ກໍ່ໄດ້ມີຄໍາເຫັນຕໍ່ພິທີເປີດນໍາໃຊ້ທາງດ່ວນເສັ້ນນີ້ ໂດຍມີບາງຕອນກ່າວວ່າ: ໂຄງການທາງດ່ວນ ແຕ່ນະຄອນຫຼວງວຽງຈັນ ຫາ ບໍ່ເຕ່ນ ແມ່ນໜຶ່ງໃນໂຄງການພັດທະນາພື້ນຖານໂຄງລ່າງບຸລິມະສິດຂອງ ສປປ ລາວ ທີ່ມີລັກສະນະຍຸດທະສາດ ເປັນໂຄງການສັນຍາລັກ ແຫ່ງການຮ່ວມມື ພາຍໃຕ້ຂໍ້ລິເລີ່ມ ໜຶ່ງແລວ ໜຶ່ງເສັ້ນທາງຂອງສະຫາຍ ສີຈິ້ນຜິງ ແລະຍຸດທະສາດການຫັນປະເທດທີ່ບໍ່ມີຊາຍແດນຕິດກັບທະເລເປັນປະເທດເຊື່ອໂຍງເຊື່ອມຈອດຂອງ ສປປ ລາວ, ເປັນຂີດໝາຍໃໝ່ແຫ່ງມູນເຊື້ອໄມຕີຈິດ ມິດຕະພາບ ການເປັນຄູ່ຮ່ວມມືຍຸດທະສາດຮອບດ້ານ ໝັ້ນຄົງ ຍາວນານຕາມທິດ 4 ດີ ແລະ ບົນຈິດໃຈຄູ່ຮ່ວມສະຕາກໍາ ລະຫວ່າງລາວ-ຈີນ, ຈີນ-ລາວ.

ທ່ານ ສອນໄຊ ສີພັນດອນ ກ່າວຕື່ມວ່າ: ການເປີດນໍາໃຊ້ເສັ້ນທາງດ່ວນນະຄອນຫຼວງວຽງຈັນ-ວັງວຽງໃນຄັ້ງນີ້ ຖືວ່າເປັນຂອງຂວັນອັນລໍ້າຄ່າໜຶ່ງ ໃຫ້ແກ່ພັກ-ລັດຖະບານ ແລະ ປະຊາຊົນລາວໃນໂອກາດສະເຫຼີມສະຫຼອງວັນສະຖາປະນາ ສປປ ລາວ ຄົບຮອດ 45ປີ, ວັນຄ້າຍວັນເກີດປະທານໄກສອນ ພົມວິຫານ ຜູ້ນໍາທີ່ແສນເຄົາລົບຮັກຂອງປວງຊົນລາວທັງຊາດ ຄົບຮອບ 100ປີ ແລະ ພິເສດ ກໍ່ເປັນການຂໍ່ານັບຮັບຕ້ອນກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XI ຂອງພັກ ປະຊາຊົນປະຕິວັດລາວ ທີ່ຈະໄຂຂຶ້ນໃນມໍ່ໆນີ້.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ