ເຊກອງ ສະຫຼຸບການປະຕິບັດວຽກໂຄງການສ້າງຄວາມເຂັ້ມແຂງບໍລິການຮັກສາສຸຂະພາບໄລຍະ II - Laoedaily

ເຊກອງ ສະຫຼຸບການປະຕິບັດວຽກໂຄງການສ້າງຄວາມເຂັ້ມແຂງບໍລິການຮັກສາສຸຂະພາບໄລຍະ II

ວັນທີ 15 ທັນວາ 2020 ນີ້ ທີ່ພະແນກສາທາລະນະສຸກແຂວງເຊກອງ ໄດ້ຈັດກອງປະຊຸມສະຫຼຸບການປະຕິບັດວຽກງານ ແລະ ປິດໂຄງການສ້າງຄວາມເຂັ້ມແຂງດ້ານການບໍລິການຮັກສາສຸຂະພາບໄລຍະ II ໂດຍການເປັນປະທານຂອງ ທ່ານ ດຣ. ຄໍາໄຫຼ ສັນຕິພູມ ຫົວໜ້າພະແນກສາທາລະນະສຸກແຂວງ, ມີຜູ້ຕາງໜ້າອົງການຊ່ວຍເຫຼືອເຊິ່ງກັນ ແລະ ກັນ ( SFE ), ການນໍາເມືອງ, ຫ້ອງການສາທາລະນະສຸກ 4 ຕົວເມືອງ ແລະ ນາຍບ້ານ 6 ບ້ານເປົ້າໝາຍຂອງເມືອງລະມາມ ແລະ ຂະແໜງການທີ່ກ່ຽວຂ້ອງເຂົ້າຮ່ວມ.

ທ່ານ ນາງ ສຸກອຸລາ ວັນນະວົງ ຜູ້ບໍລິຫານໂຄງການຕາງໜ້າໃຫ້ອົງການ SFE ໄດ້ສະຫຼຸບຄືນການຈັດຕັ້ງປະຕິບັດກິດຈະກໍາຕ່າງໆ ແລະ ການນໍາໃຊ້ງົບປະມານຂອງໂຄງການ ວ່າ: ໂຄງການຊ່ວຍເຫຼືອເຊິ່ງກັນ ແລະ ກັນ ຫຼື SFE ໄດ້ເລີ່ມຈັດຕັ້ງປະຕິບັດມາແລ້ວ 3 ປີ ( 2018 – 2020 ) ໂດຍການໃຫ້ທຶນຂອງອົງການໂວດົວສ໌ ເພື່ອການຮ່ວມມື ແລະ ພັດທະນາ ( FEDEVACO ), ອົງການສະວິດ ເພື່ອການຮ່ວມມື, ພັດທະນາ ແລະ ຜູ້ໃຫ້ທຶນອື່ນໆ ເຊິ່ງຈຸດປະສົງຂອງໂຄງການແມ່ນປະກອບສ່ວນ ເພື່ອຮັບປະກັນໃຫ້ການດຳລົງຊີວິດຂອງປະຊາຊົນໃຫ້ມີຊີວິດດີຂຶ້ນ, ດ້ວຍການໃຫ້ບໍລິການດ້ານສາທາລະນະສຸກດີກວ່າເກົ່າ. ໃນນີ້, ກິດຈະກໍາຫຼັກຂອງໂຄງການ ມີຄື: ຝຶກອົບຮົມທັກສະການສຶກສາ ແລະ ການປະຕິບັດຕົວຈິງຂອງພະນັກງານແພດໝໍ, ຝຶກອົບຮົມການສື່ສານລະຫວ່າງຄົນເຈັບ ແລະ ພະນັກງານແພດໝໍ, ຝຶກອົບຮົມການຄຸ້ມຄອງສະຖານທີ່ບໍລິການຮັກສາສຸຂະພາບ, ຝຶກອົບຮົມການບໍລິການຮັກສາສຸຂະພາບໃນສຸກສາລາ, ບັນດາບ້ານເປົ້າໝາຍ, ສ້າງລະບົບນໍ້າ ແລະ ວິດຖ່າຍ ໂດຍນໍາໃຊ້ງົບປະມານທັງໝົດ 401.741 ໂດລາສະຫະລັດ.

Image may contain: 2 people, people standing

ຜົນໄດ້ຮັບຂອງໂຄງການ ແລະ ຕົວຊີ້ວັດໃນໄລຍະ 3 ປີຜ່ານມາ ເຮັດໃຫ້ທັກສະການສຶກສາ ແລະ ການປະຕິບັດຕົວຈິງຂອງພະນັກງານແພດ – ໝໍໄດ້ຮັບການປັບປຸງ, ຕົວຊີ້ວັດ 70% ຂອງວຽກງານຮັກສາສຸຂະພາບໄດ້ຮັບການປັບປຸງ; ຮູ້ວິທີການກວດຢ່າງປົກກະຕິ; ປະຊາຊົນຜູ້ທີ່ເຂົ້າສະຖານທີ່ບໍລິການຮັກສາສຸຂະພາບໄດ້ຮັບຂໍ້ມູນພື້ນຖານ ແລະ ສາມາດເຂົ້າໃຈຂໍ້ມູນການເຈັບປ່ວຍຂອງເຂົາເຈົ້າ; ການຄຸ້ມຄອງສະຖານທີ່ບໍລິການຮັກສາສຸຂະພາບໄດ້ຮັບການປັບປຸງ ແລະ ອື່ນໆ. ໂອກາດດຽວກັນກໍໄດ້ມີການມອບໃບຍ້ອງຍໍ ແລະ ຂອງຂວັນໃຫ້ແກ່ພະນັກງານໂຄງການ, ມອບພາຫະນະ ແລະ ອຸປະກອນໃຫ້ແກ່ພະແນກສາທາລະນະສຸກແຂວງຕື່ມອີກ.

 

[ ຂ່າວ: ເຊກອງ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ