ມອບ-ຮັບ ພ້ອມເປີດນໍາໃຊ້ ວິທະຍາໄລເຕັກນິກ ລາວ-ເຢຍລະມັນ ວິທະຍາເຂດທີ2 - Laoedaily

ມອບ-ຮັບ ພ້ອມເປີດນໍາໃຊ້ ວິທະຍາໄລເຕັກນິກ ລາວ-ເຢຍລະມັນ ວິທະຍາເຂດທີ2

ໃນວັນທີ 18 ທັນວາ 2020 ທີ່ຜ່ານມາ ໄດ້ມີພິທີມອບ-ຮັບ ແລະ ເປີດນໍາໃຊ້ອາຄານ ວິທະຍາໄລເຕັກນິກລາວ-ເຢຍລະມັນ ຫຼັງທີ 2 ຢູ່ທີ່ບ້ານຮຊຽງດາ ເມືອງໄຊເສດຖາ ນະຄອນຫຼວງວຽງຈັນ ໂດຍການເຂົ້າຮ່ວມຂອງທ່ານ ພຸດ ສິມມະລາວົງ ຮອງລັດຖະມົນຕີກະຊວງສຶກສາທິການ ແລະ ກີລາ, ທ່ານ Jens Luckenherm ເອກອັກຄະລັດຖະທູດເຢຍລະມັນປະຈໍາລາວ, ທ່ານ ໜູພັນ ອຸດສາ ຫົວໜ້າກົມອາຊີວະສຶກສາ ພ້ອມດ້ວຍພາກສ່ວນກ່ຽວຂ້ອງ ແລະ ນັກສຶກສາພາຍໃນວິທະຍາໄລລາວ-ເຢຍລະມັນ ເຂົ້າຮ່ວມ.

ໃນພິທີ ທ່ານ ໜູພັນ ອຸດສາ ໄດ້ຂຶ້ນກ່າວປະຫວັດຄວາມເປັນມາຂອງໂຄງການ ໂດຍມີບາງຕອນກ່າວວ່າ: ກະຊວງສຶກສາທິການ ແລະ ກິລາເວົ້າລວມ, ເວົ້າສະເພາະແມ່ນກົມອາຊີວະສຶກສາໄດ້ຮັບການສະໜັບສະໜູນທຶນຊ່ວຍເຫຼືອຈາກລັດຖະບານເຢຍລະມັນ ໂດຍຮ່ວມກັບທະນາຄານພັດທະນາເຢຍລະມັນ ເປັນຜູ້ຈັດຕັ້ງປະຕິບັດໂຄງການສະໜັບສະໜູນການເງິນອາຊີວະສຶກສາ(VEFF) ໃນມູນຄ່າ 6,8 ລ້ານຢູໂຣເຊິງມີ 03 ກິດຈະກຳຫຼັກ: (1). ສົ່ງເສີມການຈັດການຮຽນ-ການສອນອາຊີວະສຶກສາແບບຄວບຄູ່(ອສຄ) ລະຫວ່າງ ສະຖານອາຊີວະສຶກສາ ແລະ ສະຖານປະກອບການ, (2). ການຄຸ້ມຄອງກອງທຶນອາຊີວະສຶກສາ ແລະ (3). ການຂະຫຍາຍວິທະຍາເຂດໃໜ່ ຂອງວິທະຍາໄລ ເຕັກນິກລາວ-ເຢຍລະມັນ.

ສຳລັບການຂະຫຍາຍວິທະຍາເຂດໃນກິດຈະກຳທີ 3 ແມ່ນໄດ້ຮັບທຶນການກໍ່ສ້າງ ເພື່ອຂະຫຍາຍວິທະຍາເຂດໃໜ່ ຂອງວິທະຍາໄລ ເຕັກນິກລາວ-ເຢຍລະມັນ ມູນຄ່າ 1,15 ລ້າຢູ່ໂຣ, ໃນນີ້ມີການກໍ່ສ້າງໂຮງຝຶກງານຂອງສາຂາ ກົນຈັກໜັກ 1 ຫຼັງ ມູນຄ່າ 186,782 ຢູໂຣ, ໂຮງຝຶກງານສຳລັບສາຂາກົນຈັກກະສິກໍາ 01 ຫຼັງມູນຄ່າ 151,405 ຢູໂຣ, ສ້າງສູນປະສານງານອາຊີວະສຶກສາແບບຄວບຄູ່ 01 ຫຼັງ ມູນຄ່າ 181,502 ຢູໂຣ, ອາຄານຮຽນພາກທິດສະດີ ພ້ອມທັງອຸປະກອນ ໄອທີ ມູນຄ່າ 278,036 ຢູໂຣ ແລະ ສ້າງທາງເດີນ ພ້ອມທັງລະບົບນໍ້າບາດານ ແລະ ຮ່ອງລະບາຍນໍ້າຕ່າງໆ ມູນຄ່າ 194,722 ຢູໂຣ.

ໃນນີ້ຍັງມີທຶນປະກອບສ່ວນຂອງລັດຖະບານ ລາວ ຈໍານວນ 1,4 ລ້ານຢູ່ໂຣ ໃນການກໍ່ສ້າງຫໍພັກຍິງ-ຊາຍຈຳວນ 2 ຫຼັງ, ຮົ໊ວອ້ອມ, ໄຟຟ້າ ແລະ ນໍ້າປະປາ, ນອກຈາກນີ້ວິທະຍາເຂດແຫ່ງນີ້ຍັງໄດ້ຮັບການຊ່ວຍເຫຼືອອຸປະກອນເຕັກນິກຈາກພາກສ່ວນຫົວໜ່ວຍທຸລກິດ ເຊັ່ນ: Tractor, ລົດກ່ຽວເຂົ້າ, ລົດໄຖນາເດີນຕາມ, ເຄື່ອງຈັກຈຳລອງສຳລັບຝຶກພາກປະຕິບັດ ແລະ ອື່ນໆ ອີກຈຳນວນໜື່ງ.

ພ້ອມນີ້ ທ່ານ ພຸດ ສິມມາລາວົງ ໄດ້ກ່າວວ່າ: ກ່ອນຫນ້ານີ້ປະມານ 10 ປີ ລັດຖະບານແຫ່ງ ສປປລາວ ແລະ ສສ ເຢຍລະມັນ ໄດ້ຕົກລົງ ລົງທຶນຮ່ວມກັນ ໃນວົງເງິນປະມານ 5 ລ້ານໂດລາສະຫະລັດ ເພື່ອຂະຫຍາຍ ແລະ ພັດທະນາ ວິທະຍາໄລ ເຕັກນິກລາວ-ເຢຍລະມັນໃຫ້ມີຄວາມທັນສະໄຫມ ໂດຍການປະກອບອູປະກອນເຕັກນິກໃສ່ຢ່າງຄົບຖ້ວນໃນວິທະຍາເຂດເກົາ.

ມາຮອດວັນນີ້ວິທະຍາໄລ ເຕັກນິກແຫ່ງນີ້ສາມາດເບິ່ງຄືນປະຫວັດຕະຫລອດ 55 ປີທີ່ຜ່ານມາ ຊຶ່ງໃນນັ້ນກໍ່ມີປີທີ່ດີຫລາຍ ແລະ ປິທີ່ດີຫນ້ອຍ ແຕ່ການຮ່ວມມືກັບ ສສ ເຢຍລະມັນ ເປັນທີ່ສຳຄັນທີ່ສຸດ ເຊັ່ນດຽວກັນກັບການນໍາໃຊ້ພາລະບົດບາດພິເສດຂອງວິທະຍາໄລແຫ່ງນີ້ ເວົ້າລວມ ເວົ້າສະເພາະແມ່ນວິທະຍາເຂດ ແຫ່ງນີ້ເພື່ອພັດທະນາວຽກງານອາຊີວະສຶກສາ ໃນຂອບເຂດທົ່ວປະເທດ. ໂດຍສະເພາະນັບແຕ່ວັນນີ້ເປັນຕົ້ນໄປ ວິທະຍາໄລແຫ່ງນີ້ຈະມີບົດດບາດເປັນວິທະຍາໄລຕົວແບບ ສຳລັບສະຖານອາຊີວະສຶກສາແຫ່ງອຶ່ນໆ ໃນການຮ່ວມມືກັບສະຖານປະກອບການ.

ການຂະຫຍາຍ ແລະ ສະຫນອງອູປະກອນເຕັກນິກທີ່ທັນສະໄຫມ ໃຫ້ແກ່ວິທະຍາໄລ ແຫ່ງນີ້ແມ່ນມີຄວາມຈຳເປັນ ແລະ ມີຄວາມຫມາຍສຳຄັນຫລາຍ ຕໍ່ການພັດທະນາຄຸນນະພາບ ແລະ ຄວາມສອດຄ່ອງ ຂອງການກໍ່ສ້າງກໍາລັງແຮງງານລາວ ສຳລັບການພັດທະນາເສດຖະກິດໃນປະເທດ ແລະ ພາກພື້ນ. ການຂະຫຍາຍນີ້ໄດ້ຊ່ວຍໃຫ້ທາງວິທະຍາໄລ ສາມາດຮັບນັກຮຽນໄດ້ເພີ່ມຂຶ້ນ ໃນແຕ່ລະປີ ນັບແຕ່ລະດັບຊ່າງຊຳນານງານ ຈົນເຖິງຊ່າງເຕັກນິກຊັ້ນສູງ.

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ