ເບຍລາວ ມອບທຶນການສຶກສາໃຫ້ມະຫາວິທະຍາໄລສະຫວັນນະເຂດ ແລະ ວິທະຍາໄລຄູສະຫວັນນະເຂດ ຈຳນວນ 65 ທຶນ - Laoedaily

ເບຍລາວ ມອບທຶນການສຶກສາໃຫ້ມະຫາວິທະຍາໄລສະຫວັນນະເຂດ ແລະ ວິທະຍາໄລຄູສະຫວັນນະເຂດ ຈຳນວນ 65 ທຶນ

ບໍລິສັດເບຍລາວ ຈຳກັດ ມອບທຶນການສຶກສາໃຫ້ແກ່ນັກສຶກສາມະຫາວິທະຍາໄລສະຫວັນນະເຂດ ຄັ້ງທີ 10 ແລະ ວິທະຍາໄລຄູສະຫວັນນະເຂດ ຄັ້ງທີ 6 ປະຈຳສົກຮຽນ 2020 – 2021 ເມືອວັນທີ 17 ທັນວາ 2020 ທີ່ຜ່ານມາ, ໂດຍການເຂົ້າຮ່ວມຂອງທ່ານ ຄູນ ສັກບົວວົງ ຮອງອະທິການບໍດີມະຫາວິທະຍາໄລສະຫວັນນະເຂດ, ທ່ານ ໃຈເພັດ ບູລົມ ຜູ້ຈັດການຝ່າຍຂາຍບໍລິສັດເບຍລາວປະຈຳພາກກາງ ແລະ ທ່ານ ສົມພົງ ສີຈັນທອງທິບ ຮອງຜູ້ອຳນວຍການວິທະຍາໄລຄູສະຫວັນນະເຂດ ພ້ອມດ້ວຍຄູ – ອາຈານ, ຜູ້ຕາງໜ້າຈາກບໍລິສັດເບຍລາວ ແລະ ນັກສຶກສາຜູ້ທີ່ໄດ້ຮັບທຶນການສຶກສາຈາກບໍລິສັດເບຍລາວເຂົ້າຮ່ວມ.

ໃນພິທີ ທ່ານ ຄຳເຜີຍ ອັກຄະວົງ ຄະນະຮັບຜິດຊອບກອງທຶນຂອງມະຫາວິທະຍາໄລສະຫວັນນະເຂດກໍ່ໄດ້ລາຍງານ ກ່ຽວກັບການຊ່ວຍເຫຼືອດ້ານທຶນການສຶກສາ ທີ່ບໍລິສັດເບຍລາວໄດ້ໃຫ້ການສະໜັບໜູນ ນັບແຕ່ສົກຮຽນ 2011 – 2012 ເປັນຕົ້ນມາ ໃນສົກຮຽນທຳອິດບໍລິສັດເບຍລາວໄດ້ໃຫ້ທຶນຈຳນວນ 14 ຄົນ,ໃນສົກຮຽນ 2012 ຫາ 2014 ໄດ້ເພີ່ມຈາກ 14 ຄົນມາເປັນ 28 ຄົນ ແລະ ມາຮອດສົກຮຽນ 2014 – 2015 ທາງບໍລິສັດເບຍລາວໄດ້ໃຫ້ທຶນການສຶກສາເພີ່ມອີກຈຳນວນ 17 ທຶນ ມາເປັນສົກຮຽນລະ 45 ທຶນຈົນເຖິງປັດຈຸບັນ.

ສຳລັບວິທະຍາໄລຄູສະຫວັນນະເຂດ ບໍລິສັດເບຍລາວໄດ້ຮັບທຶນສະໜັບສະໜູນການສຶກສາ ນັບແຕ່ສົກຮຽນ2015-2016 ຈົນເຖິງປັດຈຸບັນ ລວມທັງໝົດ 100 ຄົນ, ຍິງ 66 ຄົນ

ສຳລັບມາດຖານເງື່ອນໄຂຂອງຜູ້ທີ່ຈະໄດ້ຮັບທຶນການສຶກສາຈາກບໍລິສັດເບຍລາວ ຕ້ອງແມ່ນຜູ້ທີ່ຮຽນດີ,ຮຽນເກັ່ງ,ມີພອນສະຫວັນ,ມີຄວາມສາມາດ,ຜູ້ທຸກຍາກດ້ອຍໂອກາດ,ເຜົ່າ ແລະ ຜູ້ຂາດເຂີນທຶນຮອນທາງດ້ານການສຶກສາ ຈຶ່ງຈະໄດ້ຮັບທຶນດັ່ງກ່າວ

ໂອກາດດຽວກັນ ທ່ານ ໃຈເພັດ ບູລົມ ຜູ້ຈັດການຝ່າຍຂາຍບໍລິສັດເບຍລາວປະຈຳພາກກາງກໍ່ໄດ້ມີຄຳເຫັນວ່າ: ຈຸດປະສົງໃນການມອບທຶນການສຶກສາໃນຄັ້ງນີ້ ທາງບໍລິສັດເບຍລາວ ຈຳກັດ ໄດ້ໃຫ້ຫົວຂໍ້ວ່າ: ເປັນໂຄງການສ້າງຝັນໃຫ້ແກ່ນັກສຶກສາຮຽນດີ,ຮຽນເກັ່ງ ແຕ່ຂາດເຂີນທາງດ້ານທຶນຮອນ. ບໍລິສັດເບຍລາວກໍ່ເປັນບໍລິສັດໜຶ່ງທີ່ໃຫ້ຄວາມສຳຄັນໃນການຊຸກຍູ້ຊ່ວຍເຫຼືອສັງຄົມ ໂດຍສະເພາະແມ່ນການມີສ່ວນຮ່ວມອະນຸລັກສົ່ງເສີມຮີດຄອງປະເພນີລາວ,ຊຸກຍູ້ສະຖາບັນການສຶກສາ ເປັນຕົ້ນແມ່ນການສົ່ງເສີມດ້ານການສຶກສາໃຫ້ຄົນລາວມີຄວາມຮູ້ຄວາມສາມາດທຽບເທົ່າກັບບັນດາປະເທດອື່ນໆ,ສົ່ງເສີມວຽກງານຮັກສາສິ່ງແວດລ້ອມ,ວຽກງານກິລາ,ສາທາລະນະສຸກ,ໄພນ້ຳຖ້ວມ ແລະ ອື່ນໆ.

ຈາກນັ້ນໃນພິທີກໍ່ໄດ້ມີການມອບ – ຮັບທຶນການສຶກສາປະຈຳສົກຮຽນ 2020 – 2021 ຢ່າງເປັນທາງການ ໃນນີ້ມະຫາວິທະຍາໄລສະຫວັນນະເຂດ ໄດ້ຮັບທຶນການສຶກສາ ຈຳນວນ 45 ທຶນເປັນ ເງິນທັງໝົດ 131.500.000 ກີບ ແລະ ວິທະຍາໄລຄູສະຫວັນນະເຂດ ໄດ້ຮັບທຶນການສຶກສາຈຳນວນ 20 ທຶນເປັນເງິນທັງໝົດ 64.000.000 ກີບ ໃຫ້ກຽດມອບໂດຍທ່ານ ໃຈເພັດ ບູລົມ ຜູ້ຈັດການຝ່າຍຂາຍບໍລິສັດເບຍລາວປະຈຳພາກກາງ ຕາງໜ້າຮັບທຶນການສຶກສາຄັ້ງນີ້ໂດຍແມ່ນທ່ານ ຮສ.ປອ ຄູນ ສັກບົວວົງ ຮອງອະທິການບໍດີມະຫາວິທະຍາໄລສະຫວັນນະເຂດ ແລະ ທ່ານ ສົມພົງ ສີຈັນທອງທິບ ຮອງຜູ້ອຳນວຍການວິທະຍາໄລຄູສະຫວັນນະເຂດເພື່ອນຳໄປມອບຕໍ່ໃຫ້ກັບນັກສຶກສາຜູ້ທີ່ໄດ້ຮັບທຶນສະໜັບສະໜູນຈາກບໍລິສັດເບຍລາວ ຈຳກັດ.

ຂໍ້ມູນຈາກ: ວິທະຍຸກະຈາຍສຽງສະຫວັນນະເຂດ

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ