ມອບ - ຮັບໜ້າທີ່ຫົວໜ້າຫ້ອງວ່າການແຂວງສາລະວັນ ຜູ້ເກົ່າ ແລະ ຜູ້ໃໝ່ - Laoedaily

ມອບ – ຮັບໜ້າທີ່ຫົວໜ້າຫ້ອງວ່າການແຂວງສາລະວັນ ຜູ້ເກົ່າ ແລະ ຜູ້ໃໝ່

ໃນຕອນເຊົ້າວັນທີ 16 ທັນວາ 2020 ນີ້ ທີ່ຫ້ອງປະຊຸມຊັ້ນ 2 ສະໂມສອນໃຫຍ່ຂອງແຂວງ ໄດ້ຈັດພິທີມອບ – ຮັບໜ້າທີ່ ຫົວໜ້າຫ້ອງວ່າການແຂວງສາລະວັນ ລະຫວ່າງ ທ່ານ ສະໄໝ ໂພທິສານ ຫົວໜ້າຫ້ອງວ່າການແຂວງສາລະວັນ ຜູ້ເກົ່າ ແລະ ທ່ານ ຈັນເພັງ ສາຍທໍາມະວົງ ຫົວໜ້າຫ້ອງວ່າການແຂວງສາລະວັນ ຜູ້ໃໝ່ ໃຫ້ກຽດເຂົ້າຮ່ວມເປັນປະທານໂດຍ ທ່ານ ໂພໄຊ ໄຊຍະສອນ ກໍາມະການສໍາຮອງສູນກາງພັກ, ເລຂາພັກແຂວງ ຮັກສາການເຈົ້າແຂວງສາລະວັນ, ມີທ່ານກໍາມະການພັກແຂວງ, ບັນດາພະແນກການອ້ອມຂ້າງແຂວງ, ຫົວໜ້າຫ້ອງວ່າການແຂວງ ຕະຫຼອດພະນັກງານວິຊາການເຂົ້າຮ່ວມ.

ในภาพอาจจะมี 16 คน, ผู้คนกำลังยืน

ທ່ານ ຄໍາເບົາ ໄຊຍະສິດ ຮອງຫົວໜ້າຄະນະຈັດຕັ້ງແຂວງສາລະວັນ ໄດ້ຜ່ານຂໍ້ຕົກລົງຂອງທ່ານເຈົ້າແຂວງສາລະວັນ ສະບັບເລກທີ 720/ຈຂ.ສວ ລົງວັນທີ 15 ທັນວາ 2020 ວ່າດ້ວຍການຍົກຍ້າຍ ທ່ານ ສະໄໝ ໂພທິສານ ກໍາມະການປະຈໍາພັກແຂວງ, ຫົວໜ້າຫ້ອງວ່າການແຂວງ ຜູ້ເກົ່າ ໄປຮັບໜ້າທີ່ໃໝ່ຢູ່ເມືອງຄົງເຊໂດນ ແລະ ຂໍ້ຕົກລົງສະບັບເລກທີ 719/ຈຂ.ສວ ລົງວັນທີ 15 ທັນວາ 2020 ວ່າດ້ວຍການຍົກຍ້າຍ ທ່ານ ຈັນເພັງ ສາຍທໍາມະວົງ ກໍາມະການພັກແຂວງ – ເລຂາຄະນະບໍລິຫານງານຊາວໜຸ່ມ ຜູ້ເກົ່າ ໄປປະຈໍາການ ແລະ ຮັບໜ້າທີ່ໃໝ່ເປັນຫົວໜ້າຫ້ອງວ່າການແຂວງສາລະວັນ ຜູ້ໃໝ່, ຈາກນັ້ນ, ທ່ານ ສະໄໝ ໂພທິສານ ຫົວໜ້າຫ້ອງວ່າການແຂວງຜູ້ເກົ່າ ກໍໄດ້ຂຶ້ນຜ່ານບົດສະຫຼຸບ ພ້ອມທັງຕີລາຄາການຊີ້ນໍາໆພາໃນໄລຍະ 5 ປີຜ່ານມາ ເຊິ່ງມີຜົນສໍາເລັດຫຼາຍດ້ານມີທັງດ້ານດີ – ດ້ານອ່ອນ ແລະ ຂໍ້ຄົງຄ້າງ, ວຽກງານທີ່ຈະສືບຕໍ່ປະຕິບັດໃນໄລຍະຕໍ່ໜ້າ ເພື່ອໃຫ້ຜູ້ມາຮັບໜ້າທີ່ໃໝ່ໄດ້ຮັບຮູ້ເຂົ້າໃຈ. ພ້ອມດຽວກັນນັ້ນ, ກໍໄດ້ມີການລົງນາມເຊັນບົດບັນທຶກມອບ – ຮັບໜ້າທີ່ຫົວໜ້າຫ້ອງວ່າການແຂວງສາລະວັນ ລະຫວ່າງ ຜູ້ເກົ່າ ແລະ ຜູ້ໃໝ່ ຊ້ອງໜ້າໂດຍ ທ່ານ ໂພໄຊ ໄຊຍະສອນ ຮັກສາການເຈົ້າ   ແຂວງສາລະວັນ ພ້ອມດ້ວຍແຂກທີ່ເຂົ້າຮ່ວມເປັນສັກຂີພິຍານ.

[ ໂດຍ: ກິນດາວັນ ອ້ວນນາຄູ ]

ເວັບໄຊທ໌ ລັດຖະບານ
ເວັບໄຊທ໌ແນະນຳ
ເພຈ໌ແນະນຳ